طفولة وفضول

الحاج مختار شال الجثة ، وقال إيدك معايا يا نادر وكأن دى الإشارة.
شلت معاهم ودخلنا التربة :
ريحتها صعبة أوى .. ريحة مزيج من الرطوبة على عفن على روايح تانية متبقية .. ريحة الموت !
الحاج مختار : لفو شحاته على القبلة يا شباب .
نيمناه على الأرض ، وبدأ التربي يعمل أكتر من حاجة رفع راسه
بالراحة وزق من تحتها شوية تراب ، وجه عند الكفن عند الوش
تحديداً وفك الكفن من غير ما يكشف وشه .. كل ده وأنا متنح لأول مرة أخوض تجربة زى دى ..
وصاح الحاج مختار : مع السلامة يا شحاته .. السلام امانة
لسيدى فوده ، وسمعت صوت والدى (مع السلامة يا أخويا لحد ما أجيلك ..
مع السلامة يا حبيبى .. سلم على أبويا).
وخرجنا و إترزع الباب وصاح أحدهم :
أسألوا لأخيكم التثبيت فإنه الآن يسأل.
ومشينا وسبناه وحيد ..
الله أعلم مصيره إيه ؟ لكن المهم إننا سبناه زى ما سبناه قبل
كده وقفلنا عليه باب الأوضة .. وأن دماغى تشبعت جداً باللى دخلها من معلومات.
مرت الأيام والعزاء خلص .. وفى تالت يوم العزا سمعت عن حد مات تانى من القرية اتسحبت من البيت ..
لقيتنى لا إرادى رايح الدفن ، وفضلت أدخل وسط الناس لحد ما وصلت للقبر ووقفت بره.
التربي وأهل الميت فتحو القبر وعملوا نفس اللى اتعمل مع عمى .
كنت واقف عند باب القبر أتأمل بتركيز أكبر من المرة اللى فاتت و بجرأة أكبر.
وعينى عبارة عن مرصد مراقب كل ما يحدث ويسجل بأعلى جودة ،

عدت للتجربة دى وفضلت فترة أكرر ..أكرر الموضوع ونسيته ..
لحد ما دخلت مرحلة جديدة بتجربة جديدة تانيه خالص مرحلة عمر 15 سنة 17 سنه تقريباً