روايةأما غرام يشرح الصدر طاريه ولا صدووود وعمرنا ماعشقنا/14

فتحتها وغصة بإبتسامتها..

يامن عذابه يشققني ويرفاني
فرقاك غصب علي بالحيل مكتوبه ..
خبرت نصف تعب من نصفه الثاني
بعضي الرماد وبعضي نار مشبوبه ..

قفلت الجوال ورمته بالدرج الجانبي لها..
ضمت ذياب لها وغمضت عيونها..
فراقي صار عذابه ..؟؟
غيابي عنه مشقيه..؟؟

شف كذب أبووك..يقول أنا نصفه الثاني..
وهو ميت من دوني..
لو كان بيموت من دوني كان مات السنين اللي غبتها عنه ..
يحسب إن الكلام بيعوضني مافقدته..

الزمن بيحكم بينا ياذياب..
خلك شاهد علينا...

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛

كانوا بحديقة البيت مسوين باربكيو..
كلهم مجتمعين ما ينقصهم الا غازي..
لان راجح ما طلب حضورهـ..
وبعناد من رشا أتصلت في أخوها وطلبت منه يشاركهم..
تعذر بشغله وما يقدر يتواجد معهم بس هي لزمت عليه..

رمى راجح علبة مويا على طالب اللي يصارخ على شوق..
راجح\وعود يشق بلعومك..تصارخ عليها قدام عمها..
إذا رحت البيت كفخها..
طالب ينفخ\أنت تعال اسمع وش الخبلة تقول..
شوق بسرعة\طالب اسكت لا تعلمهم..
طالب\لا خليهم يدرون بهبالك..
شوق بزعل\طويلب مالك شغل..اذا ماعجبك الموضوع لا تجي..
طالب\هههههههههههه حلوة اعجبتني لا تجي..
يعني لمن بيزفونك..؟؟
راجح بهدوء\وش السالفة..؟؟
طالب\بنت اخوك تبي تسوي حفلة وتلبس فستان زواج..
راجح يبتسم\طيب وانت ليه معترض..؟؟
طالب عقد حواجبه\معترض لان كم سنة صار لنا متزوجين..
وبعدين إذا أنت ناسي ترى الحرمة حامل..
راجح\هههههههههه بس هي في خاطرها تسوي حفلة لنفسها..
وتبى تلبس فستان ابيض انت وش دخلك..؟؟
طالب\تلبس أبيض لمن..؟؟والحفلة مالها وجه ..
راجح\تلبس لنفسها..هي حابة تلبس وتسوي حفلة..
طالب\مايصير حفلة من دون معرس..
راجح\مالك شغل تستعرض في فستانها وتطيب خاطرها..
أنت خلك في شغلك أو في بيتك..أنا باحضر العرس..
شوق براحة\فديتك يا عمي..فهمت الحين شيء وفي خاطري..
كل البنات لبسوا فساتين لعرسهم وأنا ابى البس مالك شغل..
طالب برفعة حاجب\وأنا ابى البس المشلح وانفخ صدري ويعنني المعرس..
تصدقين اعجبتني السالفة..
رشا\ههههههههههههههه هذا اللي جالس يهاوش يوم جات على المشلح رضا..
طالب\أجل اللي لبسوا احسن مني..
لبى عصقووولة ولا يهمك احسن عرس نسويه..
ام غازي\ياوجه الله انت من جدك بتماشيها في هبالها..؟؟
تبون تفشلونا قدام الناس..؟؟
طالب\أفا حن نفشلك..؟؟

ما احد من الناس له عندنا شيء..كيفنا نعرس اليوم بكرهـ بعد سنة..
كيفنا نسوي عرسنا متى ما نبي..دمقراطية..
راجح\في عينك قال دمقراطية..قم شف اللحم أستوى ..
طالب\أعتقد إني ضيف ماله داعي أكرف..
قم أنت شف اللحم..عازمني تبى تشغلني عندك..
هذا وانا عريس وباخذ بنت أخوك..
أروح اتعشى فلافل أحسن من منتك علينا..
راجح مفتح عيونه\أعوذ بالله قلنا شف اللحم ماقلت أكنس الحوش..
رشا\ههههههههه عايش جوه أخوي مرة..
شوق تبتسم\وهو صادق عازمنا زوجك يشغلنا عندهـ..
راجح يتنهد\استغفر الله وش اللي خلاني أعزمكم عندي..
طالب\أتغشمر معك يوبه وش فيك..الله يهداك ماتقبل غشمرة..
قام طالب يشوف اللحم وراجح يضحك على كلامه..
راجح\أجل اتغشمر معاك...
طالب يبتسم\عامر يقول كذا..عاجبتني الكلمة..
غازي\السلام عليكم وحمة الله ..

ردوا السلام عليه ورشا حضنته ورحبت فيه..
جلس جنب أمه بعد ماقبل راسها..
وكانت ردت فعلها السكوت والتحيز عنه..
وبعد ماصافح راجح صد عنه بهدوء..

جلس قريب من شوق وهو يسمعها تتكلم عن حفلتها..
ناظر في أمه بس هي كانت صادة عنه وماتكلمه..
من بعد رجوعهم من عند هديل..
قالت كلمة وحدة في وجهه وبعدها صدت عنه..
أم غازي بقهر\ليتني ما شفته ..

تمنت إنها ماشافت ولدهـ ولا ضمته..
مايدري بسبب كلام هديل لهم..او لانه ولده..
مايلومها على كلامها لهم ولا يشره عليها..
هله ماقصروا فيها وكله منه..
تمنت امه لو حرمتهم من ذياب..
لو طردتهم او غلطت عليهم..
ع الأقل يكون عندهم سبب يواسيهم..

شوق\هاه غازي وش رايك..؟؟
غازي بهدوء\على راحتك..
بس انا مو عاجبني الموضوع..
شوق بزعل\ليه..؟؟والله إنها في خاطري..
أم غازي بحدة\أنا قلت لك بتكون حركة بايخة ومالها داعي منك..
هذا أنتي متزوجة وألحين حامل وتوك تبين تسوين حفلة زواج..
شوق بتصميم\يومه كان لنا ظروفنا لما ماسوينا حفلة..
بس الحين الحمدلله كل شيء تمام..وبعدين مو حفلة ومعازيم..
حفلة صغيرة تجمعنا وتجمع أهلنا القريبين منا وصديقاتي..

طنشتها أمها وماحبت تناقشها قدام احد..
جلست رشا جنب غازي وهي تبتسم له..
رشا بفرح\مشتاقة لك..مر وقت طويل ما سولفت معك..
غازي بمحبة\برسم الخدمة متى ما تبيني جيتك..
رشا\فديتك يا ابو ذياب دوم تجبر بخاطري..
شوق\آآآهـ ياقلبي على ذياب وش زينه..
رشا\ماخذ زين ابوهـ ..
غازي يبتسم\نسخة من أمه..
شوق بهدوء\متى أخر مرة شفت ذياب..؟؟
غازي\في ايطاليا..
شوق\ليه ما تطلبه منها..ع الأقل تشوفه وترجعه لها؟؟
غازي\انا وهي واحد..وما ابي ذياب الا وأمه معه..
رشا\اممم احيان كنت اشوف هديل تشبهك..
شوق بعبط\بدا تاثير النوم..بتنام الحين يا أخوي جاملها..
رشا بتطنيش\اكرميني بسكوتك..
لا والله بجد غازي..كنت اشوف فيها منك..
غازي باهتمام\كيف..؟؟
رشا بتفكير\اممممم اتذكر مرة في المزرعة بايطاليا..
دخلت مكتبك وكنت انت تهاوشها..وهي واقفة وتصارخ عليك..
كنتوا مقابلين بعض وانت معصب عليها مرة..
ههههههههههه هي ضربتك بكتاب وهربت منك..

وأنا قفلت الباب ما خليتها تخرج من المكتب..
شوق\ههههههههههه يوم كبت المويا بوجهك وزحلقتي..
رشا\ههههههه ايه..يعنني فازعة لاخوي..
طحت أنا وهي ع المويا وبدل مايرفعني رفعها يشوف لا يكون صار لها شيء..
غازي يبتسم\ايه أذكر..بس وين شفتي الشبه بينا..؟؟
رشا\كنت اشوفها تشبهك في قوتها..وكانها تستمدها منك..
كانت تصارخ عليك وتضربك مستقوية فيك..
ولما رفعتها من على الارض واهتميت فيها لانت معك..
وانتوا قبل دقايق كنتوا بتذبحون بعض..
صرت احسها تطبع بأطباعك..اذا كنت معقد حواجبك ومعصب..
تعقد حواجبها وتهاوشك قبل أنت تهاوشها..
واذا لنت معها تظل معصبة عليك بس بهدوء...

أم غازي\ياليتها خذت أطباعه..يمكن كانت اليوم مرتاحة..
شوق\وليه ما ترتاح..؟؟الحمدلله هذا هي رجعت وبخير..
ام غازي باستنكار\بخير..؟؟تسمين حالتها بخير..؟؟
لو سوت مثلنا وحرمتنا من الولد خمس سنين وقالت لنا مات..
يمكن تصير بخير..ولو طعنتنا في عرضنا وتقولت علينا..يمكن تصير بخير..
لو ضربتنا كلنا وحبستنا يمكن تصير بخير..
غازي\بس هي ماهي بمثلنا..وعشان كذا بتكون بخير..
راجح بحدة\ولو تظل بعيدة عنا بتبقى بخير..
أم غازي\وهذا اللي بيصير..صح يا غازي..؟؟

ناظر في امه وفي راجح اللي ماخذين موقف كبير منه..
ومابيرضون إن غازي يأخذ هديل مرة ثانية..
يدري برغبتهم يظنون إنهم يريحونها بإبعاده عنها..
ولو وقفوا ضدهـ بيرجعها له..لانها زوجـــته..

إذا راحوا جميع الناس عنّي وهانـتْ العشـرهـ
أضل الشامخ بـ دمعي وأقـول لـ ضحكتـي صيـري
أنـا مثـل الـذي يمشـي بـ غابـه كلّهـا خطـرهـ
أكمّل خطوة دروبـي ولا توقَـفْ خُطـا سيـري..

وقف وطلع من حديقة البيت اللي كانوا مجتمعين فيها..
لارد على أمه ولا على راجح..
تظل بعيدة عني وتكون بخير..
أجل والله ماعرفتوها..
هـــي تعاني..ماهو تبي قربي..
لانها ضايعة وعايشة بدوامه..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


في بيت ابوعلي..
كانت جالسة في الصالة مع الجدة وحنان..
هديل الصغيرة بحضنها وذياب يحاول يسحب هديل من حضن أمه..
حنان\هههههههه هديل تكفين هاتي بنتي ولدك متوحش..
هديل\ماعليك منه ألحين اعطيه كف يأدبه..
هههههههه شوفي كيف يبي يمسك شعرها..
فديته ذيب أمه الغيران..
الجدة\احرقتي قلب الولد قطي البنت وشلي الولد..

مدت هديل الصغيرة لامها وضمت ذياب بحضنها..
هديل\أفا يا عسووولة طلعتي تفضلين الولد على البنت..
يعني ذيبي أحب عندك من هديل..
الجدة\مابه شك..الولد احب من البنت..
هديل تضحك بصدمة\ههههههههه يومه حرام جاملي حنان ههههههههه
الجدة\اتكلم عنكم كلكم..دوم الولد يكون احب من البنت..
حنان\الله يسعدك يومه تحسبين انك تجرحين مشاعرنا..
ندري ان الولد يكون اغلى من البنت عند هله..
الجدة\الله يرحم أبوي كنت بنته الوحيدة وسبعة اخوان..
وكان يغليهم اكثر مني..
مع انهم كانوا يعذبونه كثير بمشاكلهم مع عيال الحارة..
وأنا كنت مباركة مايطلع مني الا لبيه وتامر..
بس هذا شيء مزروع في الآوادم..
أم علي\والله أنا ما افرق بينهم احب عيالي وبناتي..
حتى حنان أعتبرها مثل بنتي وغلاتها من غلات زوجها وعياله..
حنان\عساني فدوة لك انتي وقلبك الطيب..
بس حتى عندنا صح أبوي يحبنا انا وأخواتي..
بس يظهر كثير غلاة اخواني أكبر منا..
هديل\مع كل اللي صار معي بس ماحسيت ان ابوي يحب أخواني اكثر مني..
بالعكس احس إنه يحبني أنا وغادة أكثر..
الجدة\لان أبوك حنوون وقلبه طيب معكم..
أبوي كان يحبنا بس كان شديد ومايحب الدلع..
هديل\الحمدلله أنا غير ذا الذيب ما باجيب..
عشان لا افرق بينهم ولا أقهرهم..
الجدة بسخرية\إيه وزجك بيخليك على كيفك..يبي عيال وبنات..
هديل بقهر\وأنا وش دخلني فيه..؟؟
الجدة\أمك يا حسين..وش دخلك فيه..
أجل من وين يجيبهم عياله..؟؟
هديل\من البقالة ويخب عليه..
الجدة بشهقة\اقربي اقربي أشوف..

هديل بحذر\والله ما اقرب..شوفي يا عسولة خلينا حلوين مع بعض..
الكلام هذا لا تعيدينه وباجعل نفسي ما سمعت..
حنان\ههههههههههههههه ياويلك أشردي..
هديل بصراخ\يوووووومه لا تضربين آآآآآآآآآآآي ...
الجدة بتشفي\وعيديها يا بنت حسين اتمسدك بالعصا على ظهرك..
ام علي\ههههههههه خلاص سامحيها ما بتعيدها..
هديل\تضربيني قدام ورعي تبين تطيحين شخصيتي..
الجدة\العلم صار في بطنك..
هديل بجدية\يا ام حسين الكلام في الفايت نقصان عقل..
العلم صار عند أبوي وأخواني..ومن ذا البيت ماني بطالعة..
انا ادري إنه كلمك بس مدري وش قايلك..
بس والله يومه ما يعرفني ولا أرجع له وهذا أنا حلفت..
الجدة بعصبية\وش اللي عرفك إنه كلمني..؟؟
هديل بقهر\لاني أعرفه..وشكيت من كلامك الدايم عنه..
وكل ماحلا لك الجو فتحتي سيرته..وأكد لي عبدالله..
خذيها مني وبصراحة لو يموت مارجعت له..
الجدة بعصبية \والله إنـ............
هديل تقاطعها بحدة\والله أقهره مثل ماقهرني..

طلعت من الصالة وتركت جدتها معصبة من كلامها..
الجدة\تشوفين بنتك..ماخلت فيها سحى..
تراددني وتهدد..
ام علي\كلنا عارفين رايها..هي قالت ماتباه ولا بترجع له..
فليه تحدينها على أقصاها وتحلفين..
الجدة\راضية إن بنتك تترك زوجها ويطلقها..
ام علي\إن كان في قرارها راحتها فإيه راضية بطلاقها..
الرجال شكله قاسي ومن حرمانه لها منا واضح انه قاهرها..
الجدة\اللي بين الزوجين مايعلم به الا الله..
عقلي بنتك..الدنيا ماهي بعلى شورها..وإن سكت عنها الحين
فماهو بساكت بكرهـ..والولد بياخذه ويوجعها فيه..
ام علي\بيسكت ماعليه شر..
مثل ما صبرت بنتي سنين وتعنت معه بيسكت..
خليه يعرف إن الدنيا سلف ودين..ومثل ماضامها بينضام..
الجدة\لا تكبرين راس البنت بكلامك..
أنتي لا قابلتيه ولا سلمتي عليه كود إنه طيب وزين..
أم علي بزعل\ولا ابى اشوفه ولا اسلم عليه..
من يسوي سواته معروف انه شين وقوي عين ..
حنان\اذكروا الله وصلوا على النبي..
الموضوع كبير وماينحل كذا..هديل صاحبت الشأن..
وهي اللي بتقرر..
أنتوا تناقشوا معها بالحسنى ولا توقفون بصفه ضدها..

انتهى النقاش بينهم ولازالت الجدة على رايها..
إن هديل لازم ترجع لزوجها وتبطل زعل..
هو كلمها وهي هاوشته وشرشحته..
وكان يرد عليها بنبرة هادية واثقة..
واللي زاد عليها لما يقول لها يا عسولة..
تحس وكأنه يعرفها مثل عيالها..

الجدة بغضب\وش أنتي مسوي فيها يالوجه الودر..؟؟
غازي يبتسم\إن شاء الله كل خير..
الجدة\دامه خير ليه ماتبى ترجع لك.؟؟
غازي\هي ماقالت لكم فليه أقول..؟؟
الجدة\لانها بت أصيلة وتحفظ أسرار بيتها..
غازي\وأنا اشهد..
الجدة\بس أنت قاهرها وموجعها..
وهي كاتمة..قل وش انت مسوي..
وإن كنت على حق فلك مني أرجعها لك..
وإن كنت على باطل فوالله ماتعرفها وأنا حية..
غازي\ ليه والحلف يا عسولة..بغيناك عون يا ام حسين...
الجدة\عون لك على الناس..أما عليها فلا..
غازي\وماغلبني من الناس غيرها..
الجدة\شف يا أبوذياب والله إن قلبي يوجعني منك..
بسبب سواتك فينا وفيها..ولو الزمن يرجع ماتاصلها ولا تعرفها..
غازي\ما انتي أول من طلب الزمن يرجع..
ولو بيرجع صدقيني ما تبنا يا أم حسين..
الجدة\انت تباني أفزع معك عندها..؟؟
غازي\ولا لك لوى..
الجدة بإستغراب\وش علمك..؟؟
غازي\ما ابى أحد يزعلها ولا يضايقها..
كلمتك لأني اعرف غلاتك عندها..وانتي كبيرتهم..
لا احد يقهرها..

رغم إنه أعجبها إهتمامه فيها..
وكيف إنه ماطلب إلا راحتها..
بس تبى تكون قاسية معه وماتبين له راحتها له..
الجدة بحدة\إن كان لقت القهر معك فمابتلقاهـ معنا..
وشكلها والله أعلم ماذاقت الا مرارتك..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛

للورد قــصة ..بس من يفهــــم الورد..؟؟
إنـــه إذا طــــــال التجــــافي ,,

إنـــه إذا طــــــال التجــــافي ,,
تـــــــــألــــم ..,,

من بعد ماطلعت من المستشفى على مسئوليتها..
نامت في غرفة كانت مجهزتها لها سارة تحت..
بعذر إن ياسمين تعبانة وماتقدر تطلع وتنزل لجناحها..
والطبيبة نصحتها تظل متسطحة اغلب وقتها عشان الحمل..
عصب سلمان على سارة وتهاوش معها..
بس هي ردت عليه إن الحرمة تعبانة جسدياً ونفسياً..
ومابتقدر تعيش في جناحها..
والحقيقة الخفية إن هذي كانت رغبة ياسمين..

فتحت عيونها لما حست بأصابعه تتلمس وجها ..
شافته يبتسم لها ويقرب منها..
قبل ما يقبلها صدت بوجها عنه..
وحطت يدها بينه وبينها..
مسك يدها وقبلها على باطن كفها..
سحبت يدها منه ولفت بجسمها لـ الجهة الثانية توجعت وطلعت منها آآآهـ مكبوتة.
جلس بسرعة وسدحها على ظهرها مرة ثانية..
سلمان\لاتتحركين بقوة بتتوجعين..
ياسمين بتعب\إطلع برا..
سلمان بهدوء\بأطلع بس ماهو قبل لا اتطمن عليك..
ياسمين\انا خاطري في الولد وماابيه يموت..
وجودك عندي يتعبني..
سلمان\ياسمين أبيك تسمعيني وتفهمين تصرفي..
ياسمين برفض\تركت لك الجناح وباظل هنا لحتى أولد..
إتركني بحالي كفاية اللي صار منك..
سلمان بتصميم\اللي صار ماكنت حاسب حسابه..
لحظات غضب وراحت يا قلبي..
ياسمين\وانا باظل أنتظر لحظات غضبك حتى تموتني او تموت جنيني..؟؟
أطلع يا سلمان وريحني..
سلمان يتنهد\طيب باطلع الحين وأريحك..
بس إذا مارجعتي لغرفتك جيت أنا عندك..
سارة بتنام عندك..

طلع من عندها وهي ماردت عليه..
قابل سارة في طريقه وعبس في وجها المبتسم..
سلمان\متى بيجي زوجك ويفكنا منك..؟؟
سارة بمرح\فديت الطاري..بيرجع متى ماكتبه الله..
وانا على قلبك يا سلمان لحتى تعرف قدر الوردة اللي عندك..
أجل تضربها يالتمساح..
إن ماقلبتها عليك وعلمتها كيد النساء ما أكون السوري..
سلمان بقهر\سوير خلي حرمتي على ماهي عليه لا تخربينها..
ياسمين\تبيني أخليها طيبة وأنت ما تستاهل طيبتها..
معصي يا سلمان..

أبتعدت عنه قبل يمسكها ودخلت عند ياسمين وهي تضحك...
أبتسمت ياسمين على شكل سارة المبسوطة..
سارة\ياقلبي على أخوي بتضيع علومه..
ياسمين بهدوء\وش صاير..؟؟
سارة بخبث\أبد يا طويلة الذيل مهددته أقلبك عليه..
واخليك تصيرين ضبعة بعد ماكنتي قطوة وش زينك..
ياسمين بزعل\جاعلتنا وحوش..؟؟
سارة\هههههههههه عادي صيري وحش دام زوجك وحش..
إن طقك شلي أقرب ما عندك وعلى راسه..
عاد ماهو تفلقين راسه نصين ويموت..
لا عطيه ضربه كذا تخليه يحاسب الف مرة قبل يمد يدهـ..
ياسمين تضحك بوجع\ههههههههـ....ـههه آآآه بس يا سارة تكفين..
صرت اتخيل شكلي أضربه..
سارة\لبى الضحكة..بس بصراحة مالك داعي على وقت تعبك..
خربتي الخطة وعفستي الموضوع..
ياسمين\ياساتر مالك أمان قبل شوي انا حبيبتك والحين مالي داعي..
سارة\بكرة يوم عصييب علينا..
محضرة مفاجعة لهدولة بنت عمي اخت غادة..
ياسمين\عرفتها حبيبتي..
سارة بنص عين\يعننك تحبينها قبل تشوفينها.؟؟
المهم كنت مخططة مع غادة وراكان وعيال العم..
نأخذها لـ الفيصلية بس بطلنا عشانك يادوبة وبنسوي المفاجعة هنا في بيتنا..
ياسمين برفض\لا سارة حبيبتي لا تغيروا خطتكم عشاني..

خذوها وين ماتحبون أنا ماراح أفيدكم باظل في غرفتي..
سارة\تخسين مانروح ونخليك..لو أنا اللي تعبانة..
كان حلفت ما يصير شيء إلا بعد ما اولد واتنفس عشان انبسط معهم..
ياسمين تبتسم\الله لا يحرمني منك أنتي معوضتني عن هلي وزوجي وعن الناس..
سارة بزعل\سوسة اسكتي تراني ام دميعة..
مع أنك احلى مني بس أحبك..
ياسمين\ههههههــ...آآآه سارة بس نامي..
سارة\أوكى لاتولدين مابعد تكون الجنين..
تصبحين على ورد ياوردة..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛


بـ شُويش
ياتنهِيدة ( الضييق ) بشوييش
مابي تمرّ وتسمع شهاقي
(أمــــــــي)
مابي تجيني تسأل ضيقتي لييش !!
وافزّ اكفكف دمعتيني
…بكمّي
وارسم على طارف شفاتي
…. أثر طِيش !!
وافتَح كِتابي
………. كنّه الدرس . . همّي..,,

شالت كتاب كانت تتصفحه ورفعته تغطي وجها..
لما سمعت امها تناديها من ورى الباب وتدخل عندها..
أم علي بحنية\هدول انتي صاحية وأنا أحسبك نايمة..
هديل بابتسامة\نيمت ذياب وألتهيت بكتاب غادة..
ام علي\ليه مانزلتي أبوك وأخوانك تحت..؟؟
هديل بكذب\ما أنتبهت لـ الوقت قرأت في الكتاب من دون وعي...
أم علي ماهي مصدقتها\إلا وش سويتي بدراستك..كملتيها هناك؟؟
هديل بتنهيدة\لا يومه..قررت اكمل لما أرجع السعودية..
أم علي بزعل\وتضيعين سنينك هناك وأنتي قادرة تدرسين..؟؟
عضت على شفايفها بقهر\مناهجهم صعبة هناك ماقدرت عليها..
ام علي بحنية\يعني بتكملين دراستك..ولا صابك الخمول..؟؟
هديل\كنت بأقول لعلي يشوف أوراقي بس مــ...........
ام علي\كملي..بس وشهو..
هديل\أحسه مو فاضي الحين واخاف أشغله باوراقي..
ام علي\هديل ارفعي راسك..

ماتجرأت ترفع راسها..
تخاف تشوف امها الصدمة اللي في عيونها..
مجروحة من ابوها وأخوانها..
لما عرفت إنهم بيدخلون من برا أخذت ولدها وطلعت..
ماتبي تشوفهم يتهربون منها ويتعذرون باعذار واهية..
وتدري لو إنها نزلت عندهم بيثبتون شكوكها وبينسحبون من المكان..
هزت راسها لامها رافضة طلبها..
شهقت بصوت مخنوق لما حست بيد أمها ترفع راسها..
ام علي بحسرة\تحسبين إني سالية عنك..؟؟
تظنين إني ما اشوف رجفتك ولا احس بخوفك..
قلبي مقبوض عليك وعلى حالك..
وإن ضحكتي وأستقويتي..
خدعتيهم كلهم ماخدعتيني..

هديل بغصة\ممـــ.....يومــ..ــه انا بخيـــ....ــر..
ام علي بزعل\كذابة..
هديل بصوت باكي\يومه ليه ابوي وأخواني ما يبوني..؟؟
ام علي\........................
هديل تبكي\وش اللي زعلهم مني..؟؟
خجلانين مني..فضحتهم بين الناس..؟؟
يوومه قولي لي أنا سويت فيكم خير يوم إني رجعت..
ولا كسرت ظهر أبوي وأخواني..؟؟

شدتها أم علي لها بقوة ضمتها بعدما ضربتها على ظهرها بقهر..
ام علي بزعل\ولك عين تقولين مابغيتي ترجعين..
عنبوا إبليس وش قلبك مخلوق منه..
لو كلهم مايبونك بحريقة والله لا يردهم..
ماذاقوا اللي ذاقته أمك ولا حسوا بضيقتي عليك..
انا كنت احس فيك لما تناديني بوجع..
كنت أصلي وادعي ربي وانا ابكي..
كنت اظن إنك تتعذبين في قربك والله غاضب عليك..
قلبي يتقطع لما افكر انك يمكن تكونين في النار..
مابعد الموت عذاب يا هديل..كنت استغفر لك واتصدق واصوم..
واطلب ربي يخفف من عذابك..
شكيت فيك وفي تربيتك وقلت بنتي عصت ربي والله يعذبها..

هديل تشهق بوجع\لا يووومه..تكفين لا يكون تعذبتي كذا..
الله ياخذني يوم عذبتك..آآآآآآآهـ ياليتني متي ولا ناديتك بوجع..
ليتني مت يومه ولا توجعتي علي وبكيتي..
ام علي\ريحيني من أوجاعك يا هديل..
قلبي يوجعني عليك يا بنتي..
قولي لي وش سوت معك الدنيا..؟؟

تبيني أزيدك قهر..
تبين أقهرك على بنتك وتبكين طول عمرك عليها..
سامحيني يومه انا ماني بقاسية..
هديل\ماقدرت علي الدنيا يومه..
تحدتني ووعدتني ما اقابلكم..
وأنا اليوم أنتصرت عليها وجيتكم..
ام علي بقهر\قولي الصدق يا هديل..؟؟
طيب زوجك وش اللي قهرك فيه..
قلتي بتقهرينه مثل ما قهرك..؟؟
هديل بغصة\قهرني يوم حرمني منك وغربني..
ولانه قهركم بخبر موتي وزعلكم..
زعلكم ماهو بهين علي يومه..
لولا زعلكم ماكنت له تعنيت..

ام علي\ماتبين تقولين الصدق..؟؟
هديل تبكي\آآآآآآآآآآهـ يووومه مشتاقة لك سامحيني..
ام علي بصبر\الله يهدي سرك ويريح قلبك..
هذا اللي أقدر أقوله..اليوم أنتي عندي والله يعوضنا..
هديل بابتسامة كذابة\يومه هو دلعني كثير ودللني..
رباني على العناد والاخذ بالثار..
خليني أخذ بثاري منه مثل ما علمني..
ام علي\ما ابيك تصيرين مثله..
مابتضرينه بشيء يا هديل..
لا بتقدرين تغربينه ولا تحرمينه من هله مثل ماسوى فيك..
هديل بألم\يومه قويني..ولو بكذبة قويني..
قولي بتقدرين عليه..
بتوجعينه..بتبكينه كذبي علي وأصدقك..
ام علي\أوهمك..؟؟
ما بأسوي فيك خير لا كذبت عليك وأرضيتك بشيء مابيصير..

لمت يدينها حوالين أمها ودفنت راسها بحضنها..
تكلمت وهي تبكي بزعل..
هديل\راضية بالوهم..
ام علي بهدوء\هشششش ولدك بيقوم من صوتك..

فزت من حضن أمها وشالت ذياب سدحته بسريرهـ..
ورجعت لامها وهي تبكي..
مسكت يدها وحطتها على قلبها..
هديل بخوف\يوومه قلبي صار يقسى على ولدي..
أحس إني بأصد عنه بسبت ابوهـ ..
ام علي برجاء\لا يومه تكفين وسعي خاطرك..
هذا ولدك ولد قلبك..
لاتخلين وجيعتك من أبوهـ تقسيك عليه..
لاتاخذينه بذنب غيرهـ..

ضمت امها وطلبتها تنام عندها..
وهي تردد في بالها..
وأنا يومه ماهم خذوني بذنب غيري..

وكانت أمها تفكر في ذياب..
ومصدومة ليه هديل مالاحظت غرابة ولدها..
خافت تقول لها وتنهبل بنتها من الخوف..
والمشكلة ما أحد حس بالولد لا امه ولا ابوهـ ..
قررت تتصرف من دون ماتقول لهديل عنه شيء..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛

يحس فيها جنبه طايرة من الفرح..
لو ماكانوا في الشارع العام كان حضنها من حبه لها..
صرخت بحماس وهي تصفق بيدينها..
راجح\ههههههههههههه بس فضحتينا..
رشا\مالك دخل انا مبسوطة..
راجح\وانا مثلك مبسوط..والحمدلله..
رشا\ههههههههههه يعني بأتعالج..
راجح\الحمدلله لو كان عندك إرادة تخلصتي منه من زمان..
رشا بابتسامة\الحمدلله..ألحين بس يغلبني 12 ساعة ..
راجح\لا بعون الله مايغلبك ابد..
رشا\حسيت الدكتور يبي يكوفني يوم اقوله لا ما احس..
راجح\ماعليك منه عطيته كلمتين يخلي عنه النفخة الزايدة..
رشا\يقول ما تحسي طول ما أنتي نايمة..مفتح عيونه ع الأخير..
راجح يبتسم\لانه يا ذكية عرف إنك مو منتظمة على علاجك..
رشا عبست\كنت مو منتظمة بس صرت منتظمة عليه بالدقيقة..
حتى اقول لـ الخادمة تصحيني او تاكلني اياه وانا نايمة..
راجح بخبث\من اللي اكلك علاجك أمس..؟؟
رشا\أنا.
راجح\كذابة نمتي قبل تاخذينه..
رشا\أكيد سوما..
راجح\قطع انا صرت سوما..
رشا\ههههههههه انت..
راجح بنص عين\إيه أنا عطيتك العلاج..
وعطيتيني رفسة على بطني..
رشا بزعل\لا والله..
راجح يبتسم\بيني وبينك كنت استاهل الرفسة ههههههههههههه..
رشا بفشلة\دوووب كنت متاكدة فيه شيء غريب..
راجح بغمزة\ما غريب الا الشيــــطااااااااان..

صدت عنه وهي منحرجة منه ومن كلامه..
فرحتها ماتعطيها لاحد..قدرت تتغلب على النوم القهري وبدل ماكان يسيطر عليها 20 ساعة..
تقلص ل17 ساعة وبعدها 16 وبعد رجوع راجح من ايطاليا قدرت تسيطر عليه اكثر..
وبكذا صار 12 ساعة..وهي ناوية تتخلص منه نهائياً..
حياتها حلوة مع زوجها وولدها..وصارت تفكر بجدية بعد العلاج والتخلص من اثر الحبوب..
تحمل وتكمل حياتها بشكل طبيعي مع زوجها..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


خرجت غادة من البيت وهي تنفخ بقهر..
قابلت سارة عند الباب..
سارة بعصبية\ليه مانمتي بعد لاطعتني في السيارة..
غادة\قلت لك عنيدة مارضت تخرج معي..
سارة\وينها فيه تيمون..؟؟
غادة\بالصالة مع أبوي وجدتي وأمي..
سارة\أشوى العيال ماهم موجودين لا يشوفون وجهي الحقيقي..
غادة\ههههههههه تقصدين وجه الطقاقة..
سارة\لو ماكنت مسرحة شعري كان توطيتك..
المهم روحي جيبي عباية لاختك وفستان حلو ولوازمه وانا بأسحبها غصب عنها..
غادة\طيب بس انتبهي لا تخرب تسريحتك..
سارة بفزع\يوم عزيتوها صدق هذاك الوقت..
هزولت تخرب تسريحتي تخسي..

طلعت غادة لفوق وحضرت اغراض هديل بشنطة صغيرة..
واخذت عبايتها وطرحتها ونزلت ضحكت وهي تسمع صوت هديل وسارة يتهاوشون..

سارة بقلة صبر\عمي حللني..
ابو علي بابتسامة\محللة بس في أيش..
سارة\في هذي..
مسكت هديل من عضدها ووقفتها من على الكنبة..
سحبتها معها غصب عنها..
هديل\هيه وخري..اتركي يدي..
يووووبه شفها أستخبلت..
ابوعلي\روحي مع خواتك يا هديل ماعليك شر..
سحبتها من الصالة وهديل تضربها..وسارة صرخت عليها..
سارة بتحدي\حدك يا أم قوطي الطماط..كله ولا شعري..
هديل\فكي يدي ويسلم شعرك..
سارة\معصـــي ما افكك..أبى اعرف وش اللي مخوفك..؟؟
هديل بعناد\مو خايفة بس ما ابى اطلع من البيت..
عاجبني بيتنا ابي اعد جدرانه وبلاطه مالك شغل..
سارة\وعد وعلى هذا الخشم مثل ما خرجتك ارجعك..
خلي عنك حركات البزارين أنتي الكبيرة العاقلة الحلوة مابتكسرين في خاطري..
هديل\ماني بكبيرة ولا عاقلة ولا فيني ذرة عقل..
ولا باطلع من البيت..
وتوكلي أنتي ومرت اخوووك واقضبوا الباب..
غادة\يالهوووي تطرديني من بيت أبوي..؟؟
هديل\ايه يا الله الخلا..استحوووا يامال الماحي..
سارة\وتقولون عايشة في ايطاليا كم سنة وهذا لسانها يرمح..
هديل\انتوا ماوراكم ازواج يضفونكم..
كل شوي طابين علينا ماتستحون..؟؟
سارة بقهر\حن اللي ماورانا أزواج..
لا عيوني ورانا أزواج وقايمين بواجبهم ..
ماهو مثل بعض ناس مهيتين بيتهم وجالسين عند امهم..
هديل بغضب\لاجيت في بيتك شوري علي واطرديني..
غادة\بس أنتي واياها..
هدووول بسك عناد..حن مسوين مفاجئة لك..
لاتخربين علينا وماتجين معنا..
هديل\ومفاجئتكم ليه ماجبتوها هنا..؟؟
سارة تعد\7 8 9 10 طفح الكيل..

سحبت هديل غصب وطلعتها الحديقة برا ..
وغادة تساعدها وتسحبها معها..
لفت العباية عليها اي كلام ولفت الطرحة بشكل قوي على راسها..
طلعوها الشارع وعلى طول ركبوا السيارة ..
سارة تتنفس بسرعة\والله إن خربت تسريحتي لتكونين من النادمين..
غادة\ههههههههههههه آآآآآي بطني..
سارة\حشى جاعلة فيها بنت الشيخ وحن بنخطفها..
غادة\ههههههههه سوسو شوفي ساحبينها بالبجامة..
سارة\تستاهل ترجيتها تدحر ابليس وتبدل ملابسها وتجي بالحسنى مارضت..
غادة\هدوولة ليه ساكته يا قمر..
سارة\من قدك خاطفينك عشان تحضرين حفلة لك أنتي..
هديل بهدوء\سارة ما ابى حفلة ولا شيء..
رجعيني البيت تكفين..
سارة بمحبة\ما بأرجعك تدرين ليه..؟؟
لاني أحبك وابيك تكونين طبيعية..
انا صح مو عايشة معك ولا اعرف كيف حالتك..
بس لما عرفت من غادة انك ماتطلعين من البيت ابد قررت اتصرف..
لاتنسين أنا كبيرت بنات العائلة وهذا شغلي..
اهتم فيكم واحدة تلو الأخرى..
غادة\فديتك قايمة بواجبك مع الكل..
سارة\بس ام قوطي الطماط ماهي براضية..
هديل تبتسم\فديت قوطي الطماط ذابحتك الغيرة منه..
سارة بحسرة\ماكذبتي..كنت اشوف عيالي أجمل عيال الخليج..
غادة تشهق\هئئئئئئئئئئئئئئ ايييييش قرووودك..اجمل عيال الخليج..خافي ربك..
سارة بوعيد\معليه نتلاقى بعد ما اشوف إنتاجك انتي وضبانك..
هديل\هههههههههه الضب لساته حي..مامات..؟؟
سارة\هههههههههه ايه حي ابشرك ويسلم عليك..
غادة\هدووول ما اشتقتي لـ الثمامة..؟؟
هديل بونة\يالبى الطاري..متى بنروح لها..
سارة\والله ان تبشرين ..
الليلة بأقول لراكان يقنع الشيبان ونطلع قبل يرجع زوجي ..
غادة\انتي وش حاشرك بينا؟؟انا سألت أختي يعني بتكون طلعة عائلية..
انا واختي واخواني وزوجي..
سارة\دام الطلعة عائلية..وش دخل راكان..؟؟
غادة بوله\زووووووجي لبى قلبه..
ماتحلى الدنيا الا بوجودهـ..
سارة\والله ماتطلعون من دوني..

هديل\ببببببس بعدين تناقشوا..
ألحين وش اسوي بحالي..
أروح معكم وانا لابسة قميص البيت..
وتقولون حفلة لي..تبون اكون انا السندرلا يعني..
سارة\حلوة الفكرة..وليتني اقدر عليك ..
عشان مرة ثانية تسمعين كلامي وتخلين العناد..
غادة\جبت اغراضك معي لما نوصل بدلي وتلبسي على كيفك..
هديل\لا غش أنتوا كاشخين في حفلتي وأنا سنين ماكشخت..
سارة\كيف سنين ماكشختي..؟؟
ما تكشختي لزوجك ولا لبستي فساتين ايطالية وحركات بايخة..؟؟
هديل\اقصد ماكشخت لــ مناسبات مثل هذي..
هناك كنت........يعني امممم ....البس اللي يناسب المكان..
سارة بنظرات\ايه فهمت عليك..
طيب تحبين نرجع البيت تلبسين على راحتك..
تونا بدري ما احد وصل..
هديل\لا ما يحتاج بألبس في بيتكم اللي اختارته غادة..
واذا ما اعجبني باخذ من فساتينها عاد أعرفها ذوويقة..
غادة\فدا الكبت باللي فيه..
سارة بمرح\وتسان أبتسي وابتسي..
غادة\هههههههههه يالبى المنطووق أحبه أنا..وأنا ابتسي معس..
هديل\وش بلاكم..؟؟
سارة\أبد أنا أحب أتكلم تسذذذاااا أتذكر زوجي فديته..

بعد ماوصلوا البيت طلعت هديل لغرفة غادة ..
تضايقت من الفستان اللي اختارته لها غادة..
واستغربت غادة ردة فعلها..
غادة\والله روعة..ليه ماتبينه..؟؟
هديل برجفة\مايناسبني..مفسخ..
غادة باستغراب\هذا مفسخ..؟؟
هديل\إيه إذا لبسته بيظهر كتفي ونص ظهري عيب..
غادة\هديل أنتي من جد تتكلمين..؟؟
هديل\إيه ما ابيه..عطيني من عندك..
غادة\براحتك ياقلبي..تعالي شوفي وأختاري..

شافت فساتين روعة وتفاصيلها راقية كثير..
بس كانت تبتعد عن كل شيء يظهر الظهر أو الكتف..
في النهاية أختارت فستان أسود مستور ظهره وكتوفه..
فتحت الصدر واسعة طويل ومرسوم ع الجسم..
طلعت غادة وتركت هديل على راحتها بعد ما طمنتها ان راكان مو موجود في البيت..
بس هي ماكانت تحس بامان..صارت تشك حتى بالظل..
قفلت الباب بعد غادة وبدت تبدل ملابسها..
ناظرت في المرايه وشافت كتفها والآثر اللي عليه..
يعني لو لبست اللي جبتيه يا غادة كان بيبين لكم ظهري وكتفي..
ما اقدر أكسركم فيني ولا اكسر نفسي بزعلكم..

بدلت بسرعة متجاهلة الماضي وكل اللي صار..
مافي بالها الا تتفاعل مع سارة وغادة وتنبسط باللي يسوونه عشانها..
من حقها تنسى وتنبسط معهم..ومن حقهم يفرحون برجوعها..
رتبت شعرها ومكياجها باستخدام اغراض غادة..
سمت بالله وطلعت من الجناح وهي لابسة عبايتها...
تخاف من وجود راكان او سلمان او حتى عمها..
ماتبي تقابلهم..صعبة عليها..

نزلت واستقبلتها سارة عند الدرج..
اخذت العباية منها ودخلتها عند ياسمين..
سارة\هذي الوردة زوجت أخوي سلمان اسمها ياسمين..
ياسمين هذي هديل بنت عمي اللي قلت لك عنها..

حست بفرحة عظيمة وهي تشوف ياسمين..
راحت لها بسرعة وضمتها بشوووق..
ضحكت ياسمين بفرح وهي تضمها..
سارة بصدمة\تعرفون بعـــض..؟؟!
ياسمين وهديل\لا..ههههههههههه

طلعت سارة لما سمعت امها تناديها وهي تتوعد فيهم..
هديل\وحشـتيييييييني موووت..
كيفك وش مسوية بحياتك..؟؟
ياسمين\الحمدلله أنا بخير..وحياتي مرتاحة فيها كثير..
هديل\يعني مرتاحة مع سلمان..؟؟
ياسمين\ايه مرتاحة معه كثير..
هو يحبني ويحترمني من اول ما إجيت السعودية ماحسيت بغربة..
هديل\الحمدلله الله لا يغير عليكم..
ياسمين\أنتي إحكي عن حالك..؟؟
كيف قررتي ترجعي السعودية وأنتي كنتي رافضة ترجعي..؟؟
هديل تبتسم\عرفت الدنيا فانية وما باعيش غير مرة وحدة..
وبكذا قررت ارجع واقضيها مع اهلي..
ياسمين\فرحت كثير لما قالت لي صوفي إنك بترجعي ..
هديل\فديتها المنمشة وحشتني..
مشكوورة يا ياسمين لانك حفظتي السر..
ياسمين بغصة\سرك عذبني يا هديل..
تمنيت لو أقدر أقول لاهلك عنك وإنك عايشة مو ميته..
بس لما اتذكر حالك أحترم رغبتك واسكت..
ضمتها هديل بقوووة\الله لا يحرمني منك يا رووحي..
ياسمين حبيبتي ماله داعي احد يعرف إن انا وأنتي نعرف بعضنا..
ما ابي اسبب لك مشاكل..

ياسمين بهدوء\ما أحد بيعرف تطمني حبيبتي..
هديل\يالله ما بتحضرين الحفلة..؟؟
ياسمين\ما اقدر الحمل متعبني..
هديل\سلامتك يا قلبي..الله يبلغك فيه..
طمنيني ثبت الحمل..؟؟
ياسمين\الحمدلله ثبت وأنا كنت اعتقد إنه مستحيل..
هديل\الله يقومك لنا بالسلامة..
ياسمين\ربي يسمع منك..
يالله روحي لحفلتك وانبسطي..
هديل\انا ناوية أنبسط سندرلا الحفلة مثل ماتقول غادة..

طلعت من عند ياسمين..
وتوجهت لصالة البيت الكبيرة..
دخلت وفتحت عيونها ع الآخر لما سمعت صراخ البنات وشافت صديقاتها قدامها..
أول وحدة حضنتها كانت شهد اللي تبكي وتقبلها بشوق..
ضمت شهد بقوووة وهي تضحك على كلامها المعاتب لها والمشتاق..
شهد\وحشتيني ورب الكون وحشتيني مووووت..
هديل\والله ماهو قدي يا شهد..فدييييتك مشتاقة لك..
شهد بنحيب\انتظرتك كثيييير..ناديتك وترجيتك ترجعين..
حسيت بوحدة من بعدك..على كثر اللي حولي ما أحد عوضني عنك..
هديل بمحبة\هششششششش خلاص يا قلبي إهدي..
سامحيني على الغيبة ما اعيدها مرة ثانية..
شهد تمسح دموعها\فقدتك يا هديل..
هديل تبتسم\فداك الكووون يا روح هديل..

قربوا منها باقي صديقاتها سلموا عليها بتحفظ ..
وهي لاحظت هـ الشيء..
عذرتهم لانها راجعة من الموت..

رجعت لها شهد تضمها مرة ثانية..
بعدتهم سارة عن بعض وهي تذكرهم بشكل ساخر..
سارة\المكياج يا بنات والكحل بتصير خرايط..
شهد\كحلت عيني بشوفتها ما ابى كحل ثاني..
غادة\افا خبري بزوجها بس هو اللي يقول القصيد فيها..
وهي ترد عليه بالقصيد..
سارة\أشك إنهم جايين من ايطاليا..
يمكن جايين من البادية ولاعبين علينا..
غادة\اجل ذيب وذيبة..
سارة\ولا اشرب سم جعلك تموت..

هديل\هههههههههه ما اشرهـ عليكم..
أشره على أبوي وعمي يوم جابوكم لـ الدنيا..
سارة\قوووية يا أم الطماط قووية..

قضت سهرتها معهم ونست كل اللي مرت فيه..
وتناست مناسبت الحفلة انها عشانها..
أنبسطت مع البنات وقالت لشهد عن رغبتها بإكمال تعليمها..
وشهد والبنات كلهم شجعوها..
والبعض عاتبها ليش ماكملت دراستها هناك بالخارج..
وكان ردها لصعوبة المناهج وعدم قدرتها على الدراسة..


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


تدمرني وبغيابك تكسر خاطري تكسير
واحس العالم فــ بعدك ظلام يكسي اكوانه..

احبك حب لوتدري ويصير الـ ماحسبته يصير
واحبك حب بي ادري فؤادك ايش غير اوطانه..


نزل من سيارته وجلس في حديقة البيت..
تنهد بهدوء وخذاهـ التفكير لها..
أبتسم لأنه ما يشغل تفكيره غيرها طول الوقت..
اليوم تواجه مع اخوانها علي وهادي...
شاف رفضهم له بعيونهم..
بس مازادهـ رفضهم الا تمسك فيها..

بيصبر وبيسكت عن كل شيء..
بس عنها هي لا..
عاد على نفسه السؤال القديم اللي قاله لراجح..
أربعين سنة من عمرهـ ماحس فيها..؟؟
فعلاً يعتبر حياته من قبلها عقيمة وباردة..
حياته مابدت الا بوجودها..
يشفق على حالها وعلى صغرها..
بس هي تملكت قلبه..
غصب عنه صارت مثل الهواء و الماء..
مايتخيل حياته من دونها..
مايبى يرجع لإحساسه أيام مافقدها وأعتبرها ميته..
كان الظلام مسيطر عليه..
والدنيا كلها ماتسوى..
مشتااااق لها..لعيونها..
لكل شيء فيها..
حرمانه منها يقهرهـ ويزيد غضبه وعصبيته...
هو يعرف إن حبه أناني وبقوووة..
همس بشوق\أربعين سنة يا هديل..
توجيها بحبــــك...


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛