روايةأما غرام يشرح الصدر طاريه ولا صدووود وعمرنا ماعشقنا/15

ما انتظرت رد من هديل لانها تدري إنها مابترد عليها..
انحنت وشالت ذياب من حضن غادة..
أستئذنت منها إنها بتاخذهـ معها وبترجعه..

بعد ما ابتعدت عنهم بدأت سارة وغادة يحللون الوضع..
سارة\شفتي كيف بتأكلك بعيونها..
ولا كأنها شافتك من قبل في فستان وكاااشخة كذا..
غادة\ولا عبرتنا يا اختي..
سارة بحسرة\وين تشوفنا وأم الأحمر ماخذة الصدارة علينا..
ام علي\أذكروا الله..العين حق..
غادة\هديل إنتي لما كنتي عندهم ماغيرتي بشكلك..؟؟
يعني هذا الهاي لايت ماشافوك فيه من قبل..؟؟
هديل\لا..
سارة بقهر\هذي تبط الكبد..تكلمي معنا سولفي..

وقفت هديل وحركت شعرها بغرور..
هديل\هذي حفلة اخت زووجي..
لازم أقوم بالواجب..
غادة\وين..؟؟وش بتسوين..؟؟
هديل بخبث\أبي أرقص ..

طلعت بخطوات واثقة وهي تدري إن خبر رقصها بيوصل له..
كانت فاله شعرها اللي يوصل لنص ظهرها..
وحاطة مكياج أوفر..
فستان أحمر قاني مرسوم على جسمها ..
ماسك من على صدرها..
بوجود كرستالة متوسطة تحت الصدر..
بدأت ترقص وهي معمية عيونها عن كل اللي يناظرونها..
ويهمسون هذي زوجت غـــازي ..
ركزت عيونها على رشا اللي كانت تكلم في الجوال وتراقبها..
كانت متأكدة من إنها تكلمه هو ..
صدت عنها ولا درت بالامر اللي أصدرهـ غازي ..



إلى الملتقى بإذن الله تعالى فجر الخميس ...


كونوا بخيـــــــــــــــــــر ...


صدووود’’’



ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ

لا احلل مسح اسمي من على الرواية ..
تجميعي : ♫ معزوفة حنين ♫..

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ




السلام عليكم ورحمة الله وبركاته ...

صبـــــــــــــاح \\
الرضى من رب العالمين..

كيـــــــفكم الــ ليلاااااااااااااااااس ..؟؟
أحبتــــــــــــــي في كل مكاااان ..؟؟


هذا البارت الهدية مثل ماوعدتكم ..
وهو إهداء لــ الجميــــــــع ..
ولــ غاليتي طيف الأحباب ...

همسة\\
أستئذن منكم أحبتـــــي ..
راح أغيب عنكم كم يوم لوصول ضيوف غالين على قلبي..
بــ التأكيد راح أنشغل معهم..
وبكذا ما أوعدكم على فجر السبت ..


البارت الرابع والسبعــــون ..


وفيم أتيتِ؟ ما تبغين عندي؟

وفيم أتيتِ؟ ما تبغين عندي؟
وهل عندي سوى حلمٍ صريعٍ؟

وهل عندي سوى عمرٍ تعاني
بقاياهُ.. بمِقصلة الصقيع؟

وماذا تصنعين بموتِ شمسٍ
هوتْ في الغرب.. يا وَهَج الطلوعِ؟

فيا أفياءُ! حين أغيب قولي:
مَضى في موكب الليل الوديعِ

وكان كشمعةٍ.. أعطت..
وأعطت إلى أن ضمّه قدر الشموعِ ..

المرحوم بإذن الله تعالى ..غازي القصيبي ..


بدت ترقص وهي معمية عيونها عن كل اللي يناظرونها..
ويهمسون هذي زوجت غـــازي ..
ركزت عيونها على رشا اللي كانت تكلم في الجوال وتراقبها..
كانت متأكدة من إنها تكلمه هو ..
صدت عنها ولا درت بالامر اللي أصدرهـ غازي..

أنتهت الأغنية وهي تتمايل مع أنغامها..
رغم غرابة الموقف..
ورقصها لوحدها من دون شريكة لها..
إلا إن هذا كان مرحب فيه من قبل جميع الحاضرين..
حبوا تكون الساحة لها ولرقصها الرائع..

بعد ما انتهت الأغنية رجعت بخطوات ثقيلة لطاولة عائلتها..
سارة بإعجاب\تنكس يا احمــــــــــر..
غادة تبتسم\بسم الله عليك جريئة رقصتي لوحدك..
سارة\هديل أنتي كنتي ترقصين في إيطاليا..؟؟
غادة\انا متأكدة إنها كانت ترقص على طول..
ولا ليش إلى الحين ترقص أحسن مني ومنك..
ام علي بعصبية\ومن شر حاسد إذا حسد..
إذكري ربك أنتي وهي وصلوا على النبي..
تبون تحرولونها قبل ترجع البيت..
سارة\ياليل التكفخ..خالتي الله يسعدك..
كل شوي تجرحينا وتقولين لا تنظلون بنتي..
ليه حرمة اخوي ماهي بنتك..؟؟
ولا تفضلين الإيطالية على حرمة اخوي..؟؟
غادة\انتي لا تحاولين تنشرين الفتنة بين الأم وبناتها..
روحي لاخوك أبو المشاكل الموووذي..
سارة\جزاتي أسعى في خيرك يالمتوحمة..
ام علي\خلاص إسكتوا العرب بينتبهون عليكم..

قربت منهم حرمة بعمر أمها..
سلمت على أم علي والبنات..
وكانت مركزة نظراتها على هديل..
تعرفت عليهم وسألت عن هديل..
الحرمة\بسم الله ماشاء الله..حبيت اسأل إذا كانت بنتكم مرتبطة..؟؟
ردت على الحرمة قبل لا ترد أمها..
هديل بجمود\أنا مطلـــقة..

أبتسمت بسخرية لما تغيرت نظرات الحرمة..
من الإعجاب لـ الصدمة وبعدها لـ التوتر.. ثم الإنسحاب..
سارة بحدة\خييير وش طرالك تفاولين على عمرك..
ام علي بزعل\يابنتي ما أنتي ناقصة كلام حتى تطلعين على نفسك إشاعة..
هديل ببرود\وش الغلط اللي قلته..؟؟
مطلقة وأهون علي من إني أكون متزوجة..
غادة بصدمة\يعني مابترجعين له..؟؟
هديل\لا..
سارة بقهر\وقوطي الطماط وش بتسوين فيه..؟؟
هديل\ذياب لي..وبأروح أخذهـ منهم..
كفاية الدم اللي بعروقه منسوب لهم..

صدت عن أمها وغادة وسارة اللي ألتزموا الصمت بعد ماناظرتهم أم علي بتهديد..
وكانوا متأكدين لو كانت الجدة حضرت معهم..
كان كسرت الدنيا على راس هديل وراس الحرمة اللي تسأل عنها..

أبتعدت عنهم وتوجهت لام غازي ..
اللي كانت واقفة مع ناس من جماعتهم..
سألتها عن ذياب..
ولما الحريم سألوا ام غازي من تكون هديل..
جاوبتهم إنها زوجة غازي ولدها..
ردت على الحريم بإبتسامة باردة..
وابتعدت عنهم..
أستئذنت ام غازي منهم وقربت من هديل الي باين إنها متضايقة منهم..
هديل\وين ذياب..؟؟
ام غازي\وش فيك..احد زعلك؟؟
هديل\مابه احد يستاهل يزعلني..
أريد ذياب..
ام غازي بهدوء\مع شوق..رشا توديك لهم..
هديل بحدة\اتمنى ماتعرفين أحد علي باسم حرمة ولدك..
لانه وبكل صراحة ما اتشرف بحمل هذا الاسم..

صدت عنها من غير ماتحس بندم على كلامها..
إزعلوا..إكتوا باللي كويتوني فيه..
كلاااام ..بنظركم كان بس كلام..
بس كان مثل السيوووف تقطعني..

قربت من رشا نزلت اللي بيدها وحاولت قد ماتقدر ماتبينه لهديل..
تجاهلت هديل حركتها ولا أعتبرت لسلامها..
هديل\ذياب وينه..؟؟
رشا بإرتباك\اممم ممــ.... مع شوق فوق..
هديل\روحي جيبيه لو سمحتي..
رشا\طيب تعالي معي..
هديل بحذر\بانتظرك هنا..
رشا\راح أتأخر عليك..
هديل\عادي المهم ذياب يجيني..
رشا بمحاولة اخيرة\هديل أنا تعبانة..
فيني نوم قهري..وأخاف أشيل ذياب ويطيح مني..
هديل بجمود\ما اريد ولدي يتعاقب بعقاب غيرهـ ..

سكتت رشا وماردت عليها..
وحمدت الله إن هديل إكتفت بهذا الكلام..
كانت خايفة تسمع ملامة اكبر او تشمت في حالها..
مشت وهديل جنبها..
دخلوا الأصنصير وتم الصمت هو اللغة بينهم..
طلعوا منه ومشت هديل جنبها بخطوات بطيئة وبعدها وقفت..
ألتفت عليها رشا بإستفهام..

هديل\أستناك هنا..
رشا\هذي غرفة شوق هنا..
هديل\مالي خاطر أشوفها وأنغث..
ممكن تجيبين ذياب..؟؟
رشا بقهر\براحتك..بس لو تدخلين بهذي الغرفة يكون احسن..
لان طالب موجود ويمكن يطلع من غرفته ويشوفك..

حست برجفة قوية لما سمعت اسم طالب..
توجهت لـ الغرفة اللي أشرت عليها رشا..
قفلت الباب وراها وهي تفكر ليش طالب موجود في البيت..
حاولت بقد ماتقدر تسحب نفسها من التفكير في الماضي..
وفي اللي سوته شوق وطالب فيها..
لازالت الآثار محفوورة بجسمها وذاكرتها..
مستحيل تنسى إنه ضربها بالسوط بسببهم..

رفعت راسها وناظرت في جدار من مرايا..
مشت بخطوات الثقة المقهورة..
وقفت تناظر نفسها بنظرات جامدة خالية من اي تعبير..
كلهم انعجبوا بشكلها..
بس مايدرون كيف تشوف نفسها مشوهة..

بس مايدرون كيف تشوف نفسها مشوهة..
تسألت بآسى مايشوفون إنكسارها..
مايسمعون شهقاتها وأنينها..؟؟

مالاحظوا مدينة من سراب عايشة بعيوني..
مايسمعون أنين اليتامى داخل ضلوعي..
آثار الحروووب على جسمي وأفعالي..

ألتفتت وررفعت شعرها من على كتفها المجروح..
حطت كفها على الآثر ومررت اصابعها عليه..
حست بنار تشتعل بظهرها..
وكان السوط من ثواني ضربها ماهو من سنين..
كيف يطلبون مني أنسى وأتنازل..؟؟
وكل مارفت عيني شفت ذلي وإهانتي..

بالجهة الثانية من المرايه..
كان واقف مبهووور بجمالها وروعتها..
وصفت له رشا انثى بس ماقالت له حوور..
يشوفها تقرب من المرايه وتناظر نفسها بفخر..
تستعرض روعتها بفستانها الحالم..
وجسمها مرسوووم بفتنة لكل عين..
وجها مايمد لطفلته بأي صلة..
اللي قدامه انثـــــى مذهلة..
مابقى لـ الطفولة اللي أستوطنها آثر..
مايلومها على تأملها لنفسها..
أتسعت إبتسامته اكثر لما رفعت شعرها تبين ظهرها وكتوفها..
حط يدهـ على مفتاح الباب ..
مشتاق يحضنها يقبلها..
يكسر كل حواجز بنتها على حالها..
ومقرر يحبسها بجناحه..
بما إنها جاته بأرجولها فمستحيل يتركها تروح..

بس تجمدت يدهـ..
أختنقت انفاااسه..
لما هزته بحركة ضعييفة كسيرة منها..
أكتشف مدى هشاشة مقومتها..
ولاي مدى وصلت جرووحه بقلبها..
حركة بريئة تقصد منها مداواة جروحها..
هزته بعنننف..حس إن كل كيانه وكل مخططاته..
تبعثرت تشتت بحركة وحدة منها..

شافها تقبل أصابعها وتحطها على الجرح اللي بكتفها..
هل هذي تعزية لنفسها..؟؟
مواساة لروحها المصدوومة..

حزت بخااطرهـ دموعها المتحجرة بعيونها..
رجفة شفايفها معرووفة له..
كانت لما تعاندهـ وتقاومه ترتجف شفايفها..
لانها تمنع نفسها لاتبكي عندهـ..

رفعت راسها لفوق تمنع دموعها لا تخونها..
حطت يدها على صدرها وهي تتنفس..
سمع آآآآهـ تطلع منها بالغصب..

هتفت رووحه بيأس..
إلى اي درك رميتها يا جلموود ..؟؟

لا ياهوى القلـب المعّنـا ورجـواه
لاتتركيـن احـداً يحّـس بوجعنـا
ماظني احـداً يحمـل اللـي حملنـاه
حنـا خلقنـا والمعـانـاه معـنـا
الهـم بادرنـا وحـنـا كتمـنـاه
والوقـت شتتنـا بعـد ماجمعـنـا
والصبـر حنـا فالغـرام ابتدعنـاه
لكـن حسافـه صبرنـا مانفعـنـا
مـا مـر يـوم ببعدنـا مابكينـاه
ومن ضيقنا كن الوطـن ماوسعنـا
لامن ذكرنا وقتنـا اللـي قضينـاه
صحنا بعالي الصوت محـدن سمعنـا
للوصل دربٍ مـن عنانـا مشينـاه

وفآخره لـدروب المفـارق رجعنـا
يومن جزعنـا مـن ثقيـل المعانـاه
محدن درى في حالنـا لـو جزعنـا
ارواحنـا تلقـى بعـض فالمناجـاه
نبحر واذا جانا العنا نقـول : دعنـا
مـا واحـداً منـا تنّكـر لمـبـداه
في إحساسنا ماقد شرينا وبعنا
لو غيرنا زلّـت بـه اقدامـه وتـاه
واهداف عمره كلها دون معنـى
حنا عرفنا الوقـت فأولـه واتـلاه
لوينخدع به غيرنا .. مـا انخدعنـا
ويانـور عينـي بادلينـي المواسـاه
يكفـي تـرا ممـا دهانـا شبعنـا
ارجوك كفي دمعتك واكتمي الآآآآآه
لاتتركيـن احـداً يحـس بوجعنـا..

صدت عن المرآيه وهي تسترجع ثقتها اللي أنهزت بثواني..
قررت ترجع عند امها ومصير ذياب يرجع لها..
قبل لا تفتح الباب قرأت المعوذات علها تهدي قلبها..
طلعت من الغرفة ومادرت بوجود غازي معها بنفس المكان..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛

قفل طالب جواله وهو يسب رشا..
طالب\لو نامت وريحتنا من حضورها كان ابرك..
راجح بعصبية\أنت ما تحس على دمك..
والله إن قلت لها شيء يزعلها ماتشوف حرمتك الا بعد شهر..
طالب\لا ياشيخ ليه معصب أنت..
المفرووض انا اللي أعصب..
زوجتي صايبتها حمى الترزز قدام الحريم بفستان وطرحة..
وزوجتك كل ما اكلمها تقول وش تبي..مو فاضين لك..
انا رجالن مطنووخ..وزوجتي باسحبها من كرشها..
راجح\أنت اللي وافقتها على الفستان لا تنكر..
وبعدين وش عندك تتصل عليهم وش تبي فيهم..؟؟
طالب يبتسم\أبي أنزف مع حرمتي..
راجح\ههههههههه ما أنت بصاحي..

أستوى طالب في جلسته وعدل شماغه..
ومد يدينه قدام راجح وصار يحركهم يمين يسار..
راجح\سكنهم مساكنهم وش بلاك..؟؟
طالب بنص عين\لاااحظ شيء غريب في يدي..
راجح\زايدة صبع ولا ناقصة..؟؟
طالب\اوووف منك لاحظ إني لابس ازرار في الكم..
وهذي أول مرة أسويها..طبعاً لاني عريس..
راجح\يوووهـ ههههههههه ع البركة..
حاجز في فندق الليلة..؟؟
طالب\لا وش هو له التبذير..
راجح\ياقوة عينك بتقضي ليلة عرسك في بيت حرمتك..
طالب\وش عندك ترى جدي سواها وانا أقتدي به..
راجح\هههههههه لا والله حالتك صعبة..
طالب\شفت اخوي خلاني في اشد لحظاتي حاجة له..
من بيلبسني البشت ويزفني لعصقووول..؟؟
راجح\ليه ماعندك خبر ان غازي بيزف شوق..
وانت انتظرها برا..
طالب بصدمة\احلف انك صادق..
راجح مبسوط\والله اني صادق..
طالب\يزف اخته ولا يزف اخوووهـ..؟؟
اطب عليهم يعني اطب عليهم ولا شافوني يتيم ياكلون حقي..
راجح بسخرية\أنت ينوكل حقك..؟؟
طالب\الخاينين ماقالوا لي..
طيب يا عصقووول تزفين اخوك ولا تزفيني..
يارب يطيح وتخرب الزفة عليكم..
راجح\هههههههههه طيب ليه ماتقول تطيح هي..؟؟
طالب\لاتظن إني مادعيت عليها عشان وجها..
بس عشان اللي في بطنها..
يالبيه لو يطيح غازي ويتفشل قدام الحريم..
مرة ثانية ما يكشت في اخووهـ وينزف مكانه..

أتصل طالب على غازي وهاوشه..
بس غازي قفل منه وهو يهددهـ إما يعقل أو مايأخذ حرمته..
ضحك عليهم راجح وقضى باقي الوقت مع طالب..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛

تدري وش اللي بـ هالدنيآ يضآيقني؟؟
إنك على طول تنسآني مع أحبآبك..

أنا غيآبك ورب البيت يخنقني..
بس إنت قلي بغيابي كيفهآ أعصآبك؟؟!

لبست عبايتها ولمت طرحتها على راسها بإهمال..
وحالها حال الموجودين وجهت عيونها ناحية الدرج..
رغم إن في قلبها زعل على اللي سوته مع شوق..
ماتحب تكسر فرحت أحد ولا تجرح احد..
هم أستفزوها رشا وشوق كانوا يظنون أنهم ممكن يصلحون الوضع.

بس لما عرضت كتفها قدام شوق بسخرية..
ووعدتها ماتنسى إن شوق وطالب هم السبب في الآُثر..
أنخرست شوق وادركت إن الصلح بينهم مستحيييل..
ونطقتها..الصافع ينسى..والمصفوع ماينسى..

كانت تنتظر تشوف وجه شوق كيف بعد المواجهة اللي صارت بينهم..
وانصدمت لما شافت غازي ينزل الدرج جنبها..
ماسك يدها ويزفها..
يحاوطها بإهتمامه ورعايته..
يبتسم لها وهي ترد الإبتسامة بفرح..
حست بقلبها ينقبض بقسووووة..
والدموع تتجمع بعيونها بحرقة..
ظلم جائر حست فيه يسيطر عليها..
حاولت تكتم كل فكرة حزينة تحاول توجعها..

وصلها لـكوشتها الصغيرة الانيقة..
جلسها على مقعدها بحنية بعد ماقبلها على جبينها..
كانت تراقب كل حركة يسويها..
يزفها وهي تدري إنها متزوجة..
يراعيها لانها حامل..
طيب أنا ليه مازفني مثلها..؟؟
ليه ما اهتم فيني وانا حامل..؟؟
ليه عذبني وقهرني سنييين..
ليه هو طيب معها ومعي قاسي..؟؟

رشا وأمه كانوا واقفين جنبه..
شافته يأخذ ذياب من يدين رشا..
سلم عليه وهو يضحك له..
وبعدها ضمه له بقوووة..
حست بكل قهرها ممكن ينفجر بلحظة..
عضت على شفايفها بقوووة وهي تحس بطعم الدم..

وزاد عليها تعليق سارة وغادة..
وكانهم يحاولون يثيرون غيرتها..
او يستفزونها ترد عليهم..
ويضحكون لما يقولون ماتبي ترمش بعيونها من عليه..
وتقووول ماتحبه..

كانت بتصرخ..
ورب الكووون ما أحبــــه..
بس اكتفت بكلمة وحدة..
هديل بغصة\غادة روحي جيبي ولدي..
غادة\من جد تتكلمين..؟؟
هديل\روحي جيبيه..
غادة\يا قلبي تخيلي شكلي أروح لزوجك وأقول عطني ولد أختي..
عيب أروح له..أنتي يومه روحي..
أم علي بحنية\خليه مع ابوهـ شوي يا هديل..بترجعه لنا ام غازي..

ليييه ماتحسووون..؟؟
كل اللي قدامكم مجرميين..
عذبوووني يومه وقهروني..
صعبة علي اشوف ولدي واقف معهم وانا لحالي..
ظلم يومه والله ظلم..

وقفت وتلثمت بطرحتها..
سارة\هدوول وين..؟؟
هديل\يالله مشينا..أتصلوا على احد يجينا..
سارة\باتصل على راكان..
غادة بقهر\لا والف لا..
رويكن ما اركب معه..شوفي غيرهـ..

بعدت عنهم هديل بعد ما استعجلتهم..
كانت تتمنى لو يعطي ذياب لرشا..
بيكون اهون عليها تاخذه من رشا ولا منه..
طلعت الدرجتين ووقفت قدامهم..
أم غازي ورشا استنكروا وجود حرمة معهم على الكوشة..
وخصوصاً في وجود غازي..
بس هو ما استنكر وجودها لانه عرفها من عيونها..
وشاف فيها الحسرة اللي لو أخفتها عن الكل عنه هو ماتقدر تخفيها..
يدري إن كل اللي يصير يقهرها..
وحضورها اليوم بس عشان تزيد في قهر حالها..
من اول ما تعرف عليها..
وعندها طريقة غريبة في عقاب نفسها..
أي شيء يقهرها ويوجعها تسويه..
شغل جواله ومدهـ لرشا بسرعة..
أخذته منه ونزلت لمشغلت الدي جيه..
قربت منه هديل ومدت يدها بصمت..
قبل ذياب على خدهـ مرتين..
غازي\وحدة لك ووحدة لروحي..

مد لها ذياب اللي تعلق برقبة ابوهـ وصد عن هديل..
طمنت نفسها..
طفل مجرد حركات طفولية..
شدت يدينها عليه وهو فك يدين ذياب وقبلها..
قبل لاتصد عنه وقدام كل الحضور..
ضمها مع ذياب لحضنه وطبع قبلة على راسها..
هتفوا البنات اللي كانوا موجودين بصراخ وتصفير..
احتقرته وأحتقرت كل الموجودين..
أبتعدت عنه وتمنى لو بضمته لها مسح شوي من الوجع اللي بعيونها..

نزلت وهي ضامة ذياب..
وتجمدت بمكانها لما سمعت القصيدة..

ياهيه [التفت] لي واسمع [دعاي] لك يا هيه
ترى [عادك] بتشبع من [البعد] وتواجه

دعيتك [بصوتاً] ياصلك [ليه] ما توحيه
وأنا اسمع [ضلوعك] من صدأ [الصوت] لجاجه

عليك [الفؤاد] أخلاجه [مصمخاً] راعيه
خاف [الله] في راعية ما [تسمع] خلاجه

ترى [العفو] قد جاك اوله [واغتنم] تاليه
وترى [الحلم] بحراً غير لا [تامن] امواجه

وترى [الود] ليلٍ [مظلماً] جيت لك سارية
سراجه [وصالك] والجفا [ينفخ] سراجه

وترى [قصرنا] الي كم سنه [نجمع] ونبنيه
هوى [العدل] طيح بابه [العود] وسياجه

لي ايام [مدري] وين [دارك] ولا ادري ليه
وانا [خابر] اني باب [شفك] ومزلاجه

غياباً بلا [سبه] هجاداً بلا [تنبيه]
وجفا اغلا [العرب] ناراً على [الكبد] وهاجه

مشت متجاهلة القصيدة بكلماتها ومعانيها..
تدري إنها منه هو..ويقصدها فيها..
زفرت بتعب ياليت لو يرد عليك شاعرها..
بقصيدة تكبل رجولتك وتعرفك قدرك..

طلعت من البيت من دون ماتلتفت عليه..
وجلست بالحديقة وأنضمت لها امها واخواتها..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

بعد خروج أكثر المعازيم..
دخل طالب بعد ماهاوش رشا ومنعها لا تزفه..
وهي غصب تمسكت فيه ودخلته لهم..
سلم على شوق وجلس جنبها وهو مفتح عيونه ع الآخر..
رشا\هههههههه لاعب دوورهـ ع الأخير..
طالب\اص يعنني توني اشوفها..
رشا\أجل مبرووك عليك..
طالب\ليه ماخليتوني أزفها..؟؟
وش معنى اخوي يزفها ماتدرين إنه عيب يزفك أخو زوجك..
شوق تبتسم\اخوي قبل يصير أخوك..
طالب\شوق كملي تمثيل يعننك مستحية لا تردين علي..
شوق\ههههههه طيب..
رشا\والله إنكم فلللة..

كان جالس على نفس المقعد اللي كانت جالسة عليه..
وامه جالسة جنبه وتعاتبه على اللي سواهـ..
ام غازي\ماكان المفروض تحرجها باللي سويته..
غازي بهدوء\لو باقي ماراحت..ماكنت بأخليها تطلع من البيت..
ام غازي تتنهد\ياولدي خاف ربك في البنت..
ترى اللي سويته فيها ماهو شوي..
خلها تعز نفسها بعد ماذليتها..
إن كانت تبى ترجع لك فخلها ترجع وهي راضية..
وإذا تبي فراقك خل لك عندها شيء طيب تذكرك فيه..
غازي\مابه إلا فراق واحد بأسمح لها فيه..
وهو الموت..بس غيرهـ ما تعرف..

وقف وطلع من البيت توجه لسيارته..
والتفت على صوتها اللي يعرفها من بين مليون..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ركبوا السيارة وامها خذت ذياب اللي نام وسدحته بحضنها..
جلست ورى راكان وغادة جنبها بينما سارة جلست قدام..
ام علي\كيفك ياسلمان..؟؟
سلمان يبتسم\الحمدلله طيب..كيفك ياخالة..
وأنتوا يابنات عساكم بخير..

هديل بقوة\وقف..
من حدت صوتها أنرعب ووقف السيارة بسرعة..
ألتفت عليهم يشوف وش صاير..

حست بنار تشب بقلبها..
هذا هو مجرم مثلهم..

هو وهادي بنفس المنزلة..
تشوف وجهه قدامها وتحس وكأنه أبشع إنسان ممكن تشوفه..
سلمان بحدة\وش فيك..؟؟
هديل بكرهـ\أمووت الف مرة..
ولا اقبل منهو مثلك يوصلني يامجرم..

أنصدم من كلامها له..
أول مرة يقابلها..من بعد هربه..
ومن بعد موتها ورجوعها من الغربة..
اول مرة يقابلها وهو يدري إنها راحت لغازي عشانه وعشان هادي..
بس ماكان يدري إنها حاقدة عليه وكارهته كذا..
كلامها احرق قلبه عليها ومنها..

وقبل لا يرد عليها فتحت الباب ونزلت..
نزل من السيارة وهو معصب..
ومشى وراها..
وقف قدامها وتكلم وهو يحاول يكتم عصبيته..
سلمان\إرجعي السيارة..
هديل بحقد\هربهم قطر..ترى قتلوا عشرة داخل البيت..
سلمان بغضب\إبلعي لسانك وإرجعي السيارة..
هديل بتمرد\ما بأرجع..
سلمان\لاتخلينا فرجة لـ الناس..
إرجعي السيارة ومالك الا اللي يرضيك..
هديل بحدة\إنت ما تفهم..ولا الغباء لازال مستحكم فيك من سنين..
سلمان بحدة أكبر\أقسم بالله لو طولتي لسانك اكثر ماتمسين سالمة..
هديل بقهر\وش بتسوي..؟؟
بتقتلني وتهرب مثل الأولة..
سلمان يتنهد\يابنت الحلال أنا مثل أخوك..وأنــ........
هديل\إيه أنت مثل هادي..ما اقصد منزلة الأخوة..
لا منزلة الجبن والنذالة..جبناء ..

مد يدهـ ومسكها من ذراعها بقوة..
وحاول يرجعها السيارة..
ضربته على ظهرهـ وابتعدت عنه..
هديل بكرهـ\أنقصت يمينك يالجاني يا الظالم..
سلمان بحقد\بس فضحتينا..
ولا كأن إحنا اهل..
هديل\ما اتشرف تكون من هلي..

صدت عنه ومشت ع الرصيف..
وكلامها تعدى مرحلة الصدمة عندهـ..
ووصل لمرحلة الإنتقام منها..
غلطت عليه وهو رجال مايرضى على نفسه..
مستحيل هذي تكون هديل اللي أعرفها من صغرها..
السحاوية الخجوولة..هذي مو هديل هذي وحوش..

وقف بوجها\نسيتي تربيتك يابنت عمي..
أنا اعلمك الادب اللي جهلتيه..
ضربها كف على وجها وسحبها معه غصب عنها..
وقبل لا يوصل لسيارته..
أنسحبت هديل من يدهـ ..
ألتفت على وراهـ وبسرعة إلتفاته..
وصلته ضربه قوية على وجهه..
وتلتها ضربات غااااضبة على بطنه وظهرهـ..
وكان ردهـ على صاحب الضربات بنفس الغيض ولاقهر..

أبتعدت عنهم ووقفت تناظرهم يتضاربون بقوة..
تسمعه يسبه ويشتمه ليه يضربها وبأي حق..
تبسمت على حالهم بسخرية..
وأما والبنات كانوا يصارخون في السيارة..
كانت ام علي بتطلع من السيارة وتروح لهم..
بس راجح وصل لهم وابعدهم عن بعض..
وجاته كم ضربه من الاثنين..

غازي بحقد\إن سولت لك نفسك ترفع يدك عليها ذبحتك..
سلمان بغضب\تخسي وتعقب..
غازي\أقسم بالله العظيم..لوتطلب روحك لاطلعها منك ألحين..
راجح\بسسس صلوا على النبي..
وش بيقولون الناس عنكم وعنها..

أبتعد غازي عن راجح وراح لها..
لم يدهـ على كتوفها وسحبها له..
سلمان بغيض\تدرين تستاهلين تروحين بالرخيص..

دفها عنه ورجع لسلمان..
وهذي المرة ماتدخل راجح وتركهم يتضاربون..
لحتى وصل راكان اللي أتصلت عليه سارة..
وماقدر يوقف غازي عن جنونه الا بضربه..
راكان\بس يامجنون..
غازي\هذا الرخمة تاخذهـ وتقلعه..
ولا والله العظيم لأسلبه رووحه..

أبعد راكان عنه بالقوة..
وناظرها بقهر لما سمع سؤال راكان لها..
راكان\يالله يا هديل..
هديل بجمود\ما ارجع معكم..
راكان\لازم ترجعين..
هديل\لا..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛

قدام جناحهم في الفندق ..
وقبل لا تدخل شوق وقفها..
طالب\خوووشي برجلك اليمين ياعروووصة..
أبتسمت على كلامه ودخلت مثل ماقال..
فسخت عبايتها وجلست جنبه..
طالب بشهقة\هئئئئئ قومي أشوووف قووومي..
وقفت بسرعة ووقف جنبها..
طالب بصدمة\وش ذا..؟؟
شوق شكت بنفسها\وشهو..؟؟
طالب\انتي حااامل..؟؟غشيتوني..؟؟
من مييين حامل ياللي ماتستحين..؟؟

ضربته على صدرهـ وراحت لغرفة النوم..
مسكها وهو يضحك بقوووة..
شوق\إبعد لا أحووسك..لا تلمسني..
طالب\أفا فيه عرووصة تقول لزوجها لا تلمسني..؟؟
وبعدين انتي قلتي نمثل إنها اول ليلة لنا..
يعني ضروري أنفجع إنك حااامل ولا مايزبط التمثيل..
شوق\امحق عروووسة كل شيء تخربوونه..
وخر عني ما احبك..
طالب\معليه توها اول ليلة..بتتعودين علي وتحبيني..
وين تحبين تقضين شهر العسل.؟؟
هو كذا يقولون في ليلتهم الأولى.؟؟
شوق تضحك\ههههههههه والله مدري..
طالب\لا اذكر واحد من اصحابي يقول..
طلبوا العشاء أول..
ويقول لحرمته كلي..وهي مستحية ماتأكل..
ياحرمة كلي لا تستحين..بس مانفع مستحية ما كلت..
عاد هو قال رحت الغرفة اجيب هديتها..
رجعت إلا الحرمة تطفح الأكل طفح..
وأنا وقفت اراقبها وهي ماتدري وصورها بعد..
شوق بقهر\النحييييييس صورها بيستفزها..
وبعدين ليه يقول لكم ما يستحي..؟
طالب\حتى انا هاوشته قلت عيب عليك إستح على وجهك..
شوق بنص عين\تصدق كنت بأصدقك..
طالب\هههههههه فديييت اللي فاهمتني..
والله محلووة يا عصقووول..
تعالي أقولك القصيدة اللي كتبتها في غيابك..
شوق\وانا كتبت فيك ملحمة..
طالب\انا الرجال..والرجال هو اللي يقول الشعر ويتغزل في حرمته..
والحرمة تسكت ولا تقول حرف..لا تتغزل فيه ولا تُعجب فيه..
شوق\ياساتر وين يصير هذا الشيء..
طالب\أسكتي واسمعي القصيدة..
وسلامتكم..
شوق\وين القصيدة..؟؟
طالب\قولي صح لسانك..
شوق\صح بدنك..
قبلها وهو يتشرهـ على تغليها عليه..
ابتعدت عنه بالقوووة وهو يهددها..
وراحت تبدل ملابسها..
دخلت دورة المياهـ وقفلت الباب وراها..
تحممت بذهن غائب..
ولبست ملابسها..
جلست على الكرسي وتفكيرها كله في هديل..

تمنت لو انها ماخرجت من غرفتها ولا قابلتها..
كان المفروض تدرك من زمااان إن اللي بينها وبين هديل أكبر من المسامحة..
مثل ماقالت تصفية حساب..
هديل بجمود\أنتي بتنسين يا شوق..
وأنا ماراح انسى..لاكلامك ولا هذا..
أدرت ظهرها لها ورفعت شعرها..
شوق\لا هذا مو مني..انا ماضربتك لا تظلميني..
هديل بسخرية\مين اللي تبلى علي..؟؟
مين اللي قال إني ناوية اهرب مع طالب..؟؟
ضربي بالسوط كان بسبايب من..؟؟
بسببك انتي..وغن نسيتي ذكرتك..
رشا\ياهديل يا حبيبتي..الماضي جرحنا كلنا..
خلينا ننساهـ وندفنه..
هديل بصد\عاجبني الجفاء..
يرضيني لما اصد عنكم ولا كأنكم موجودين..

فزت على صوت طالب يدق عليها الباب..
طالب\شوق حبيبتي فيك شيء..؟؟
شوق\لا..الحين طالعة..

وقفت وغسلت وجها ماتبي يبين عليها أثر البكاء قدام طالب..
طلعت من الحمام وهي تتحاشى النظر فيه..
لم يدينه حوالينها وضمها له بحنية..
غصب عنها بكت في حضنه وهي ترتجف..
طالب بصدمة\شوق بسم الله عليك..وش فيك حبيبي..؟؟
شوق\......... تعبانة شوي..

جلسها على السرير وشربها مويا..
طالب\وش اللي متعبك..
تبين أخذك المستشفى..؟؟
شوق\لا مو لازم مستشفى أنا بخير..
طالب\شكلك ماهو عاجبني..
من اللي زعلك..؟؟
شوق\أنا..مزعلة حالي من سنيييين..
طالب بهدوء\وش اللي صار وخلاك تتضايقين كذا..؟؟
شوق\أنا أنانية..لان حياتي استقرت ومبسوطة فيها..
أريد كل شيء يصير مثل ما احب..
أبي الناس ينسون المآسي ويعيشون مرتاحين..
مآسي أنا سببتها لهم..وأذيتهم كثير..
مافكرت فيهم كيف بيعيشون حياتهم..
وانا كنت سبب رئيسي في ضياعهم..
طالب\لا تفكرين بهذا الشكل..
الله قدر وكتب لكل إنسان قسمته ونصيبه..
ولو كنتي صديقة وفية لها اللي صار معها كان بيصير..
بك أو بدوونك..لانه نصيبها..

لمت يدينها على رقبته وضمته لها بقوووة..
أنا وإياك السبب في ضربها..
آآآهـ يارب أشفها من ماضيها..


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


مسك يدها ودخلها بيته..
بعد ماطلبوها ترجع ومارضت..
مابيسمح لهم يتطاولون عليها وحتى لو كانوا عيال عمها..
وصلت فيهم يضربونها ويهينونها بالكلام..
وقفت بالحديقة وسحبت يدها منه..

غازي\أنا ارجعك بيتكم..
هديل\ما ابي أرجع بيتنا..
غازي بهدوء\تظلين معي..؟؟
هديل\وما ابي أظل معك..
غازي\اجل وش تبين..؟؟
هديل\علـــي أخوي..
غازي يتنهد\طيب أتصل عليه وأقوله يجي..
تعالي داخل..
هديل بصد\بانتظرهـ هنا..

مسك يدها ومشاها معه..
دخلها البيت وأخذها لــ مجلس الرجال..
وقف عند المغاسل القريبة من المجلس..
رمى شماغه وغسل وجهه ورقبته..
وبعدها نسف شماغه وعدله..

وهي صدت عنه ودخلت المجلس..
جلست ولازالت متلثمة بطرحتها..
"تستاهلين تروحين بالرخيص"
هذي جزاتي يا سلمان..؟؟
أستاهل اروح بالرخيص..
والله ماهمك اموت ولا أعيش..
اللي يهمكم جاهة تجي تطلبني منكم أرجع لزوجي..
وبعدها لو يقطعني ما همكم..
تستقوي علي وتطعني قدامه بالحقران..
بس معك حق..
أنا استاهل اروح بالرخيص وبالتراب بعد..
لاني فديتك وفديت شبيهك..
لو أنقصت رقابكم ماشكيت اليوم وبكيت..
لو انقصت رقبتك ما سمعتك تهيني..
ولا انمدت يدك علي وضربتني..
خسارة فيك هديل يوم فدتك..
وخسارة فيك ياسمين..

وقفت بسرعة وضربته تبعدهـ عنها..
بعد ماسحب طرحتها من عليها..
قرب منها وهي تبعد عنه..
حط يدهـ على خدها على آثر الكف..
غازي\يعورك..؟؟
هديل ببرود\لا..
غازي يتنهد\تغيرتي كثير..
برودك مايشبهك..
هديل\كيف حسيت وانت تزف أختك..؟؟
حسيت بفخر..؟؟برجوولة..؟؟
حسيت إنك رجعت حقها..؟؟
غازي\ليه تسألين عن أشياء ما تزيدك إلا غم..؟؟
هديل تبتسم بسخرية\لاني نكدييية..
غازي\لا انتي مو نكدية..
انتي تحاولين تتشبهين بشخص ميت..
هديل\أتشبه فيك يالميت..