رواية :جروحي تنزف احزاني/3

:جروحي , احزاني/3 , تنزف , رواية

رواية :جروحي تنزف احزاني/3

في نفس الجامعه كانت ريم ومشاعل يسولفون ومشاعل تحاول تقنع ريم باللي قالها عليه سعود...
ريم:"مشااااعل شكلك انتي استخفيتي..."
مشاعل:"زين انتي فكري..."
ريم بضيق:"مانيب مفكره ومن اللحين بقولك لا يعني لا..."
مشاعل:"ليش انتي متشدده واعديه في السوق شوفيه وهو بعد يشوفك وخلاص..."
ريم:"خلاااص في عينك تبين من اكشف وجههي..."
مشاعل واللي حست مهمتها صعبه:"طيب مو لازم هو يشوف وجههك انتي ما خاطرك تشوفينه..."
رجعت ريم وتسندت على ورى:"والله ماادري وش خاطري فيه... وليد صرت اخاااف منه ..."
مشاعل:"وليش تخافين مادامه واعدك بالزواج..."
ريم:"ماشفت الا كلام ....اخاف انه زي ربعه بس....بعدين انا قلت لك ان بنت عمي كلمتني امس عن فهد..."
مشاعل واللي بان الاهتمام في عيونها:"اش كان ردك..."
ريم:"قلت لها خليني افكر..."

وسرحت في عالمها يمكن لو فهد خطبها قبل ماتتعرف على وليد اكيد كان وافقت على انها ماتحبه بس مافي قلبها حب لاحد اما اللحين صار في قلبها حب لوليد وخوف منه
وماتدري وش الاياااام مخبيه لها....
الجزء الثامن عشر...


ناظرت الساعه كانت 12في الليل وخالد للحين ماجا...مثل عادته كل يوم دايم يسهر...
كانت حاسه بملل لو علاقتها مع ريم احسن كان راحت تسولف معها وتضيع الوقت شوي...لان ريم اكيد صاحيه اللحين..بس للاسف علاقتهم من سيئ لاسوء..
في الاخير ركزت على فيلم في التلفزيون وشدها حتى نست الوقت وما حست في خالد اللي دخل كان شايفها منسجمه في الفيلم ابتسم ومشى بهدوء حتى ماتحس فيه...
حتىقرب من وراهاوحط راسه عند اذنها:"بوووووو"
فزت بسمه وصرخت بصوت عالي...
حط خالد يده على فمها حتى تسكت:"فضحتينا ...اهلي نايمين..."
من كثر الروعه اللي هي فيها والفزع ماردت عليه قعدت وحست يدينها ترتجف...حقدت عليه من قلب...
قعد بجنبها وهو ميت ضحك...
بسمه وهي معصبه:"ولك وجه تضحك...طيحت قلبي..."
خالد وهويحاول يسكت من الضحك:"مادريت انك خفيفه..."
بسمه:"خفيفه في عينك بس لا تخااااف مردوده لك..."
خالد:"تظنين اني بصرخ صرختك لا ياعيوني بناااظرك ببرود وقولك سوري حبيبتي ماتخوفين..."
بسمه:"ايه نشوف..."
مسك يدها ولانه عصبها فكت يدها..
خالد:"لا تقولين زعلتي..."
بسمه:"ايه زعلت..."
خالد:"لا بسومه ماتهونين علي اسافر بكره وانتي زعلانه..."
تفاجأة لما قالها بيسافر وحست بضيق...
بسمه وهي متعجبه:"تسااافر ...وين؟؟
خالد:"امي تبي تزور خالتها اللي في القويعيه وتبيني اوديهم..."
بسمه:"توديهم...ليش فيه احد بيروح معها..."
خالد:"ايه خالتي بتروح..."
سكتت وماردت وتضايقت ليش خالتها ماقالت لخالد السفر الا بعد ماراحت...واللي ضايقها اكثر ان ام محمد بتسافر معهم...
بسمه:"متى قالت لك امك ..."

المصدر: منتديات تراتيل شاعر - من قسم: قصص - روآيات - حكايات ▪●

---

v,hdm :[v,pd jk.t hp.hkdL3 hp.hkdL3 jk.t

خالد:"بعد ماطلعت اتصلت فيني ..."
بسمه:"طيب بتطولون..."
خالد:"لا بنرجع الخميس عشان ملكة امل..."
بسمه:" وانا وين اروح...."
خالد:"ابوي وعبيرفي البيت قعدي معاهم واذا تحبين تروحين لعمك بكيفك..."
انتبهت لما غلط في اسم ريم وقال عبير بدون مايقصد بس ماحبت تظهر له...
بسمه:"تدري بروح لعمي...سحر بنت عمي جات اليوم بروح انبسط معهم شوي..."
قالت معهم وهي عارفه ان مارح تنبسط الا مع سحر بس...
خالد:"سوي اللي يريحك..."
بسمه:"طيب ليه ماروح معكم..."
خالد:"وين تروحين يابسمه...ناس ماتعرفينهم ...."
بسمه وهي تتنهد:"وانت صادق وش يوديني..."
كان يناظرها وهو يبتسم ويتاملها كل يوم يحسها احلى من اليوم اللي قبله مايدري ليه يمكن لان مكانتها تزيد عنده يحسها تحلو في نظره...
بسمه واللي استحت من نظراته:"ها...يالحبيب لا يكون معجب وانا ماادري..."
خالد وهو يضحك:"اكيد معجب....احد يشوف هالجمال وما يعجب فيه..."

^^^^^

وفي مكان قريب منهم كانت ريم... تكلم وليد ماتنكر انها برغم حذرها معه الا انها تفرح لما تسمع صوته كان يسحرها بكلامه...
وليد:"اما لك عندي خبر متاكد انه بيفرحك..."
ريم:"سمعني الله يخليك..."
وليد:"لاني احبك واموت فيك مابلعب باعصابك...بكره بنجي نخطبك من ابوك..."
من المفاجأه ماقدرت ترد كانت تتوقع تطير من الفرح لما تسمع هالخبر بس اللحين فرحتها يغلبها الشك وعدم التصديق...
وليد:"اشوفك مارديتي..."
ريم:"ماادري فاجأتني..."
وليد:"اكيد مفاجأه حلوه..."
ريم:"طبعا حلوه....بس انا قلت لك ان خالد وامي بيسافرون "
وليد فخاطره وهذا اللي خلاني اعجل حتى مااشوف رقعت وجه اخوك...
وليد:"حبيبتي اهم شي يكون ابوك موجود...وخالد بنتعرف عليه عقب..."
ريم:"تصدق انتظر بكره على احر من الجمر..."
وليد:"وانا اكثر...."
كان سعود يناظره ويسمع مكالمته مع ريم....وليد مايتغير كلام الحب عنده متجدد على حسب حالة كل بنت بس المره هذي كلامه غير والانتقام مخليه متقن دوره بكل جداره...
بعد ماسكر التفت عليه سعود:"خلاص معزم تسوي اللي في راسك..."
وليد وهو سرحان:"ايه...."
سعود:"طيب اللحين ممكن تفهمني..."
وليد وهو يعدل جلسته:"بكل سرور افهمك لاني محتاج مساعتك...من اول كنت ناوي تطلع معي ...اوكيه...طلعت البنت عنيده ...اللحين بخطبها من اهلها و..."
سعود وهو يقاطعه:"اشلون تخطبها وانت متأكد ان خالد بيرفض لانه عارف كل شي عنك.."
وليد بضيق:"ياخو لا تقاطع اسمع للاخر...انا عارف انه احتمال خالد يقنعهم برفض بس انا رابح في الحالتين..."
سعود:"واشلون يالحبيب رابح في الحالتين..."
وليد:"ان وافقوا...بنتهم بتجيهم ثاني يوم مطلقه وبكذا فضيحتهم بتكون كبيره...وان ما وافقوا ثقة ريم اللي بديت اخسرها ترجع وبقوه..."
سعود:"تصدق ابليس يطلع حمل وديع عندك..."
وليد:"ماشفت شي..

سعود:"انت وش احب لقلبك يوافقون ولا يرفضون..."
وليد:" اتمنى يرفضون....لو وافقوا بتكون مهمتي صعبه خصوصا ان اخواني فرحوا لما قلت لهم من بخطب ورحبوا بااهل ريم ...تدري الدنيا مصالح...بس اذا رفضوا مهمتي مع ريم بتكون سهله"
سعود:"انت قلت تبي مساعدتي..."
وليدوهو يقاطعه:" زين ذكرتني...خل مشاعل تعجل علينا بالصور...واهم شي ريم لاتدري عنها..."
وفي نفس الوقت رن التلفون...ابتسم سعود بخبث لما شاف اسم المتصل وقام بيدخل...
وليد:"كلم من هنا...ليش بتدخل.."
سعود:"سوووري فيه مكالمات يلزمها سريه..."
وليد:"الحمد لله والشكرالمتصله مهي مشاعل..."
سعود واللي وصل غرفته وقبل مايسكر الباب:"ايه مشاعل بس تدري ودي اخذ راحتي شوي..."
ضحك منه وليد :"اذلف وخذ راحتك بس ياليت توصيها على اللي قلت لك"

^^^^^^

كانت بتدخل غرفها ...تاخر الوقت وهي مانامت للحين...نادرا ماتسهر لوقت متأخر...
مرت من قدام غرفة مشاعل...وقفت لما سمعت صوت مشاعل وهي تضحك...هزت راسها هي عارفه ان مشاعل تكلم شباب وطلعاتها مع عبير مشكوك فيها وياما نصحتها بس ماتقبل نصيحتها... قربت من الغرفه صدمت من الكلام اللي يسمعه وحست بشمئزاز من اختها ماتوقت فيه بنت فيها ذرة حيا تتكلم هالكلام والمصيبه تكون هالبنت هي اختها...ماقدرت تتحمل فتحت الباب واللي من لامبالاة مشاعل مااهتمت تقفل الباب عليها..صحيح من امن العقوبه اساء الادب...
لما شافتها مشاعل عدلت جلستها:"اوكيه حبيبي اكلمك بعدين..."
بعد ماسكرت ناظرت اختها بكل برود:"خير اشفيك داخله علي بهالطريقه الهمجيه..."
نوف وهي لازلت منصدمه:"اشلون تسمحين تكلمين واحد بهالطريقه..."
مشاعل تقاطعها وهي تحاول تخفي الخجل اللي حسته لما درت ان نوف سمعت مكالماتها:"تتنصتين علي حظرتك..."
نوف:"مااتنصت بس انتي ماشاء الله عليك ماخذه راحتك في كلامك المايع ودلعك المبتذل..."
مشاعل:"امي وابوي ماتدخلوا في حياتي...تجين انتي تبين تدخلين..."
نوف:"امي وابوي مادروا عنك يامشاعل..."
مشاعل:"تهدديني...."
نوف وهي طالعه:"ايه اهددك يامشاعل اما تعدلتي لعلم ابوي...وانتي ادرى بابوي وش ممكن يسوي لو درى..."
طلعت وماانتظرت ردها...حاسه بتأنيب الضمير لانها تتستر عليها كان المفروض تعلم ابوها من اول مانصحتها وما اهتمت ...بس كانت خايفه من ابوها العصبي واللي ملتهي بزوجته الثانيه ومايجيهم الانادرا..وامها اللي كثيرة طلعات واهم ماعليها ان بناتها ماينقصهم شي بس هل فكرت هي عرفت تربي بناتها؟؟؟كثر الطلعات انساها تسال نفسها هالسؤال المهم...

^^^^^

طلعوا من بيتهم العصر وكانوا بيمرون ام محمد وبعدين بيمر خالد ببسمه بيت عمها ...بس كانت صدمتها كبيره لما شافت عبير نازله مع امها...صدق ماتستحي لا هي ولا امها...اكيد اللحين خالد سعيد ان عبير بتروح معهم حست باالم في قلبها لما فكرت في قعدتهم مع بعض في سياره وحده...مادرت تفسر هالالم غيره ولا كره لعبير...
وبعد السلامات واللي كانت عبيرتكلم بدلع زايد وهي تسلم على خالتها تمنت بسمه تخنقها حتى ترتاح منها...قعدت عبير في الوسط بين امها وبين بسمه كانت متقدمه شوي مابقى الاشوي وتحط راسها بجنب راس خالد..
عبير بلع:"خاااالتي احس حر ورى ياليت واللي يعافيك تقولين لخالد يشغل المكيف..."
كانت بسمه تغلي من داخلها فخاطرها مسويه محترمه وماتكلم خالد مباشره..
وانقرت بسمه من خالد اللي على طول من سمعها حط المكيف عليها..
ام خالد:"المكيف شغال...وبعدين انتبيهي ترى كثره مهو بزين"
ام محمد:"عاد عبير اذا مرضت تطيح ياعمري ماتتحمل..."
بسمه فخاطرها جعلها تطيح طيحه ماتقوم منها...
ام محمد:"ماعليه بنتعبك ياخالد...بس محمد مشغول..."
خالد:"افا عليك عادي وبعدين حتى انا ودي اروح اسلم على الربع هناك.."
كانت بسمه ساكته وماتكلمت حس فيها خالد ودرى انها وراه قاعد بركان بيثور في أي وقت....ماعجبه موقف خالته وعبير حس ان لو ريم مستحيل يخليها تركب مع من كان خطيبها السابق...

ماحست الا وهي واقفه قدام بيت عمها طول الطريق وهي معصبه نزل خالد معها...كان عبد العزيز عند الباب...
خالد بعد مادخل مع بسمه يوجه الكلام لعبد العزيز:"ابوك فيه..."
عبد العزيز:"لا..."
راح عند بسمه واللي حظنته كانت مشتاقه له....وابتسمت له:"هلا والله عزوز...اشخبارك حبيبي"
عبد العزيز:"انا بخير وفرحان اللحين انتي وسحر عندنا...بروح اقول انك وصلتي"
وراح يركض...كانت بسمه واقفه حاقده على خالد وماتبي تبين له...
خالد وهو يقرب منها:"ياللا بسمه تدرين ينتظروني في السياره..."
بسمه ببرود:"ايه...عجل الا يزعلون عليك..."
خالد كان عارف انها تقصد عبير:"اوكيه حبيبتي انا رايح اعتبريني عبد العزيز وخذيني في الاحظان..."
بسمه وهي تلتفت وراها:"أي احضان الله يهديك...ياللا رح لا احد يطلع اللحين.."
قرب منها خالد وباسها:"تامرين شي..."
بسمه وهي حاسه بضيق على فراقه:"سلامتك وانتبه لا تسرع وامش على مهل..."
خالد وهو طالع ضحك:"اوامر ثانيه..."
بسمه:"ايه اتصل اذا وصلت..."
خالد:"حاااظر عمتي..."
ورمى لها بوسه في الهوا...واختفى بعد ماسكر الباب وراه...تنهدت من اعماق قلبها كانت متاكده انها تحبه وحب جنونا ابتسمت بمراره ومن اللي تقدر تعيش مع خالد وما تحبه...

^^^^^

كانت الدنيا مهو واسعتها من الفرحه بعد ماكلمها وليد وقال انه قريب من بيتهم كانت مشاعل عندها ويناظرون من الدريشه وانتبهوا على وصول سياره تخبوا ورى الستاره
نزل ثلاثه اثنين مبين كبار شوي في العمر والثالث واللي رفع راسه على فوق اول مانزل كانت ريم متاكده انه وليد...ماتوقعت يكون بهالوسامه تنهدت من قلبها وتسندت على الجداروقعدت على الارض...
ضحكت مشاعل:"اشفيك لا تقولين بيغمى علي..."
ريم:"مشاعل عطيني كف خليني احس اني مااحلم وان كل هذا حقيقه..."
مشاعل:"يازين ماطلبتي..."
وقربت منها وعطتها كف...
ريم:"بعد تصدقين انتي وجهك..."
مشاعل:"انتي طلبتي...بعدين تعالي ابوك اشلون درى بجيتهم..."
ريم:"يقول وليد ان اخوه الكبير كلم ابوي...بس تصدقين ابوه ماجا ماادري ليش..."
مشاعل:"انتي اللحين خلي اهلك يوافقون وعقب يصير خير..."
ريم:"وليش مايوافقون... "
مشاعل:"يوووه ترى زهقت وانا من جيتك وانتي ماعندك الاطاري هالوليد...ماوديك تشربينا شي؟؟"
ريم واللي قامت:"يابعد عمري يامشاعل من فرحتي نسيت كل شي..."
طلعت ريم وراحت وراها مشاعل ولما تأكدت انها نزلت رجعت و فتحت الدرج اللي فيه البومات الصور اللي لريم واخذت كم صوره من اماكن مختلفه حتى ماتنتبه ريم..وحطتها في شنطتها ورجعت مكانها... لو بيدها مااخذت صور ريم بس ماتقدر ترفض أي طلب لسعود مهما كان...

^^^^^^

كانت مع بنت عمها في الصاله وهم يتذكرون مواقف صارت عليهم ويضحكون وهند وهدى معهم وبرغم كرههم لبسمه الا ان سحر قدرت تجمعهم مع بعض...
اختفت ضحكت بسمه اول ماشافت عمها داخل عليهم...له رهبه في قلبها عجيبه...
وجه لها نظره من نظراته القاسيه...وقعد...
ابو عبد العزيز:"متى بيجي رجلك..."
بسمه:"اليوم ان شاء الله..."
هند:"اليوم ملكة امل بنت جيرانا وبنروح..."
مارد عليها...ناظرت بسمه سحر واللي فهمت وش تقصد من نظرتها...
سحر:"ايه ترى بسمه بتروح بدري عند امل..."
سحرتكمل:"تدري واجب يبه تشوف لاخت رجلها يمكن تكون محتاجه شي...وبعدين هو اتصل فيها وقالها..."
ابو عبد العزيز بكل سخريه:"كيفها اللحين صايره في حكم رجال"
تنهدت بسمه لانها خافت يمنعها تروح الا معهم وبيكون متاخر اكيد...

طلعوا بعدين ينامون سحر وبسمه ينامون في غرفة سحر... بعد ماحطوا فيها سريرين طبعا بعد مااقنهتهم سحر يجيبون سرير بسمه في غرفتها......واكيد فيه اختلاف في الغرفتين...رمت بسمه نفسها على السرير...

وكانت تناظر بنت عمها واللي للحين مابين بطنها بس باين عليها تعب الحمل..وكانت حركتها بطيئه شوي حطت سحر راسها على المخده...
بسمه:"شكل الحمل متعبك......"
سحر وهي تبتسم:"ان شاء الله تجربين قريب..."
بسمه وهي تتنهد:"ان شاء الله......تدرين احاول انسى ان عبير وخالد قريبين من بعض مااقدر..."
سحر:"لا انسي اللي يسمعك يقول بينام معها"
بسمه واللي قعدت على السرير:"حرام عليك ياسحر لا تحطين هالافكار في راسي..."
سحر وهي تضحك:"تشكين في اخلاق زوجك..."
بسمه:"لا والله.....بس تخيلي يملك عليها هناك ويجيبها زوجه ثانيه..."

ماقدرت سحر تمسك نفسها من الضحك...
بسمه:"ايه اضحكي...صدق من قال اللي مايحس بالنار الا واطيها..."
سحروهي تمسح دموعها من كثر الضحك:"انتي كيف تجيك هالافكار..."
رجعت حطت بسمه راسها على المخده وكانت تناظر السقف:"من عاش حياتي ياسحر يكون ماعنده ثقه في شي ويحس ان السعاده مارح تدوم..."
سحر:"يعنى انتي سعيده مع خالد"
بسمه:"اذا علي انا سعيده... بس هو مااحسه سعيد..."
سمعوا صوت جوال بسمه ...
انقلبت سحر على الجهه الثانيه:"مبين انه مهو سعيد ...ياشيخه روحي ازعجنا من كثر اتصالاته هذا الاتصال الخامس من حطك عندنا..."
بسمه مهي تضحك:"وعادتهم بعد..."
سحر:"ايه عادتهم ردي بس... ترى لو تطولين اخاف يشغل سيارته ويجي ويترك امه وراه...ياللا حبيبتي تصبحين على خير كلمي زوجك بهدوء ترى ميته نوم.."
ماردت بسمه وهي تناظر رقم خالد صحيح من وصلت وهو كل شوي يكلمها فخاطرها اشكثر احبك ياخالد وقررت ترد عليه قبل لايسكر......

^^^^

"فهيد ياجعلك المرض..."
سمعتها ام فيصل وفخاطرها بسم الله على ولدي وماتجرت تقول بصوت عالي قدام خالتها واللي عصبت على فهد واللي حبها على راسها ولما شافها عصبت عليه زودها حبتين وقام يحبها...
فهد وهو يضحك:"اللحين تدعين علي لا ني احبك..."
ام عبد الرحمن:"ياحبتك القراده...رح تزوج وحب في مرتك اللين تقول بس..."
فهد:"لو اتزوج اربع مااستغني عنك ياحبي الاول والاخير"
ام عبد الرحمن:"تتزوج كم انت ووجهك...هي وحده وتخب عليك"
فهد:"انتي ليش ضد ان الواحد يتزوج اكثر من وحده..."
ام عبد الرحمن:"اذا الله وفق الواحد في مره سنعه وشوله يتزوج..."
فهد:"احلى....عندك تعصب لبنات جنسك..."
ام عبد الرحمن وهي تعدل جلستها:"وشو ...وش معنى تعصب..."
فهد وهو يحاول يتكلم بجديه:"هذا الله يسلمك مرض معدي يصيب الحريم بعد الخمسين سنه"
ام عبد الرحمن وهي تمكسك بااذنه:"ومن قال لك اني تعديت الخمسين..."
فهد حس انه خاطره يضحك وحب يوقع بين امه وجدته...
فهد:"امي تقول..."
فكت ام عبد الرحمن يدها والتفتت على ام فيصل:"مزنه صادق ولدك..."
ام فيصل واللي كالعاده ميته ضحك:"ماتعرفين سوالف فهد..."
ام عبد الرحمن:"اعرفها سوالف ولدك...انا يافهد توني ماتعديت الخمسين..."
فهد واللي كان يشرب شاهي ولما سمع جدته ضحك بصوت عالي :"جدتي الله يهديك ابوي عمره فوق الخمس وخمسين سنه..."
ام عبد الرحمن:"والله بكيفه...وكل واحد حر في عمره..."
ضحك فهد وامه على كلام جدته...
ام عبد الرحمن وهي تفكر:"اللحين انت وريم كيف بتتزوجون ..."
فهد:"مثل مايتزوجون هالعالم..."
ام عبد الرحمن:"انت تحب الضحك والسوالف وهي الله يهديها فيها شويه تكبر طالعه على خالتها..."
فهد:"ماعليك شوفي اذااتزوجها اما عدلتها لكم..."
ام عبد الرحمن:"اخاف هي اللي بتعدلك بس..."
فهد وهو يضحك:" كل شي في هالزمان ممكن يصير..."

^^^^^^

دقت امل عليه وطلعت بعد ما تاكدت ان عمها ماعنده مانع...لقت امل تنتظرها في السياره حتى تروح معها للكوفيره لان بدريه كانت مشغوله...بعد ماركبت السياره مشوا ومروا بالصدفه من عند ابو صالح وحبت امل تعصب بسمه اللي ماتحب طاري ابو صالح...
امل:"اشرايك نوقف عند البقاله..."
بسمه وهي معصبه:"والله العظيم لو سويتيها لارجع البيت مشي..."
امل وهي تضحك:"خلاااص هونا..."
بسمه:"انتي فضيعه...اللي يشوفك تمزحين ماكأن اليوم ملكتك..."
امل:"عادي صح حاسه بخوف داخلى بس يمكن لاني اكلم طلال احس اني تعودت عليه..."
بسمه:"الله يهنيكم..."
ووصلوا ومر الوقت بسرعه كانت امل تقريبا خالصه...كان مكياجها ناعم اظهر جمال وجهها...وشعرها مرفوع بطريقه حلوه...بس بسمه كالعاده طالعه احلى...وراحوا البيت...على المغرب وماكان فيه احد وصل الا ساره وريم باقي ماجات وخالد كان في الطريق...اول ماشافتهم رهف...
رهف:"الله ياامل طالعه حلوه..."
امل بعد مارمت عباتها وتستعرض قدام اختها:"من يومي حلوه..."
رهف:"البسي الفستان حتى تطلعين احلى بس تصدقين بسمه طالعه احلى..."
ناظرت امل اختها بحقد:"مافيه احد محطمني في الدنيا كثرك...(وهي تقلدها) بسمه احلى..."
وطلعت امل فوق والباقين في الصاله ميتين ضحك عليها...
.
.
.
كانت بسمه في الصاله الساعه ثمان مع ساره وريم اللي توها وصلت... وانتبهت على دخلت خالتها وعبير وامها...قامت تسلم على خالتها وام محمد...وكانت منقهره من عبير داخله والفرحه تطل من عيونها...
ريم:"عبيروش هالزين كاانك جايه من عند كوفيره..."
عبير:"تدرين جمالي طبيعي...وبعدين ماقصر خالد وقف في استراحه قبل الرياض وتعدلت وزي ماتشوفين..."
حست بسمه انهم يتكلمون بصوت عالي حتى يحرونها...ماحبت تقعد بس تقهر عمرها وتفرحهم ودخلت عند بدريه اللي كانت في المطبخ...كانت تحط لمساتها الاخيره على كل شي...
بسمه:"محتاجه مساعده يابدريه..."
بدريه:"تسملين ياعيوني بس مثل ماانتي شايفه كل شي تمام..."
بسمه :"اكيد اليوم عندك غير..."
بدريه:"اكيد غير...(وهي تتنهد)الله يوفقها ان شاء الله"
استغربت بسمه لما شافت نظرت بدريه وهي تناظر ورى بسمه وحست ان احد دخل التفتت وكان اللي داخل هوخالد...اول ماشافها ابتسم...
خالد:"حرااام عليك يابدريه خربتي علي...(وهو يناظر بسمه بااعجاب)الحلوه ذي مرتي..."
قرب منها ومسكها وقربها منه استحت بسمه بالذات ان بدريه موجوده...
بدريه:"سلم على اختك اول يالحبيب..."
خالد بعد مافك بسمه:"لا...اول اسلم على مرتي وعقب اختي..."
ضحكت بدريه:"ومن متى مرتك اول؟"
خالد:"من يوم تزوجت بسمه...المهم شخباركم.."
بدريه:"بخير الله يسلمك ...اخبار الاهل اللي زرتوهم..."
خالد:"ماعليهم طيبين...شخبارك يابسمه.."
بسمه:"تمام..."
قرب منها خالد ومسك يدها :"تعالي طلعيني اسلم على امل ودي انرفزها شوي..."
وقفت بسمه لما تذكرت ان عبير داخل:"البيت مليان حريم وين تدخل..."
عرف خالد انها تقصد عبير لان مافيه احد غريب الا هي:"خلاااص اشوفها بعدين..."
.
.

.
وطلعت امل عند الحريم كانت ماشاء الله عليها جريئه واصلا المعازيم قليل ....
قعدت بسمه بجنب امل وهي تضحك من تعليقاتها...
امل وهي تهمس لبسمه حتى مااحد يسمعهم:"ناظري بالله امه..."
هزت بسمه كتوفها لانها حستها حرمه عاديه:"عاديه مافيها شي غريب..."
امل:"مافيها شي غريب هذي كبر جدتي شفي اشلون لبسها مهي محترمه سنها..."
بسمه:"حرااام عليك لبسها عادي..."
امل:"لا تخليني اللحين اعطيك بباقة هالورد على وجهك....الحرمه عجوز متصابيه تبي تعيش زمانها وزمان غيرها..."
بسمه وهي ميته ضحك:"وانتي وش حارق اعصابك ان شاء الله تكون متصابيه اللين تموت..."
امل:"لا حبيبتي مااحب تكون جدة عيالي كذا..."
بسمه:"قصري حسك لا الحرمه تسمعك ...ويصير علوم وبعدين احمدي ربك هي انتي في الرياض وهم بعيدين..."
امل:"وهذا اللي مهونها علي..."
بسمه وهي تطالعها:"يااختي انتي غريبه اللحين بتروحين عند طلال وبتقعدين معه بالحالك...ولا هامك الموضوع..."
امل:"قلت لك من كثر مااكلمه احس اني بكون معه عادي..."
بسمه وهي تناظر بدريه:"اشوف امك جايه استعدي ياحلوه ووريني الجرائه..."
.
.
.
بعد ماراحت امل قعدت بسمه مع ساره وارتاحت ان عبير وامها راحوا...
وكانوا يسولفون تقريبا مابقى احد غريب حتى ام طلال وبناتها....
وفجأه دخلت عليهم امل ومبين عليها انها معصبه شافت امها وضنت ان مابقى احد..
امل:"والله ماعاد ادخل عنده الا وانتي معي..."
بس انصدمت لما شافت ان جدتها وخالاتها موجودات واللي كانت ردة فعلهم الضحك على موقفها...راحت قعدت بجنب يسمه...
ريم:"ليش دلوعة ماما ماتبين تدخلين الا بامك..."
امل:"توك صغيره ماتدرين عن هالكلام..."
ريم:"صغير في عينك...اعترفي وش صار..."
امل:"تاكدي ان اللي صار شي هين عنداللي بيصيرعند ولد عمك فهد..."
ريم وهي معصبه:"وش علي انا من ولد عمي فهد..."
ساره وحتى تسكت ريم :"شكله حطمك وقالك منتي بحلوه..."
امل:"واثقه انا في عمري بس مانيب قايله الا لبسمه..."
والتفتت على بسمه وهمست لها في اذنها والبقيه وقت ماحسوا انها مهي بقايله...
راحوا يسولفون...
ضحكت بسمه لما سمعت امل:"احسن تستاهلين حتى تقولين عااادي انا متعوده على طلال.."
امل:"تتوقعين عقوبه .."
بسمه:"وش عقوبته انتي مكبره المسأله يمكن لانك ماقد طلعتي عنده الا لما جا شافك واكيد اللحين انتي زوجته وبعدين اللي صار شئ عادي..."
امل:"أي عادي...الا مايستحي"
حست بسمه انه مارح ينفع هالاسلوب:"تصدقين طلال هذا وقح..."
امل وهي معصبه:"وقح في عينك..."
بسمه وهي تكتم ضحكتها:"ياسلام توك تسبينه..."
امل:"ايه اسبه...بس انتي دافعي عنه ياحبيبتي... على قولة المثل ادعي على ولدي ولااحب احد يقول أمين"
بسمه:"لا حبيبتي ادافع عنه في احلامك...انا خالد ماارضى فيه وبس"
ماانتبهوا ان اصواتهم كانت عاليه والكل سكت وهو يستمع وكان خالد داخل وسمع اخر حديثهم...
خالد:"بعدي والله...هذا الحرمه السنعه"
ماردت عليه بسمه وراح قعد بجنب امه كان مقابل بسمه سرحت وهي تناظره يسولف مع امه وخواته ...كان خالد يعنى الشي الكثير الامه وخواته ومبين اشكثريحبونه كانت ابتسامته تسحرها...تحبه اكيد تحبه ...عمره ماصرح بحبه بس يكفيها اللحين انه يحترمها ويقدرها ويراضيها اذا زعلت وو...اشياء كثيره افتقدتها بعد وفاة اهلها رجعت في حياتها مع خالد...

^^^^^

^^^^^

بعد ماوصلوا البيت كان ابو خالد في الصاله لانه مشى بدري ...انتبهت ريم ان ابوها ااشر لخالد يقعد من غير ماينتبهون...طلعت امها وبسمه ولما شافت مابقى الا هي طلعت بس وقفت بمكان مايشوفنها حتى تسمع...كان ابوها يكلم خالد عن وليد...
ابو خالد:"وانا قلت اشوف وش رايك..."
خالد:"رايي اكيد لا.."
ابو خالد:"والاسباب..."
خالد:"اولا لان فهد بيخطب ريم..."
ابو خالد:"ماشفنا شي..."
خالد:"بيخطب يبه انا متاكد...وفيه سبب اهم من هالسبب..."
هنا ماقدرت ريم تتحمل وكرهت خالد وفهد ومااهتمت في السبب الثاني وراحت تركض غرفتها وهي تصيح تحطم حلمها من الزواج من وليد...وكله بسبب فهد..

بعد ماحكى خالد لابوه كل شي انصدم ابو خالد من اللي يسمعه
ابو خالد:"معقوله..."
خالد:"ايه يابوي...وليد سمعته في التراااب واسأل عنه اللي تبي..."
ابو خالد:"يخسى الا هو ازوجه بنتي مادام هذي سواياه..."
سرح خالد في وليد شخص ماكان يحتك فيه بس ماكان يحبه....
خالد:"بس من اللي دلهم علينا..."
ابو خالد:"يقولون اختهم في الجامعه..."
استغرب خالد اشلون ظهر وليد الا له سنين ماشافه ظهر في حياتهم فجأه

^^^^^

في الجامعه قاعدين الثلاث وماعندهم الا امل وملكتها...واللي ماسكتت من قعدت بس تتكلم عن الملكه وعن طلال اللي تراضت معه الاخت...
امل:"بس من جد قهرتيني ليش ماجيتي..."
دلال:"تدرين جا من دوامه المغرب ماقدرت اقوله..."
بسمه:"الخميس ويداوم..."
دلال:"ايه يداوم مو بعض الناس اللهم لا حسد..."
كانت نوف توها واصله ... تحس براحه معهم عشان كذا ماتحب تفوتها القعده معهم...كانت تسمع سوالفهم وضحكهم وهي تفكر اشلون تفاتح بسمه في الموضوع حاسه
انها لازم تريح ضميرها وتنبه بسمه حتى تنبه ريم...ماقدرت في اختها لازم تبدى في ريم اللي حستها لازل فيها خير وعسى مع الايام تقدر في اختها...
نوف:"بسمه ودي اكلمك في موضوع خاص..."
وقبل ماترد بسمه...ردت امل:"سوووري ياحبيبتي مافيه بينا مواضيع خاصه..."
استحت نوف واللي ماهي متعوده على مزح امل...
قامت دلال وسحبت امل معها :"حتى انا وامل بينا مواضيع خاصه..."
قامت امل وهي ماودها بس دلال ماعطتها فرصه..
ناظرت بسمه نوف وهي تشجعها على الكلام:"تفضلي...اسمعك..."
حكت نوف لبسه كل شي عن ريم وان وليد ممكن يستغلها...وعن مشاعل اختها واللي تشجع ريم (الا موضوع الصور لانها ماكانت تدري عنه) ...
نوف وهي تناظر بسمه المنصدمه:"قلت اقولك تحذرينها وتترك اللي هي فيه لاني اسمع مشاعل تقنعها تطلع مع وليد وهي رافضه...يمكن تقدرين تسوين معها اللي عجزت اسويه مع اختي..."
بسمه:"بصراااحه انتي صدمتيني..."
نوف:"ادري وحسيت من واجبي اقولك"
بسمه:"مشكوووره يانوف اثبتي لي ببهالموقف طيب اصلك..."
نوف وهي تبتسم بمراره:"أي طيب اصل اللي تتكلمين عنه مع ابو مايسأل وام لاهيه واخت ضايعه..."
بسمه :"لا تفقدين الامل في هداية اختك ودايم ذكريها ماتدرين يمكن ربك يهديها..."
نوف:"واتمنى... عموما اذا حسيتي مارح ينفع مع ريم الامواجهتها ماتذكرين اللي صار بينا.."
بسمه:"تطمني مستحيل اذكرك..."
وسرحت وهي تفكر في هالمهمه الصعبه اللي اوكلتها لها نوف علا قتها مع ريم شبه منقطعه الامن كلام جارح يتبادلونه...اشلون بتقدر اللحين تكلمها...

^^^^^

كان يتامل الصور بااعجاب صحيح قاله حلوه بس ماتوقعها تكون بهالجمال...
سعود وهي يبتسم بخبث:"اشرايك ..."
وليد:"بنت اللذين مااحلاها..."
سعود وهو ياخذ صوره:"صااادق اشلون بتهون عليك تطلقها لو تزوجتها..."
وليد:"عادي تهون...بس تدري للحين مارد ابوها اتوقع ان خالد اقنعه برفض..."
سعود:"وهذا اللي تبي..."
وليد:"ايه اهم شي ريم تثق فيني...تصدق البارح ماردت علي ...يمكن صار شي.."
رفع عمر راسه واللي كان متمدد على الكنبه وحاط شماغه على وجهها:"يااخي خلو بنات الناس في حالهم..."
سعود:"تعال شف الصور انت ووسع صدرك..."
رجع حط راسه وغمض عيونه:"كفايه انت توسع صدرك..."
سعود:"عمر لك يومين حالك مهو عاجبني..."
عمر وهو يعدل جلسته:"يااخي كرهت كل شي...وافكر جديا اروح مستشفى الامل..."
انفجروا اثنينهم في الضحك:"تبي تفضح نفسك..."
عمر:"يعني مارح انفضح الا اذا تعالجت...لا الفضيحه اني استمر في هالشي..."
سعود:"انت يالدلخ ترى ممكن يفصلونك من العمل لو درى انك في مستشفى الامل..."
عمر:"وهذا اللي مخوفني اني اخسر وضيفتي...بس بسأل واشوف..."
وليد وهو لازل يتأمل الصور:"اسأل ياحبيبي...وصدقني بترجع لما تصدم في الواقع..."
تنهد عمر ومارد عليه...تربى طول حياته تربيه غرست فيه الخير بس اصدقاء السوء
اضعفوا هالخير بس ماقدروا يقضون عليه...كان اكره ماعليه العبث بااعراض الناس
صح هو يغلط بس مايحب يتعرض للبنات اللي في حالهم ويلعب في عقولهم......

^^^^

بعد تفكير عميق قررت الافضل انها تكلم ريم وتحاول تقنعها متأكده ان مهمتها صعبه بس لازم تحاول...كانت الساعه11في الليل بعد مادخلوا ام خالد وابو خالد غرفتهم وخالد برى ومارح يجي في هالوقت...اخذت نفس عميق وراحت لريم...
.
.
كانت ريم في غرفتها وتحس ودها تكسر كل شي قدامها من الزعل...ليش خالد يتحكم في حياتها ومهي ملزومه بفهد حتى ينرفض وليد عشانه...كان ودها تدخل لما سمعت خالد يرفض بس اكيد ماتقدر لانهم بيستغربون ومن وين تعرف وليد ...حست انه ظلم انها ماتختار اللي تحبه كانت شاكه في وليد ويوم طلع صادق معها رفضوه اهلها...قهر..

سمعت باب غرفتها يدق وراحت تفتح الباب..
استغربت لما شافت بسمه:"خير وش تبين..."
بسمه عرفت ان مهمتها صعبه:"بغيت اتكلم معك شوي..."
تركت الباب مفتوح ودخلت وبسمه وراها...
بسمه بعد مادخلت:"اتمنى ياريم تسمعين كلامي وتفكرين فيه زين..."
ريم واللي قعدت على طرف السرير:"افففف خلصينا وش عندك..."
بسمه:"اول شي احب ااكد لك ان مابيني وبينك عداوه واعتبرك اخت لي..."
ريم:"مايشرفني تكونين لي اخت ..."
بسمه حبت تدخل في الموضوع على طول:"ودي كلمك في موضوع يهمك..."
ريم بلا مبالاه:"وشو الموضوع اللي يهمني....."
تنهدت بسمه وجلست على الكرسي...وحكت لريم كل اللي عرفته من نوف بس ماقالت لها عن مصدرها...كانت ريم منصدمه ومستغربه اشلون عرفت بكل شي...
ريم بعصبيه وهي تحاول تخفي ارتباكها:"انتي جايه تتبلين علي ..."
بسمه:"انا مااتبلى عليك...انا جايه انصحك كاخت لك ياريم انتي تلعبين بالنار وتاكدي ان وليد واللي مثله مستحيل يفكر بالزواج.."
ريم بعصبيه:"لا يفكر بالزواج بس ماقصر خالد رفضه حتى من غير ما......."
وسكتت وحطت يدها على فمها وكان يطل من عيونها نظرااات مرعبه...لما شافتها بسمه التفتت وراها حتى تشوف من اللي غير حال ريم كذا...انصدمت من اللي شافته...

الجزء التاسع عشر....


خافت بسمه لما شافت خالد واقف ويناظر ريم والشرر يتطاير من عيونه تأكدت انه سمع كل شي...في لمح البصر كان عند ريم وجرها من شعرها بكل قسوه وكتمت ريم صرختها كان الخوف مسيطر عليها... حاولت بسمه تفكه يده من شعرها بس حست بيد خالد الثانيه تلوي يدها....ودزها على ورى بقسوه...

خالد بعصبيه :"اطلعي وسكري الباب..."
بسمه:"خالد..."
خالد:"بسمه اطلعي...."
شافت في عيون ريم توسل انها ماتطلع...راحت تجاه الباب..
ريم بتوسل:"بسمه الله يخليك لا تطلعين..."
خالد:"ولك وجهه تتكلمين..."
راحت بسمه وسكرت الباب حتى مايصحون اهل خالد... بس ماطلعت...
كانت تشوف خالد وهو يجر اخته من شعرها ويطقها...هالمنظر اثار فيها الامها الماضيه ياما انجرت من شعرها وانطقت من عمها...يمكن خالد يطق اخته من حرته ومن غضبه بس هي كانت تنطق بدون سبب...
خالد:"انتي ياريم...تكلمين شباب...."
ريم وهي تصيح:"والله مااكلم ياخالد.."
خالد وهو يصارخ عليها:"ووليد..."
ماردت ريم...تمنت تموت ولا تنحط في هالموقف خالد يكشف زلتها اللي ماتغتفر...
خالد:"ليش ماتردين..."
حست بسمه انه من واجبها تدخل...حاولت تتكلم بصوت هادي رغم التوتر اللي فيها...
بسمه:"خالد..."
اللتفت عليها:"انتي للحين هنا...اطلعي يابسمه "
بسمه:"خالد اهلك نايمين لايسمعون حسك..."
خالد:"خليهم يسمعون...ويشوفون بنتهم بنت الدلال والعز...ويشوفون سواد وجهها..."
ريموهي تتألم:"أي...خالد حرام عليك..."
خالد:"حرام علي واللي سويته حلال..."
ريم:"اذبحني وفكني..."
خالد:"اذبحك ان ذبحتك ارتحتي وانا ماابي لك الراحه ياريم.."
بسمه:"خالد..

خالد:"اقسم بالله ان ماطلعتي ان تندمين طول حياتك..."
اتجهت للباب وهي تسمعه يحقق مع ريم..واشلون عرفت وليد وش حدود هالعلاقه..
تندمت في نفسهها لانها كلمت ريم...لو صبرت لوقت ثاني...انتظرت برى وهي تسمع صراخ خالد وتدعي ربها مايصحى ابو خالد على صراااخه...بعدين سمعت شي انكسر خافت...
وفتحت الباب لقت خالد في وجهها وكان طالع رجعت لورى لاتصتدم فيه ...طلع وهومعصب حاولت تلحقه بس عرفت انه مارح يسمعها...
ناظرت ريم كانت على السرير وهي تصيح من قلبها...كان الجوال وتلفون غرفتها منكسره حولها...
قربت منها واول ماحطت يدها على كتفها انتفضت ريم من لمستها وكان منظرها يكسر الخاطر...
ريم وهي تصيح:"ارتحتي اللحين..."
بسمه:"حرام عليك ليش تظلميني..."
ريم:"اطلعي من غرفتي...انتي اصلا قاصده خالد يسمع...والله مااسامحك طول حياتي يابسمه.."
بسمه:"كنت ادور مصلحتك..."
ريم:"اطلعي من غرفتي...اكرهك يابسمه من اول ماشفتك وكرهي لك زاد مليون مره.."
طلعت بسمه وهي مقهوره منها ليش تحقد عليها وهي مالها ذنب...ماتدري ليه كل ماسوت شي ينقلب ضدها...
.
.
.
كان يمشي بسيارته مايدري على وين العاده اذا ضاق صدره يدور فهد...المره هذي مستحيل يدور فهد...كان مو مصدق ريم اخته يطلع منها كذا...شعور صعب على الاخ انه يكتشف اخته تمنى مات ولا سمعها وهي تكلم بسمه عن علاقتها مع وليد...وش اللي حدها على هالدرب اللي اوله مكالمات واخره ضااايع...ماكان ناقصها شي ليش تدور سعادتها عند شباب ضايع ومن دلها على هالطريق...رجع بذاكرته سنوات ورى لما كان شاب عابث يمكن هذ عقاب من رب العالمين...استغفر ربه وهوحاقد على ريم ومايدري اشلون يقدر يسامحها...كان وده يروح لوليد ...بس للاسف لو راح الفضيحه بتكون لاخته ووليد مارح يتضرر...استغرب انه خطب ريم اذا انه يكلمه...يعرف ان وليد خبيث ومستحيل يسوي خير الا وراه شر كثير...
.
.
.
في غرفتها وتفكر في كل اللي صار وخايفه على خالد لانه طلع وهو معصب...
ودها تدق على جواله بس خايفه لا يحط حرته فيها...
لما سمعت حسه داخل للغرفه ركضت لسرير وسوت نفسها نايمه...لانه اكيد بيعصب عليها لما يشوفها صاحيه...حست فيه لما راح الحمام وبدل ملابسه ورمى نفسه على السرير وعطاها ظهره...كان نفسها تحط يدها على كتفه وتتكلم معه وتهون اللي صار بس للاسف حدود العلاقه بينهم ماوصلت لهالمرحله...لازل بينهم حواجز كثيره ومستحيل خالد يقبل منها تتكلم في موضوع بهالحساسيه معها وهوفي قمة غضبه
في الاخير حست بالنوم وهي عارفه ان اللي بجنبها مارح يغمض له جفن...

^^^

مر يومين على اللي صار ومن يومها ماراحت الجامعه كانت تتحاشى تقعد في نفس المكان مع خالد واذا اضطرت ماتحط عينها في عينه....لان نظراته لها كلها شك واحتقار...كان خالد اخوها الوحيد وله مكانه خاصه عندها انقهرت من تدهور علاقتها به...

كلمت مشاعل وقالت لها ان وليد يبي يكلمها...حكت لها كل اللي صار وطلبت منها تبلغه انه ينسى ريم...كرهها لبسمه زاد لانها في نظرها هي السبب....
وبعد تفكر طويل حست ان الحل الوحيد انها توافق على فهد حتى ترتاح من شك خالد لها...ولانه بعد ماكشف خالد كل شي مستحيل يوافق على وليد..نزلت من غرفتها وراحت الصاله حتى تكلم العنود واللي من كلمتها عن فهد ماكلفت نفسها ترد عليها...لما تأكدت انه ما فيه احد في الصاله دقت رقم العنود...
العنود:"الو"
ريم:"السلام عليكم..."
العنود وهي متفاجأه:"هلا والله وعليكم السلام..."
ريم:"اشلونك يالعنود..."
العنود:"بخير الله يسلمك...اشخبارك انتي..."