رواية ملامح الحزن العتيق الجزء التامن روايات جديدة وطويلة

***


وصل لشقته مرهق وتعبان ..
طلع مفاتيحه وتذكر ان مفتاح الشقه عندها ..
دق الجرس مرة وثنتين وعشر
اخيراً ثبت يده على الجرس ومالقى نتيجه .
خاف ان يكون صاير لها شي ..
طلع جوالها وتذكر انه مااخذ رقمها وزفر بملل وضيق ..
ركل الباب والوساوس بدت تنحل مخه وتفتك به ..
دق مرة اخيرة واستكان وهو يسمع صوتها النايم يقول : طيب .
فتحت الباب بعيون مغمضه بعد ماشافته مع عين الباب ..
نفخ وهو يدخل : لااله الا الله لودريت ان كل هذا نوم ماخليت المفتاح عندتس .
سكرت الباب وراه قالت : الواحد اذا دخل بيته يسلم يصبح بالخير .
التفت عليها ببدي صغير وبنطلون برمودا وهي ترجع شعرها للخلف وتمشي قبله للغرفه ناويه تكمل نومها .
رمى شماغه على الكنبه في الصاله ومشى وراها للغرفه ..
شافها تدخل في سريرها وتتغطى وتغمض عيونها ..
تنحنح فهد وفتحت عيونها بكسل قال : كل هذا نوم ..؟
عدلت الغطا عليها قالت وهي تغمض بقوة عن النور اللي فتحه فهد قالت : مانمت الا الفجر كنت استناك لأني عارفه نومي ثقيل وخفت ماافتح لك .. اقفل النور معاك قبل ماتخرج بالله .
نزل فهد ثوبه قال : وين اخرج ..؟ قومي قومي جيبي لي كاسة مويه .
غمضت عيونها بتعب وقامت جلست ..
لمست كتفينها بيدينها وارتعبت وهي تشوف نفسها بدون روب او شي يستر ..
بسرعه رجعت تمددت وغطت جسمها باللحاف قالت : طيب روح وانا الحقك .
ابتسم فهد لحركتها وجا يمشي ببعناد ومتظاهر بالكسل وتمدد بجنبها وسحب اللحاف تغطى فيه وهو يقول : وين اروح واخلي السرير والبراد والعافيه اللي هنا وانا خلقة متكسر وتعبان .
قالت بزعل : محد قال لك تخرج من الليل لين الفجر .
عقد فهد حواجبه بتمثيل قالت : لايكون مضايقتس اني اطلع من البيت بس .
اعطته سارة ظهرها ونامت على جنبها محاولة انها تبعد عنه وهي تشد اللحاف عليها قالت : لامضايقني ولا شي ... انت حر في حياتك .
مد يده عليها سحب اللحاف ولمس كتفها بنعومه قال : طالعي فيني .
غمضت عيونها قالت : فهد خلاص اذا اللي قاعد تسويه فيني عشان تنتقم تراك اخذت حقك وزيادة مني .
ضحك فهد بصوت عالي قال : من اللي قال لتس اني اخذت حقي .. غلطاااانه ياسااااارة . حقي باخذه الحين .
سحبت اللحاف عليها وتغطت كلها قالت : يعني ماكفاك تطنيشي الايام اللي راحت وماكفاك سهرتك برا طول الليل .وانت ماكلملت اسبوع في زواجك .
ابتسم لها وقرب منها وتكى بفكه على كتفها قال : ماكفاني ..
همست بصوت يرتجف : بعد عني لو سمحت .
ناداها بصوت هادي : ساارة .
وبنفس الصوت ردت : فهد لو سمحت طالما انك زعلان للحين بعد عني .
قرب منها اكثر قال : واذا موب زعلان .
غمضت عيونها وسكتت ..
سحب اللحاف عنها وحضنها قالت بهمس : يعني انت مو زعلان الحين ..؟
: انسي سالفة الزعل ...
قاطعته بانفعال : لااااء .. ماراح انساها .. لازم نتكلم .
ابعد عنها ووقف قال : زين نتكلم ... بس اول تقومين تحضرين شي ناكله انتي مااكلتي شي من امس .. وانا بدخلاغسل عشان اصحصح واطير النوم من عيوني .
قالت بكسل : بحضر لك انت .. انا شبعانه طول الليل آكل شكولاته واشرب قهوة .
ضرب فهد على جبينه قال : لااله الا الله كل هالنوم وطول الليل تشربين قهوة .. اجل لوماشربتي قهوة وشلون نومتس .
حست انها انحرجت قالت : نومي مرة ثقيل .
سحبها فهد من يدها قال : روحي طيب جيبي لنا عصير انا مفطر بس ابي اشغلتس بشي اخاف اخليتس ثم تنامين .
ابتسمت بارتياح لأنه بدا يكلمها .. قالت بحرج لوقوفها قدامه ببيجامه خفيفه : ماراح انام بس روح غسل .
نزل راسه على وجهها وباس شفتها بخفه وانسحب من قدامها .
دخل الحمام وهي في حالة جمود ..
رفعت يدها لشفتها وحست بحرارتها وتحركت بهدوء رايحه للمطبخ بتجيب العصير قبل يطلع ..



***





وهناك ..
في الديار البعيده . ..
وصل بعد ساعات طويله لألمانيا ..
ماقدر فيها ينام او يغمض له جفن
وكيف يغمض عيونه وهي فيها وتتألم ..
انينها لازال في اذنه
وتنهداتها وانفعالاتها ورجاويها له صوره لايمكن تنمحي من عقله
اخذ شنطته وجاكيته وطلع يمشي في الطرقات وبين الناس بلا شعور او تركيز ..
تذكر انه طالب سيارة من الفندق اللي حجز فيه ورجع يدورها ..
رجع وشاف السايق اللي ينتظره وتوجه له ..
ركب السيارة وسند براسه على المرتبه ..
ليه تعذبين نفسك وتعذبيني معك ياشادن
اللي فيني يكفيني دهر ..!
انا حملي ماتشيله جبال عشان تزيديني حمل ..
وانتي اصبحتي عليّ اكبر همومي ..
حبك هم ووجعك هم ..!
طلع جواله وفتحه وشاف رساله من نايف بارده مثل مشاعر نايف ناحيته في هاللحظات " اذا وصلت كلمني وفهمني اش سويت لاختي "
ضغط على اسم نايف ودق مرة ومرتين وثلاث وبلا مجيب ..
يمكن نايم ..
بس اليوم عنده دوام
لا لا .. يمكن استاذن عشان شادن ..
دق على فهد وبلا مجيب
لايكون صار لها شي ..
تذكر انه بلا ام وبلا ابن وكأنه بلا اب..
ومو بعيد يكون بلا حبيبه ..
فز قلبه من مكانه وهو يتخيل لو صار لها شي ..
الا ان يصير لها شي ..
الا انه يفقدها
الا انه يقضي عليها بهمومه ..
" يصير لي ولا يصير لها " ..
شد على صدغينه بأصابعه السبابه والابهام بقوة ..
اعوذ بالله من ابليس وش هالوساويس ..
نفخ وتأفف بملل ..
والتفت عليه السايق الاجنبي وسكت عماد وهو يشد على جواله بيده ..
اشتعل القلق بداخله وضغط على رقم البيت عل وعسى انها رجعت للبيت
وصله صوت آخر . ماكان يتمناه في هاللحظة العصيبه ..
قال باحباط : هلا والله بالغاليه .. وشلونتس عساتس مرتاحه عند عيال خالد .
قالت ام ناصر بلهفه : عماد .. ياوليدي وراك تروح وتخلي مرتك وهي تعيبانه .
خلل شعره بيده قال : شغل يالغاليه ماينتأجل .. انتي وشلونتس علميني عنتس ..
: انا بخير بس آكلني قلبي عليك انت ومرتك ..
وبصوت ماخلا من الهم قال : وشلونها تدرين عنها .
: ايه جيتها اليوم وان شاء الله انها طيبه .. بس ان دمعتها والله ماجفت على اللي راح .
عقد حواجبه مستغرب
من تقصد باللي راح
تقصده هو ولا غيره ..
قال : اللي راح من ..؟
: الحمل اللي راح .. ضعيفه ياوليدي قطعت قلبي وهي تبيه .
غمض عيونه بقوة وقلبه ينعصر اكثر يعني نفذت لي كلامي وطلبي ..
قال بقهر وصوته يتلاشى : هي في المستشفى ولا طلعت .
: لا والله ماطلعت عيت الدكتورة الماخوذة تقول ماتطلع قبل ثلاثه ايام .
اضطر انه ينهي المكالمة بعد ماوقفت السيارة قدام الفندق ..
نزل منها على مضض ..
جرحه دفين ومتعبه..
وعيونه مثقله بصورتها الباكية المتألمة عشانه ..
وبقلبه همين همه كل واحد اقسى من الثاني ..




***