مقتطفات زوجه

مقتطفات , زوجه

مقتطفات زوجه

	من 6 شهور بالظبط دخلت اصحى جوزى عشان يصلى الفجر انا دايما عصبيه يا جماعه وبزعق غصب عنى وكل شويه جوزى الاقيه بيدعى عليا المهم دخلت اصحيه عشان الصلاه ومكنش سامعنى قومت مقربه من ودنه وبصووووت عالى , " محمااااااااااه , اصحى يا محماااااااااه " لقيته قايم مفزوع ووقع من ع السرير وبيقول ,, " نيله عليك وعلى محمد ف يوم واحد " "انا هصلى هنا مش ف الجامع " المهم وهو بيصلى سمعته بيدعى عليا "" الهى ما اسمع صوتك ابدا يا سعاد يابنت نحمدو وتطرشي بحق جاه النبى!! " وهنا بقي ... قررت اشغل دماغى واخد حقى , وانتوا عارفين دماغ الستات بقا ف المصايب عامله ازاى ...؟ الباشا خلص صلاه وراجع عشان ينام بينده عليا وانا مش سامعاه ,, اصحى ياوليه ,, اتاخرى شويه انتى نايمه بالعرض كده ليه وانا عامله مش سامعه وكل شويه اقول , " هبابابا , هبابابا ,, هبابابابا كأنى خرسه " من كتر منا منسجمه ف الدور حسيت انى طرشه بجد وهنا بدأ يقلق ,, قرب لغايه عندى وقام مصحينى بايده . بيزغدنى ف قلبى كده وقالى انتى سامعانى ولا لا .؟ ؟ انا شاورتله براسي قولتله لا ,,, قعد يعيط المهم فضل يقرا عليا قران طول الليل وانا كنت ناويه اصحى تانى يوم اقوله على كل حاجه واعرفه ان الدعوه ممكن تستجاب ف اي وقت بس مالحقتش ... وربنا ما لحقت لقيته داخل عليا بشيخ الصبح وشاورلى وقالى البسي عبايتك الشيخ هيرقيك لانك شكلك محسوده . كلنا شكلنا محسودين المهم الشيخ قرا عليا وبعدين قال لجوزى هى كويسه مافيهاش حاجه الطرش والخرس اللى عندها ده ممكن حاله نفسيه ووديها لدكتور تانى يوم قالى تعالى نروح المستشفى انا كتبتله وقولتله سيبنى يومين عشان خوفت اروح المستشفى ويكتشفونى هناك فضل كل يوم يجيبلى شوكولاته وورد ويودينى كل يوم مطعم شكل نتعشى فيه عيشت ملكه اسبوع بحاله لغايه يوم أغبر منيل بستين نيله انا طفسه الصراحه وكنت هموت واكل ممبار المهم هو بيتصل عليا عشان يطمن عليا وطبعا بخلى العيال اللى تكلمه وترد عليه المفروض انى خرسه وطرشه بقي ف اليوم ده العيال كانت لسا نايمه المهم انا رديت وفضلت اهبهب اهبهب وافتكرت الممبار المهم هبهبت تانى بالكلام وقولت " هبابابا هبابابا هربار " قالى " ايه هربار دى مش فاهم يا سعاد " ؟ رديت بكل هبل وقولتله " خلاص استنى هكتبلك ع الواتس " وعشان هو اهبل منى قالى " ماشى اكتبيها احسن ، لاحسن مش فاهم حاجه منك " انا اول ما قفلت معاه فضلت اقرا كل القرأن اللى جه ف بالى عشان هو مخدش باله بعد ساعه لقيته بيتصل عليا بيقولى " سعاد هو انتى كلمتينى وسمعت صوتك من شويه ولا انا بيتهيألى ؟ وانا عماله اقوله " هابابا هابابا بيتهيألك والله " هو سمع كلمه بيتهيألك والله دى ونزل عليه سهم الله وقالى 5 دقايق وهكون عندك يابنت ال*** ياواطيه وانا ارد واقوله " هبابا والله هبابا " يعنى والله خرسه يعنى " والله هبابا ؟" اه يابنت الوارمه بقا انا تعملى فيا كده ؟؟ وعينيكو ماتشوف الا النور شهر راقده ف المستشفى ايديا الشمال اتجبست ورجلى اليمين اتلوحت وابتديت اشوف بعينى بعد اسبوعين واهو الحمد لله لسا عايشه ولغايه دلوقتى كل ما يشوفنى يضحك ويقولى " اه يابنت الناس الطيبين

المصدر: منتديات تراتيل شاعر - من قسم: حَيآتُنآ الأُسَريهْ ▪●

---

lrj'thj .,[i