روايةأما غرام يشرح الصدر طاريه ولا صدووود وعمرنا ماعشقنا/4

والله ماني راضية بها الزواج ولا بطاريه..
كل ماتذكرت اني بأنزف لراكان اختنق صدري..
يمكن هو ماكان يحب هديل مثل ماقالت سارة..
بس هديل وش كان موقفها منه..
أكيد فكرت فيه وتخيلت انه زوجها..
كله من سارة ومني انا بعد..
كان المفروض أحذر سارة ماتعلق هديل براكان..
كان المفروض أحميها من خيال كاذب..
بس كل هذا الكلام مايفيد..مايفيد لأن هديل ماتت..
والأكيد انها رسمت حياتها مع راكان..
الله يسامحك ياسارة..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛

سارة\عساني ما افقد طلتك ولا شوفك يا الغالي..
احسب حسابك تتسحر عندي الليلة..
راكان بحدة\قفلي الباب وتعالي..
سارة خافت من شكله..ومن نبرة صوته..
جلست قريب منه وهي تترقب كل كلمة بيقولها..
سارة\راكان وش فيك؟؟متى رجعت؟؟
راكان\توني واصل..
سارة\الحمدلله على السلامة..
راكان\بنت عمك متى آخر مرة شفتيها؟؟
سارة\غادة؟؟
راكان بغضب\وفيه غيرها الزفت..؟
سارة\راكان وش فيك عليها..وليش معصب؟؟
راكان\انكتمي وردي على سؤالي متى آخر مرة شفتيها..؟؟
سارة\أخر مرة شفتها بالمستشفى..لما جاء علي وصلوني البيت..
وبعدين راحوا على بيتهم..
راكان\أبيك توصلين لها الكلام..بعد الزواج تنسى الوظيفة..
سارة\كيــــــــــف..راكان أنت من جد تتكلم؟؟
راكان واقف بعصبية\وظيفة تكنسلها..
سارة\ماراح توافق..
راكان\غصب عليها..
سارة\يا أخوي وش فيك..صل على النبي..وشهو له كل هالتعصيب..؟؟
راكان\اللهم صلي على محمد..كلامي يوصلها..
سارة\وانا قلتلك ماراح توافق..
راكان\بتوافق..
سارة\أنا مو فاهمتك..
راكان\مافيه شيء تفهمينه..
سارة\راكان ليش معصب كذا؟؟
راكان\لأن ... لأنكم ..وش تبيني أقـــــول وش أقووول؟؟
سارة تمسك يده وتجلسه على الكنبة..
سارة\بسم الله عليك..ياأخوي خاف على نفسك..خاف على قلبك من العصبية..
وش اللي مكدرك ومضيق خلقك..
راكان\بنت عمك..
سارة\وغادة وش فيها؟؟وش اللي سوته؟؟
راكان\مـــا أبـــــــــيها..
سارة شهقت\وليش ماتبيها؟؟راكان أنت بنفسك قلتلي أنك تحبها..
راكان بغضب\عسى الموت يحبك ويحبها معك..
وقف وطلع من بيت سارة وهو بحالة عصبية شديدة..
كان يسوق سيارته بسرعة ممنوعة في الأحياء السكنية..
بس ابليس كان يوسوس له بالفكرة الشينة..
و لما يصلي ويرتاح يحسن الظن فيها..
ويقول ممكن يكون غلط طبي..
بس يرجع ويقول الدكتور اكد له على هالشيء..
هو متأكد من بنت عمه ويعرفها ويعرف تربيتها وماتسويها..
بس يناقض نفسه ويقول الشيطان شاطر..
والبنت يمكن انحرفت..
والأدهى من هذا كله أنها غادة..
هي اللي تدور حولها كل هذي الشكوك..
دوامـــــــــــــــــة عايش فيها وأفقدته التحكم بأعصابه...

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛؛؛؛؛؛؛؛

كانت في مكتبه تتحرك بشكل سريع تخاف يدخل عليها..
انا ماعاد أتحمل والله قلبي محتاج..
مشتاقة ل الراحة والطمئنينة..
حتى لو ضربني ولو قطعني..
ربي بيكون معي..
كانت تفتش في أدراج المكتب الخاصة فيه..
لقت اللي كانت تبيه ومشتــــــــــــــاقة له خرجته من الصندوق الحافظ له..
سمعت باب المكتب ينفتح وقفت بخوف وخبته ورى ظهرها..
شوق بنظرات شك\أنتي وش تسوين هنا؟؟
هديل\ولا شيء أرتب المكتب..
شوق\ترتبي المكتب؟؟وش مخبية وراك؟؟
هديل\ولاشيء..
شوق بعصبية\طلعي اللي معك..
هديل\صومي وفكيني من شرك..
شوق\يعني ماتبين تطلعين اللي سرقتيه..طيب اوريك
وبصوت عالي صارت شوق تصرخ تنادي على غازي..
وفي لحظات كان غازي وأمه موجودين بالمكتب..
شوق\لقيتها تفتش بمكتبك ولما شافتني خبت شيء ورى ظهرها..
ومو راضية تعلمني وش يكون..
غازي يناظر بهديل\بس أنا متعود أخليها ترتب المكتب وين المشكلة..؟؟
شوق بقهر\هي سرقت شيء أنا متأكدة خلها توريك وش معها..
غازي\ماهي مجبورة توريني اللي معها..يمكن شيء خاص فيها..
شوق\لا مو خاص فيها..هو شيء لك وخذته من مكتبك..
أم غازي\شوق لاتتهميها زور..
شوق\يومه أنا ما اتهمها هي سرقت شيء ومخبيته..شوفيها..
غازي يقرب من هديل ويوقف جنبها وهي تراجعت ولصقت بالجدار..