لآاتفوتكم >نوره وجدتها الزاحفه

>نوره , لآاتفوتكم , الزاحفه , وجدبها

لآاتفوتكم >نوره وجدتها الزاحفه

هاااااااااااااي بنات اليوم اقول لكم قصه نوير وجدتها وامها واختهاو اخوها ههه العائله الكريمه


الجزء الأول

//

جدتي ياجدتي ياجدتي
هذي جدتي صيته فاكهة البيت< غصبتني امدحها
جدتي صيته طال عمركم عمرها وشسمه الظاهر 90 المهم ان العداد فطس وهي لهاالحين حيه

جدتي هذي مأذيتنني وذا ماغير تسرق نعالي

ولسانها اللهم ياكافي خلوني ساكته احسن

وذبحتني بالقهوه ماغير دله رايحه ودله جايه

حتى اني في عرس اختي ماخذتلها صوره مع دلتها<المفروض تاخذها مع العروس بس جدتي الله يهديها

وبعد وشسمه لاشفتني على الابتوب نشبتلي هذا وش هو يهرج معتس طيب علامه مايكل ومايشرب مثلنا يوم انه يهرج

المهم ان هالجده هبلت فيني


انا عطيتكم مقدمه عن جدتي
وماعرفتكم علي
انا نوره عمري 20سنه تخرجت من الثانوي وجلست بالبيت لأن نسبتي تفشل مادخلك حتى قسم فراش

عندي أخت اصغر مني بسنتين
اسمها هيا اقرب وحده لي

وعندي أخت اكبر مني اسمها حصه عمرها 36 سنه متزوجه وعندها ولد وبنت

وأخوي الطيب الحنون الي مايناديني الا بانواع الدلع

يعني مثلآ لاكان رايق يناديني بسحيله ام الخلاقيين

هذا اخوي اسمه فارس

متوظف طبعا ومزيون البنات يتحاذفن عليه من كل جهه

**************
اتركم عاد انا بروح لامي تناديني واذا شفتو امي تبوسني غيرو القناه لو سمحتو

امي: نوير ياجعلتس ماتعرسين
انا: هاآآآه وش تبين وانتي ماغير تدعين على ماأعرس وتقولين انتي ورى ماجاتس خطيب ولاحد طق الباب يبيتس
من دعاويتس الله يحفظك

امي وهي وشسمه منزله نعلتها ومسكتها بيدها اليمين : مواعينتس ليش ماغسلتيها للحين

انا:وش رايكم اتوظف خدامه عندكم مو احسن هالحين المواعين بتطير خلاص بروح انظفها الحين

امي وتحذف النعله بالأرض ومير تلبسها: يالله يالله غسليها وسويلنا دلة قهوه

وانا اصرخ على امي: خير مافيه الا انا بالبيت وينها هذي بنتس المصون هيا ماتجي تساعدني

هيا وهي تطل من الدرج: انا عندي أختبار تحسبيني مثلتس فاضيه

امي: ايه يابنيتي روحي ذاكري شدي حيلك وجيبي نسبه تبيض الوجه مومثل بعض ناس

انا:خير خير من تقصدين هذا وانا ماني مقصره معكم
<<وقمت ابتسي واقول

ياربي انا ماحد يحبني مالت عليكم وعلى من يقعد في هالبيت
المهم اني رحت للمطبخ اغسل هالمواعين
واسمع عصاة جدتي جايتن للمطبخ
وجايبه خويها معها << الدله

مير واجي ورى الباب يوم دخلت وانا اخرعها
ذا وهي تصمخني بالدله
انا: يااااجده والله ماينمزح معتس
جدتي: انتي من
انا: انا خيريه بنت حسب الله
جدتي: والله والنعم فيتس
انا: والنعم بحالتس جده شكلي بفقد عقلي والسبه انتي

جدتي: اجل انتي فيتس عقل

انا: لحظه جده تراني من اصبحت وانا اهانه ورى اهانه تجيني
جدتي: انتي نوره مير جابتس الله دوتس سويلي قهوه
انا: استغفرالله الظاهر مكتوب على جبهتي عامل قهوه
الله يصبرني

المهم قعدت اغسل مواعيني واغني بصوت عالي وانا رافعه قميصي لنص ساقي ومتحمسه + مندمجه
الا والتلفون يرن

عاد انطلقت له ورديت وانا الهث

انا: الو
المتصل: السلام عليكم
انا:وعليكم السلام
المتصل من انتي
انا:وش دخلك
المتصل:الباب
انا:لحظه خلني اتغصب الضحك هاهاها
المتصل موصاحيه انتي
انا من سنة عيص ميص ماني صاحيه
المتصل:هههههههه اقول امتس وين بس
انا:بالحمام وش تبي
المتصل:طيب قوليلها ان ناصر اتصل
انا انعرف واحد بهالأسم على العموم دق بعد يومين يمكن نتذ***
ناصر:انتي متأكده انتس صاحيه
انا:الحمدالله والشكر وش رايك اجل نايمه والي يكلمك من يالخبل
ناصر:ههههههههههههههههههههههههههههههههههههههههههههه

ملاحظه وياليت ماتدققون واجد بهاالملاحظه: تقطعت يوم سمعت ضحكته

امي: يآآآآآآآوه انتي من تكلمين يا.....طوط تم التشفير حفاظا على سمعت المنتدى

انا: تعوذي من ابليس واتفلي عليه يايمه هذا واحد ناصيتس انتي

امي وتورد خدودها: هو من

انا: ياخراشي ياخراشي وش عندها نانسي وردت خديداتها

من قلت هالكلمه مادريت الا نعلتها في جبهتي

وحطيت رجلي للحوش والقى جدتي منبطحه عند دلتها الفنجال ورى الفنجال

انا: مسيتي بالخير ياأم خلف
جدتي مسيتي بالنور والسرور اقلطي اقلطي ياالله حيها تو مانور المكان
انا:الله مير يسلمتس والله مستعجله وراي شغل ماخلصته

جدتي: العمر يخلص والشغل مايخلص حلفت عليتس فنجال واحد بس
انا:انتي والله مافاصل مختس غيرهالفنجال
واسمع صوت امي جايه
وانا اطمر ورى جدتي: انا ناخيتس ياأم خلف انتس تفكيني من هالمبليه

وجدتي أتحمس وتحذف الفنجال ويروح الفنجال ستين قطعه بالحوش: انا بنت ابوي والله ماتمس شعره من راستس
انا:كفووو والله
ومير تجي امي شايشه مدري وش قايلها الزفت ناصر

امي: انتي انتي يومنتس مستلمه الرجال بلسانتس انتي ماتستحين
جدتي وهي تمد عصاتها:وخري هنا لاخلي هالعصى ترقص على ظهرتس
انا:وقصم بالله اني بس هذا قلت هذا

امي: ايه تلعثمي تلعثمي يالي ماتستحين فضحتيني جعلتس ماتربحين

انا:انتي وش حقه معصبه ومنهو هذا

جدتي: نوره وش جايبتس وراي
انا:تكفين لا مو وقته تشبكين هالحين

امي:هذا ولد عمك الحين معاد هو خاطب منا ابد والسبب السانتن

انا: ولد عمي وخير ياطير لايخطب بالطقاق ,, اصلاً انا قاعده على تسبدتس مافيه زواج لاتحاولين نيهاهاهااااي

المهم ان امي ماخلت كلمه حلوه ماقالتها لي << اي اي هين


الجزء الثاني

في صباح يومآ جديد

هيا: قومي يالخبله من اليوم نايمه

انا:هيوش اطلعي برى احسنلك

هيا:ياويلتس من امي معصبه تحت قومي بسرعه

واسمع صرخت امي وانااقوم بسرعه واحذف هيا برى الغرفه

وانطلق اغسل وبعدماخلصت

نزلت تحت وانا انطلق للمطبخ ازين فطورهم

رتبت الفطور وزينت السفره
وجبت قهوت جدتي عشان ماتمردغني( تكفخني) بعصاتها

واناديهم كلهم وتجي جدتي اول وحده وتجلس على السفره
واناجالسه جنبها انتظرباقي العايله تجي

وجدتي تمد يدها وانا الي اطقها بخفيف واقول:اصبري لين يجون يالمشفوحه

جدتي:سود الله وجهتس ترديني عن عيشتس

وانا اطالع فيها بطرف عين وامد يدي واكل(ناويه اقهرها) : ايه اردتس ونص انتي مشفوحه لامديتي يدتس راح كل الي سويته غلطه

جدتي:الله يالدنيا نسيتي يوم اجيبلتس بسكوت ابو هلال وماجيب لأختس مزنه
انا:اهاااااااااااااا بدينا بالفصله الي مال امها داعي ,, مزنه أختي يامفتريه

جدتي:اقول الشرهه ماهي عليتس على من يجلس على سفرتس صبي قهوه صبي

مير واضحك على شكل جدتي واصبلها قهوه

ويجي اخوي فارس الرقيق الحنون ويدزني والا اني بحظن جدتي

انا:هيه انت !! قلت الاماكن مالقيت الامكاني

فارس:اقول بس قهويني بسرعه بأمشي الحين

انا:وين بتطس

فارس مو شغلك

انا:لاشغلي ونص انت هالأيام كاثره طلعاتك وانا أوخيتك ماتطلعني

فارس:أيه تيبغيني اطلعك انا مانسيت اخرمره طلعتك فيها فظحتيني فظيحه خليتيني مضحكه بوقتها

انا:ياشينك بوقتها مدري وش جاني كنت فاضيه+فاصله

فارس:هالأسبوع لاتحلمين اطلعك وبعدين على حسب يمكن ماطلعك ابد

وانا اقوم واحب راسه:ياحليله اخوي اطيب انسان بالدنيا هذي

جدتي: مافيه اطيب من سعد

فارس:سعد من ياجده

جدتي: سعد الي جنبك

وانا اطالع فيها بخز:انا سعد ياجده
فارس :ههههههههههههههههههههههههههههههههههههههههه
ههههههههههههههههههههههه شكلتس ضابط على سعد
وانا أحط حرتي بالخبز عشان ماغلط على جدتي قدام فروس وبعدين مايطلعني

المهم جت امي وهيا
وتجمعنا على الفطور وافطرنا
بعد الفطور رحت اغسل مواعيني

واسمع امي تصرخ من الصاله علي
امي:يآآآآنوره جدتس كبت القهوه بالحوش روحي اغسليه

انا:خير ان شاءالله انا عندي شغل بالمطبخ خلي هيوه تغسله
امي:هيا تذاكر اغسليه انتي بيجي رجال الحين لاتفضحينا

انا:تذاكر احلقي راسي على الصفر ان كانت صدز تذاكر
وانا ارفع قميصي وانا اتحلطم واطلع للحوش والقى جدتي تغني

وانا اقول الجدتي:جده اطربيني انا باغسل الحوش وانتي غني
جدتي: يالله يافهده بغنيلتس وارقصي

وانااضحك بصوت عالي مثل السكرانه : فهده ههههههههههههههههه

واشغل المويه واقعد اصبه فالحوش واحط الصابون عشان يحلى التزحلق

وجدتي تقوم تصفق وتغني بصوتها النشاز لا ونص الحروف بالعتها

مير وأتحمس وفك شوشتي وارقص

عاد رافعه القميص ومستانسه بشعري الغجري(قالبته الشمس وصار غجري)

وفي أثناء حماسي سمعت ضحكه قويه

وانا التفت والقاه واحد اطخم عريض المنكبين طويل لابس نظاره كوشخه وش اقول وش اخلي شاب مزيون مزيون ياخذ العقل

مير وافهي بوجهه وهو يضحك

واسمع صوت اخوي فارس يصرخ : درب درب

وانا التفت بنحاش واشوف جدتي تحزم ثوبها وتحط رجلها

افآآ هذي وانها تشكوى من رجولها اشوفها وش سبقها الحين

وادخل بسرعه داخل وانا وجهي مولع نار واحس وجهي يعرق واصدم في هيا

هيا:وش فيك وجهك علامه صايرا طماطه
انا مازلت مفهيه وفاتحه فمي تقل مسطوله
هيا:ياشينك ليش دخلتي كنت جايه برقص معكم

واسمع صوت فارس وهو جاي وانا أحط رجلي وادخل المطبخ

//

الجزء الثالث

فارس: خلي اختس المسطووله تسوي قهوه الحين فيه رجال

هيا: آآآآآآآآآآآآف طيب طيب

فارس:اقول لاتتأففين الا تعالي من الي كانت تغسل الحوش تو انتي ولا نوروه

هيا: هااه لامو انا نوره هي الي كانت تغسله

فارس : الله يفشلهاا الظاهر ناصر شايفها من اليوم وهو يضحك اختس ذي خبله

هيا: آآهاااا وانا اقووووول

فارس : ليه انتي عارفه ؟؟

هيا: لالا بس شفتها تركض واستغربت

فارس : اقول لايكثر وروحي زيني القهوه ولا خلي الخبله تزين القهوه

وبعدها جتني هيا بالمطبخ وهي تدندن

شفتوه حبيبي وبص عليه وبصيت عليه دن دن دن

ولمحني باأميصي ورحت اركض واول يالهووي دن دن دن

انا: وش عندها هيفاء وهبي

هيا وهي تناظر فيني بنظراات مكر : ابد ماعندي شي بس طرباانه شوي

وانا وجهي مازال مايسوى طخه واتلفت يمين ويسار

وماحط عيني بعينها عشان مانفظح ويبين بعيوني الحب << اهب امداتس تحبين


هيا: على فكرره فارس جاء تو

وانا التفت بقوه بغت ارقبتي تنكسر : وش قال

هيا : بسم الله عليك وش فيك

انا: اخلصي لاحط هالقدر براستس

هيا: هههههههه طيب طيب قالي خل اختك الخبله تسوي قهوه عندي رجال

انا: يوه بس قهوه هو يامر من عنيا الثنتين

وامشي وانا اطقط باأصابعي وهز واغني

وياملي قلبين غدتبه نوره , غدتبه نوره دن دن

وطقطق بالقدر واختي هيا ماسمع غير ضحكها

انا: وش يضحكك انتي

هيا : مستغربه يعني تسوين القهوه من دون ماتسبين وتلعنين

انا: لا هالمره غييير >> وعيوني يطلع منها قلوب

هيا: اماانه طلبتك نوره قوليلي شفتيه

وانا اعطيها ذيك الخزه ( بدت الغيره ) : من الي شفته من تقصدين انتي

هيا: اقول موب علي تو فارس يسألني يقول من الي كانت تغسل الحوش الله يفشلها شكل ناصر شافها

وانا اشهق من قوة الشهقه سمعتني جدتي وقالت يرحمك الله


انا: نااااااااااااااااااااااااصر لايكون ناصر ماغيره الي تقوله امي الي يطلع ولد عمنا مدري ولد بقرتنا

هيا: وش فيتس تشهقين طيب ايه ناصر ولد عمي ماغيره

انا: تكفييييييييييين قولي غير هالكلام لالالا مستحيييييييييييل تهيء تهيء

وانا اهز شوي وارجع اضرب راسي وانا انتفض

هيا: تف تف بسم الله عليتس ياوخيتي وش فيتس تقل كنتس ملبوسه


انا: ياويلي شافني ياهيا وانا رافعه قميصي لانص الركب عاد ليتني كنت كاشخه يوم يشوفني

حظي نحس من يوم انولدت تهيء تهيء

هيا: هههههههههههههههههههههههه طيب عادي خليه يولي المهم انتس انتي شفتيه حلو ولالا

انا: وش اقولتس ياهيا وش طول وش جماال نزع قلبي نزززع من مكانه

هيا: يالتسذوبه امداه ينزع قلبتس

انا: ايه مو انتي تعرفيني اروح وطي مع المزايين وماعندي مشاعر محدده اي واحد مزيون احبه واعطيه قلبي على طول

هيا: ههههههههههههههههههههههههه وكم لتس قلب انتي

انا: هو قلب واحد بس كل ماجاء مزيون اخذته من الي قبله وعطيته الثاني الين ارسالي على بر يعني على حسب الزين

هيا: عااد من زينتس انتي ههههههههههههههه



فارس: مطولات الأخوات وين القهووووه هااه

وانا وهيا نلتفت على فارس وحنا نصرخ ونسكر الباب

هو الظاهر انه انخرش وراح


انا: تهقين سمعنا ياويلي ياويلي << وانا اصفق وجهي واكرر ياويلي

هيا: لالا ماظن بس انتي اعجلي وسوي القهوه ووديها


بعدها زينت القهوه وانا اجي واعطيها اخوي فارس وهو يطالع فيني بشك

فارس: طيب اخذت القهوه وش موقفتس للحين

انا كنت احسبه بيشاورني ويقول موافقه ولالا (ادري شطحت زياده تهيء ) : هااه لالا خلاص يمكن نسيت

فارس : وشو وش نسيتي

انا: لالا خلاص روح

وانا اروح وانا اطامر بالصاله والف على اخوي واعطيه بوساات << تقل مهبوله

فارس راح وهو ميت من الضحك

والقى جدتي حاطه على قناة روتانا طرب

وفيه اغنيه للخبل المسطول هذاك الي يقول والي تأصر تنوره تلحئها عيون الشبااب هييييييييييياااه

وجدتي تهاوشه : ول عساك ماتربح اعنبوه وش يقول هذا اليهودي يبي يفسد بناتنا

انا : ايو الله لو حنا نقصر التنوره يمدينا اعرسنا من سنة جدي مو ماغير متدهملين بهالقمصان مالت علينا بس دفنا جمالنا بهالقمصان

وتسمعني امي : وشووووو وش تقولين انتي والله الي معاد تستحي ولاعاد في وجهها دم

انا: وش دراتس ان مافي وجهي دم شاقته وشايفته

واطالع في جدتي والقاها ترفع ثوبها وتناظر في سيقانها

وانا اصفق : اجل يهودي ياجده ههههههههههههههههههههههههههه

امي : انزلعي انزلعي جدتس تبي تدهن رجيالاتها بفكس

انا: رقع يامرقع لاترقعين الا تبي تشوف سيقانها وتقارنها بسيقان هالمزيونه

هههههههههههههههههههههههههه

هيا: راحت عليتس ياجده رااحت انتي الحين عجزتي سيقانتس تقل علك مرمي بالحوش

انا : ههههههههههههههههههههههههههههههههههههه لالا حرام عليتس قويه علك لالا تقل كنها برقع عالجته نعجه

والله وانا وهي مندمجات مادرينا غير عصات جدتي جايتنا تمشي ميتين

وحنا ننحاش الغرفتنا

دخلنا الغرفه وحنا فاطسات من الضحك على شكل جدتي يوم عصبت


وانا اطل مع شباك غرفتي : هيووه تعالي تعالي خلينا ننتظره الين يطلع عشان تشوفينه بس انتبهي لاتحبينه تراني حجزته قبلتس

هيا: ياشيخه مخليته لتس انا طمعانه بواحداً ثاني هذا مابيه

انا: نعنبو ذا الوجه وراتس ماعلمتيني وانا اختس

هيا: اسكتي يانوره آآآآآآآآآآآآآآه ياقلبي تعرفين سعود اخو صديقتي ساره

انا: لا لا لاتقولين حبيتي ذاك الي تقل شكله كنه كوماار راعي باقالتنا قبل

هيا: اقول لاتغلطيييين عليه

وانا اصفق واطق رقبه : ايوه ايوه بدينا من هالحين تدافعين عنه وهو مادرى عنتس

عاد تبين الصدق والله ماعندتس ذوق انتي الحين شوفي ناصر وبتعرفين ان الي تحبينه كومار احلى منه

وهي تصمخني على راسي : انطمي يالزفته شكلهم بيطلعون

وحنا نفتح عيونا على الأخر نبي نركز

وهو يطلع من الديوانيه ويطلع النظاره ويمسكها بيده

انا: ياويلي ياهيا اختس بتروح فيها ياهيا شوفي شوفي الرجوووله مالت علينا بس

هيا: العن خييييييييييييييييره وقصم طنخه

وانا ادزها من الشباك : هذا حلالي مابيتس تطالعين فيه روحي طالعي بسعود حقتس

واانا اقعد اتمقل بخشته وهو يضحك وفجئه رفع عينه وهو يسولف وانا مندمجه مع حركات يده ومع جزمته << طالعي بعيونه على الأقل مو جزمته يالخبله

اول ماحطيت عيني بعينه حسيت كن كهرباء لمسني وقمت انتفض وانا بسرعه اوخر عن الشباك

وقمت اتنهد

هيا: سلماات يالحبيبه وش صار طلع ولاللحين

انا: طالع في عيوني

هيا: ههههههههههههههههههههههههه لالا ماتحمل لميس ويحيى انا

انا: اقول الفقيها بس الشرهه ماهي عليتس على من يقولتس زيين



المهم مظت تلك الليله وانا افكر واحلم اني تزوجته وجبت منه عيال وبعدها تطلقت وتهاوشت

يعني خططت للمستقبلي هههههههههههههه

وبكره اكمل الجزء الرابع اذا فيه تفاعل

لا تنسون من الرود التقيـــــــــم

المصدر: منتديات تراتيل شاعر - من قسم: قصص - روآيات - حكايات ▪●

---

gNhjt,j;l >k,vi ,[]jih hg.hpti >k,vi gNhjt,j;l hg.hpti ,[]fih

هههههههههههههههههههههههههههههههههههههههههههههههههه ههه

وربي عشششت جو مع هالقصصه

ي لبيه قسسم رهيبه خصوصآ بالعميه مو بالفصصحى

لا لازم تكملين لو م يرد عليك آلآ انا ((- آنانيه هههههههه

بجد قصهه رهيبه وتعيشهآ أكثر البنآت

تقييمي لك ي روحهآ ..

سلمت يدآك..على جميل طرحك وحسن ذآئقتك
يعطيك ربي ألف عافيه..بإنتظار جديدك بكل شوق.

طرح رائع كروعتك.
سلمت يمناك.
وبارك الله فيك

يععطيـك الـعـافيـهَ ع جمَ ـال طرحـك..||~
د ـام عطـائك ../..وروعـه تم ـيـزك..
(..م ـودتي..)..

يعطيك العافيه علي الطرح ) ...
ب إنتظآر جديدك وعذب أطروحآتك...)
إحترآمي وتقديري...)

ههههههههههههههههههههههه

عزوووفه وين مخبيه هالمواهب
انتظر باقي الاجزاء

هههههه ناااايسسس الرواية
تضحك والله
تسلميين عزووووف
الرواية الرائعه .
انتظرك لا تطولين

مشاركة رائعة .. بانتظار جديدك
وسأكون دومَا متابعة
باقاتُ وردي و ودِّي