منتديات تراتيل شاعر - عرض مشاركة واحدة

03-05-2022, 10:22 PM

نظرة مرعبة من عم مختار :: طب إيه رأيك إنى هخليك تدخل التربة وتدفن عماك كمان ..
تهللت أساريري فرحاً وفضلت لازق فى عمى مختار طول الوقت ..
طلعنا فوق سطح البيت وشفنا كل الأجواء من فوق .. عرفت فى اليوم ده معنى اليوم الأسود بكل معنى لذلك المصطلح.
شفت نساء متشمات بالسواد يتوافدون من كل أطراف القرية ويدخلوا البيت
فى أسراب سوداء .. أما داخل المنزل فأقسم إنى ما شفتش غير اللون الأسود
ممتد من بوابته ومدخل البيت وفنائه، كل المنزل زى الوباء المميت..
فضلنا فوق بنتفرج لحد ما شفنا حاجة خلتنى نزلت أجرى.
قبل الضهر بساعتين لاقيت ثلاثة كده بدقون داخلين البيت وشايلين شنط سوداء .
بصراحة خفت .. وبدأت أركز ... سمعتهم بيقولوا : جبنا ورق السدر والمسك ..
وهنا كانت أول مرة أعرف حاجة إسمها غسل الميت ..
ودخلوا الأوضة ومعاهم أبويا وعم مختار وإبن عمى ، وقفلوا الباب ،
كنت هتجنن وأشوف .. لحد ما الباب إتفتح ووالدى خرج منها منهار من البكاء ،
وفضل يقول : آه يا خويا آه يا شحاته .. يا ضهرى ..الباب إنساب
متوارب فسرقت النظر جوه وشفت رجل عمى وبعدها وشه .. أصفر شاحب .. خلى دقات قلبي تتسارع .
ما أقدرش حتى أقول إنه أصفر ، أنسب كلمة هي لون الموت ..
كان شبه النايمين ، لكن دقات قلبي المتسارعة كانت بتقول شئ تانى
.واحد من المغسلين إتحرك ووقف قدام وش عمى ، وبعدها إتحرك من قدامه تانى فإذا بى أجد عمى عينيه مفتحه !!
أيوه مفتحه وبيضاء تماماً ومفيهاش الننى الأسود خالص ،
وحسيت بشعر رأسي كله بيوقف وحرارة انتابت جسمى كله
ومع كل هذه الحرارة رعشة عنيفة اجتاحت جسمى بالكامل إنتهت
مع الباب وهو بيتقفل من جوه .. اتقفلت شاشة عرض أول فيلم رعب حقيقى اشوفه فى حياتى