منتديات تراتيل شاعر - عرض مشاركة واحدة

04-30-2017, 09:15 PM

الله يحيّيك ويـبقيك .. ياندّوش
وكلنّا شرف والله بالتواجد بموضوعك .
وان شاء الله يعجبكم مايُكتب بالدفتر لهذا اليوم .

بسم الله نبدأ ../

يالله حّي كل من تواجـد هنا ..
وشلونـكم عسـاكم بخير وعافية

معــكم اخوكم :
ابـراهيم حمـود ..
الملقّب بـــ ( ابوخليل )
والناس ينادوني ابوخليل من قبل الدراسه
يعني كنية من ايام الطفوله كـ تمليح وطوّلت معي
الحقيقة وصلت مرحلة ادّور اللي يناديني بـ ابراهيم

مُحـب للفن عامة .. متابع للمسلسلات والافلام والمسرحيات العربية القديمة بشغف ,
حقيقةً لاأعتبر مايقّدم في جميع انحاء العالم العربي فن ,, لتغيّر المعاني والمقاصد .

* أُجيد التفاعل مع الحديث ولكن لاأعرف كيف البدأ فيه .

* اعاني كثيراً من مشكلة العمر في المنتديات فـ كل عضو يشكّل لي عمر والمصيبة اني من 2007 الى هالسنه 2017 وانا مثبّتهم على نفس العمر

* فضـولي جداً بحياة من اعرفهم , لدرجة يومني صغير مره كنت اسأل امي عن طاقيّة اخفاء البسها وادخل بيوت حارتنا ,, ودي اشوف وش يسوون الحين

* من كان عمري 7 سنين الى الحين وكل من شافني قال : منين الاخ ؟ ,, شكلك قدييم
لاني طالع على جدّي بكل شي حتى الملامح والحركات لذلك ملامح وجهي غريبه عن عيال هالجيل او جيل السابق

* بُشرى سارّة لاهل المنتدى مافيه غيركم اعرف باللي اكتبه من قصيد وكتابات .. ماغير انتم وثلاثه بس
والا برّا المنتدى اصكّها حوله كني مافهم ولاعرف شي
استمتع اذا سولفو عن الشعر والادب واشوفهم على خطأ بس اسكت احب هالمواقف ذي

* يظن الجميع ان كوني من عشّاق الفنان عزازي ان ذوقي فقط له .,؟ لا ..
انا مطلّع على كافة الفنانين قديمهم وحديثهم والراديو ينقل لي كل جديد وفيه كثير من الجديد يعجبني مره

* يحزّ بخاطري اذا سمعت اي سالفة مضمونها معاناة حرمة سعودية مع سوّاق والا شاب والا شي .
ويضيق صدري واقوم من المجلس , لذلك اخوياي اذا جلست بمكان مايجيبون لهالسوالف طاري . !

* اقدّر السوالف واهلها كثيير , خصوصاً اللي يعطيك من عمره ويسولف ويسولف اهم شي ترتاح له ويرتاح لك , لذلك دايم تحصلوني بقسم الالعاب .

* اهوى الاستماع لحياة الاشخاص ومشاكلهم . وممكن اجلس ساعات متواصلة بس لحل مشكلة وحده