منتديات تراتيل شاعر - عرض مشاركة واحدة

02-12-2017, 11:09 AM

صبحكم الله بالخير يا ال تراتيل الكرام ،،،

اهلاً بالانيقه كبرياء انثى شكراً للاستضافه الجميله

بس انا قلت لك انى طبيب شعبى مو دكتور بشهاده دبستينى الحين ولكن الله يعين اللى ياخذ من وصفاتى
انا سعيد بتواجدى هنا وبأى مكان يكون فيه فائده او رسم ابتسامه على محياكم نبدأ الاسئله بأذن الله ،،،

_الطب مهنه رائعه ان تكون لسمه شفاء لمريض ؟مارائك انت بالطب؟
انتى قلتى فى البدايه مهنه رائعه فماذا تتخيلين ان تكون اجابتى امام شخص يعالج نفس على وشك الموت ويسعفها ،، الطب مهنه عظيمه ورائعه وتحتاجها البشريه قاطبه .
2_هل جربت _ى يوم تكون طبيب نفسك ؟وكيف
نعم جربت انا دوم طبيب نفسى انا ما احب زيارة العيادات وهذى عاده فينى خصوص اذا كانت الامراض بسيطه وهذى فيها ميزه حلوه وهى تقوية المناعه عندك
كيف ؟ هذى بسيطه مثلاً الحراره او الصخنه هذى اعالجها بالماء البارد الكمادات او انك تاخذ دوش نعم تحتاج وقت ولكن افضل علاج للحراره الماء وهكذا ،، بالمختصر اى شئ اقدر اصبر عليه واقد اعالجه ماراح اقصر مع نفسى المهم ما اروح للطبيب لانها شغلات بسيطه تبى وقت فقط وكثر المضادات والادويه تعالج شئ وتتلف شئ اخر .
3_عند اسعاف شخص تحبه اول تصرف راح اتصرفه ؟
شخص احبه واول تصرف راح اتصرف معه اكيد اعضه
مثلاً وحيد الراى انا احبه اذا ابى اسعفه لو كان طايح اجيبله اى شئ من ريحة شعيل البعير ويصحى مثل الصياد بس اشممه ريحة دجاجه يصحى ،، عموم الشخص اللى راح اسعفه وهذى مرت على لازم ارسمله ابتسامه عريضه وهذى مهمه للمريض واطمنه انو كل الامور زينه
النفسيه تلعب دور مهم للمريض .
4_مااهوالدواء الي ماتتمن تبلعه ثاني هههه؟
بصراحه انا قليل اخذ علاج وما عندى خلفيه عن الادويه كثير ولكن كلها ما احب اخذها .
5_جاتك حاله مريض زكام وصداع ماتتقترح من وصفاتك وخبرتك بالطب الشعبي ؟ ابدعنا

هذى الحاله ست كبرياء من الحالات العسره وتبيلها وصفه سحريه وهذى حلها عندى وانا ابو هندى وعالجت كثير من الحالات مثل هذا النوع ،،، نجيب عدد ثلاث بصلات مع حبتين ثوم ونجيب نمله عرجه ونمله حوله ونخلطهم مع بعض مع راس ديك بس يكاكى ولونه ازرق وبعد الخلط يشرب المريض قفشه قبل الريوق يعنى على الريج وعلاجها فعال ثانى يوم يقوم بس يكاكى المريض
وتلقينه يطامر من طوفه لطوفه .
6_هل انت من النوع الي يذهب للدكتور فور مرضه ؟
انا من النوع اللى لو يموت ماراح للطبيب واذكر مره رحت للطبيب مريض يوم وصلت باب المستشفى قلت ردونى تعافيت سبحان الله حتى ريحة المكان ما احبها .
7_هل انت تستخدم خلطات حتي تتعافي من المرض؟
حلوه خلطات جازتلى لا اكيد ما استخدمها ولكن احب اجرب ما يمنع يمكن تنفع .
اذكر لنا ماالخلطه والمرض ؟
فى خلطة الضفدع الزاحف هذى خلطه جداً مميزه تنفع للاصلع نجيب ضفدع زاحف يعنى ضفدع مواصفات داب ولازم يكون عمره شهر وثلاث ايام ونزاوجه مع ضب معضل مثل ضب ادمنت الاشقر وناخذ ناتج هذا الزواج المبارك ونخليه يمشى على راس الاصله بعد ساعه يطلع الشعر .
8_لو الامر بيدك مريض قرحه المعدة ماذا تقترح عليه من اكلات صحيه تخفف من معاناته؟
مريض قرحه دواه ميت جلده على بطنه يقوم يركض على طول ،، والله ياكبرياء على حسب ماسمعت يقول قشر الرمان زين له ومريض القرحه اهم شئ يبتعد عن التوابل واى شئ فيه حار مثل الفلفل بانواعه واهم شئ يدعيلى بعد الجلد .
9_لو عندك مستشفي كبير طلب منك اختيار دكاترة شاطرين
من تختار_ي من الاعضاء تري انا المديرة هههههه؟باي قسم راح تختارو لهم؟
هذا السؤال بصراحه مميز حلو حلو ،،
الاختيار راح يكون بهذى الطريقه ..
المدير اكيد كبرياء هى صاحبة الموضوع معصى تصيرى المديره بكيفك على انى صاحبة الموضوع استريحى المدير هو ادمنت رجل له خبره وكفاءه بصيد الضبان وشهادات فى هذا المجال الحق حق كبرياء لا تزعلين.
والدكاتره حسب التصنيف للاسنان نحط الصياد يحب يشلع اضروس الاعضاء والكتوره فاطمه اخصائيه جراحة الاسنان ،،
وللمعده وحيد الراى عندها طب عجيب بحليب النياق على طول يحوشك اسهال ،، وللقلب اكيد مالها الا اهلها اميرة الورد من اسمها الدكتوره نعناعه بنت بزار الدين كركم ،، اما البنكرياس هذى بصراحه مالها الا حلوة المبسم ،، اما العظام فهذى مهنه قديمه للست فاتن بنت البحرين عندها الاحزام الاسود ،، وبخصوص مرضى الكلى مالهم الا الدكتوره ملاك الورد على طول تبدلك الكلى وتحط مكانه بخاخ سياره ،، اما المراره اختصاصى هذى انا حق فقع المراره ،،
اما المسالك مالها الا الريم بنت الجنوب ،، وبخصوص
دكاترة التجميل وتوابعها من العمليات تفخ وشد وغيرها
هذى تخصص كبرياء انثى كلها علبتين سيلكون وابره وانت اللى ماشى والدكتوره لازورد الحسا هى تخصص سيلكون حتى فى مرضى عندها اثناء العمليه خلص السيلكون دبست شفايفه بدباسه الله يعين
وبخصوص دكتور التخدير هذى الدكتوره بسنت
والدكتوره همس اما العمليات الكبرى فهذى من اختصاص ابو خليل والدكتوره رحيل المشاعر ومرات يدخل معهم اذا الحاله مستعصيه الصياد وهذا الدكتور العالمى معروف عنده فرامه للزعل وبنتاع كلو،، اما الصيدله مالها الا اهلها صوف الادويه وتوابعها عند خياط تجيه فيك مغص يصرفلك دوى كحه ويساعده مزاجيه على كيفها حسب المزاج تصرف العلاج ويمكن مرات تقولك راجعنى بكره مزاجى متعكر ،، اما بخصوص طب العيون مالها الا حسايف يعالج حتى الحول اما الاذن وانف وحنجره هذى تخصص روز تجيب فيك العيد ممكن تبدل اذنك بعلبة بيبسى عادى الوضع وبخصوص زراعة الشعر هذى تخصص قصيميه رزه وضوء القمر وشموخ وايليه حتى لوتبى يزرعون لك عرفج براسك يزرعون اما الجراحه هذى تخصص يادلى يادلى عيون بيروت .

10_اذكر مرض تتمن يكون العلاج بيدك ؟
السرطان اللهم ياكافى الله يبعده عنا وعنكم
وعن كل مسلم هذا المرض الخبيث اتعب الناس وحصدهم .
11_نصائح للمرضي السكري حتي يستفيد منها؟
انصح مريض السكر يكثر من اكل السكريات والدهون ودايم يزعل ويعصب وما ياخذ علاجه بوقته ولا يزور الطبيب بستمرار ولا يدارى نفسه وطبعاً العكس هو الصحيح .
12_هل انت من مؤيدين الطب الشعبي ؟ ولماذا؟
نوعاً ما لماذا مرات فى امراض يعالجها الطب الشعبى .
13_وش تقترح للمرضي الذين يعانون من الارق ؟
انصح مرضى الارق اللى متزوج او متزوجه يتفقون على طلاق جماعى ويرتاحون لانو الاثنين يعانون من بعض
ويريحونا ويرتاحون واللى يبى وصفه اخرى ترى عندى انو المتزوج من الذكور ياخذله زوجه ثانيه ويحر الاولى اللى جابتله الارق اما الانثى ماعليها الا بس تبذ خفاه وكل يوم طلبات طلبات واسواق ومولات عشان الزوج يدخل الطب النفسى ويرتاح من حنتها . انتم لاتاخذون بنصيحتى ترى مو من صالحكم .
14_عضو ودك تجرم فيه من خلطاتك ههههههه ويجربها ؟
والله اكثر واحد اجرمت فيه وحيد الله يعينه ولكن ما يمنع اجرب عليه كل جديد والثانىه صاحبت الموضوع المجرمه كبرياء ودى اسويلها خلطة الدب القطبى او خلطة كبد الحوت وهذى الخلطات وحده بوحده .
15_هل قلبك قوي ؟من تشوف الدم والتشريح هههه ؟
لا اعوذ بالله انا جبان قدام هالسوالف ما احبها .
16_بيدك جمجمه لاتكون تاكلها

هههههه راح تستأصل منها امور اتعبتك وتزرع فيها امور تفيدك ؟
هالجمجمه هذى من زمان افكر فيها ودى اشيل من كل جمجمه الحقد والحسد والتفكير السلبى والكذب وتوابعهم من منقصات الحياة وازرع فيها الصدق والوفاء والحب والهمه والقبطه وتوابعهم من جالبات السعاده .
17_ماذا يوجد بصيدليه بيتك ؟
شدعوه عندى صيدليه بالبيت عشان يوجد فيها شى
ما اتعامل فيها ابداً .
18_القلم بين يديك ماذا تكتب لنابالروشته الطيبه ؟
هذى الوصفه غير عن كل وصفاتى اعلاه هذى الوصفه من محب للجميع اثنين اهتم فيهم القلب والسان اغسلهم دوم وطهرهم وطيبهم من اجود انواع الدخون والطيب بالذكر والاستغفار وهالاثنين لو اصلحتهم اصلحت كل شئ فيك .

كبرياء انثى الف شكر يا انيقه على الاستضافه الحلوه والمميزه وارجو انى كنت ضيف خفيف على الاعضاء
وارجو بعد لا يزعل احد من تعليقاتى ترى هذى التعليقات من محب لكم وحبيت اضيف نوع من التغير على الموضوع لانو موضوع طبى ولا لى فيه شئ لا من قريب ولا من بعيد ولكن ما اقدر ارد كبرياء بشئ
اسئل الله لى ولكم العفو والعافيه ولكل مسلم .

هذى صور لبعض دكاترتنا من الاعضاء انشهد راح فيها اللى يعالج عندهم .