منتديات تراتيل شاعر - عرض مشاركة واحدة - روايةأما غرام يشرح الصدر طاريه ولا صدووود وعمرنا ماعشقنا/11

01-03-2017, 07:17 AM

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛

وقفت بسرعة لما سمعت صوت السيارة بحديقة البيت..
ناظرت من طاقة غرفتها وشافت سيارته واقفة..
أرتبكت أول ما طاحت عيونها على وجهه..
أحتارت كيف تتصرف..
تظل بغرفتها اللي هي غرفته..
أو تروح لغرفة ثانية..
فضلت تظل مكانها لحتى تواجهه ويتفاهمون على وضعهم..
كل اللي في بالها تطلب منه يظل بعيد عنها..
مايلمسها ولا يقرب منها..
بعد عشر دقايق سمعت باب الجناح ينفتح..
حبست نفسها بعجز وهي ترتجف..
ثواني وأنفتح باب الغرفة..
دخل وترك الباب مفتوح..
تركي بهدوء\السلام عليكم...
مرام بخفوت\وعليكم السلام...
وكان هذا كل شيء قاله ..
فسخ شماغه وعقاله ورماها على السرير..
وتوجه لدورة المياهـ..
تحمم وبدل ملابسه بغرفة التبديل..
طلع وتوجه لسريرهـ..
أنسدح تغطى ونــــام...

راقبته بنظرات مصدووومة...
إلى أي مدى تجاهلها كأنها غير موجودة...
حتى كيفك ماكلف على عمرهـ وقال لها..
ماسأل عنها ولا عن البيبي..
طيب مو هذا اللي تبينه..
يظل بعيد عنك ومايتدخل فيك أبداً..
هزت راسها موافقة على كلامها..
وقفت تقنع نفسها إن رجفتها ماهي من الصدمة..
لانها يمكن جوعانة..

طلعت من الغرفة بهدوء تخفي شيء من الآسى بروحها..
وهو تنهد بتعب..
كان بخاطره يشوفها وهي حامل وبطنها منفوخ..
كان يتمنى لو يضمها ويسألها عن حالها..
وإذا كانت خايفة من الحمل او تعبانة..
يبي يعيش معها كل اللحظات مثل ماكانت تحلم وتتمنى..
بس الصد عنها هو احسن حل لها..
مايبيها تظل قلقانة والشكوك تلعب فيها..

غمض عيونه ونام مبسوط لأنه بيصحى وهي عنده في بيته..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛

طلعت من بيت أخوها ضايقة ومحتارة..
قيس موافق على كلام سلمان..
وتفاجاء لما قالت له إنها مو ناوية ترجع معه السعودية..
عاتبها وفهمها إن سلمان زوجها ولو مرت سنين على الموضوع..يظل زوجها..
قالت ماعندها أي استعداد تترك شغلها في ايطاليا وتروح معه ..
وقيس قال كلمته وين مايكون زوجك تكونين..
ثارت بقهر وقالت صارله سنين وهو ناسي ليش تذكر بهالوقت بالذات..
اضطر قيس يحكي لها عن سبب غياب سلمان عنهم..
وكيف ماكان يربطه فيهم الا رسائل أو مكالمات جداً نادرة..
ولا كان يقدر يتصل بياسمين أو يتواصل معها..
أنصدمت من كلام أخوها بأن سلمان كان مطلوب بقضية قتل في السعودية وهو كان هارب خارج بلادهـ..