منتديات تراتيل شاعر - انت ماتدري ولاعندك من الاحساس ذرّه

منتديات تراتيل شاعر (http://tra-sh.com/vb/index.php)

- ديوآن آلقصيد ▪● (http://tra-sh.com/vb/forumdisplay.php?f=27)

- - انت ماتدري ولاعندك من الاحساس ذرّه (http://tra-sh.com/vb/showthread.php?t=60100)

انت ماتدري ولاعندك من الاحساس ذرّه

http://mask-tub-et-brush.m.a.pic.cen...t/38416c16.png

لا تسل عن ضيقة ايامي وقلبي لا تمره
ضاعت دروبك على اخر ليل وجروحي عطايب

وان لمحت اسمي ترفّق به وبادله المبره
كثر مابادلك شوق وكثر ما ودّعك هايب

لك على يمة عروق القلب يالمغرور جره
ماتواريها السنين ولا تغيرها النوايب

والله ان قربك يسر الروح وفراقك مضره
وأنت علّة خافقي وأنت القريب من القرايب

ماقدرت اتوب عن ذكرك وعن حلوك ومره
ليه عن ذبح الغلا ياصاحبي مانته بتايب؟

هاك ميزان الجروح وقيسها ذرة بذرة
ماوزنت الا غلاك ولا طعنت الا الحبايب

كل مايطري علي ظلمك تشب الكبد حره
كن في صدري رماح القوم وسيوف وحرايب

كيف ابنسى ليلة زعزعت قلبي من مقره
انفرت كبدي وخفاّقي غدا قبر ونصايب

هلت دموعي وحلّفتك بربك الف مره
يابن آدم خف من الله ماورا ذبحي كسايب

أنت شخصٍ ماقدرت استوعبه خيره وشره
من عرفتك والدموع دموع والخفاق ذايب

لا تصدق كذبة الايام في وجه المسره
بسمة في عين طفل ودمعة في عين شايب

وان تذكرت الهنوف اللي على صوتك تشره
ضمها في صدرك الموحش وعرّضه الهبايب

انكسر حلم الليال وطاحت نجوم المجره
أبتدت شمس وتوارت شمس وجروحي عطايب

انت ماتدري ولاعندك من الاحساس ذرّه
أشهد ان مصيبتى بك من عظيمات المصايب