منتديات تراتيل شاعر - صون الكلام وصون نفسك ومبداك

منتديات تراتيل شاعر (http://tra-sh.com/vb/index.php)

- ديوآن آلقصيد ▪● (http://tra-sh.com/vb/forumdisplay.php?f=27)

- - صون الكلام وصون نفسك ومبداك (http://tra-sh.com/vb/showthread.php?t=36677)

صون الكلام وصون نفسك ومبداك

http://www.ro-ehsas.net/uploads/1445350220531.png

من زمرة الطاغوت حذراك حذراك
لا تبتلي بجروح يصعب دواها

وإلى مشيت اعرف دروبك وممشاك
احرص على نفسك وخالف هواها

أمّارةٍ بالسوء ما هي بتنهاك
اقبض عليها لين يجلى صداها

اقطع نواياها بدينك وتقواك
هلّل وعند الله سريعٍ شفاها

والعين لا تنظر بها من تعدّاك
المحصنه لو تلتفت لك وراها

اصبر على همّك وغمّك وبلواك
عف وتعفف لا يغرّك حلاها

واترك حرام القوت ما هو بيملاك
كل البطون الجايعه ما ملاها

رشفةحلال اتسد جوعك ومضماك
تسوى مشاريب الحرام وغثاها

واحفظ لسانك لا يجرك ويبلاك
اخذ الثمينه لوغلا مشتراها

الهرج ميزانك ويكشف خفاياك
كلمة تعيبك لا تبيّن نباها

صون الكلام وصون نفسك ومبداك
للنفس حشمة لا تفصّم عراها

اصمت مدامك عارفٍ سيرمجراك
لا تنقل النّمة وتبحث خفاها

يزول قدرك عند أقرب دناياك
لو هو ولدعمّك حياتك جفاها

خل الجهل لاتجعل الغيظ ياطاك
ترى الجهل سم القلوب وعماها

وإلى ابتليت ارفع إلى الله شكواك
لا بدّها الأيام تكشف غطاها

اصبر يزين الحظ ويزين مرماك
الله يفرجها ويدفع بلاها

لا تمنع المحروم لا من تنصّاك
الناس لأجل الناس وأحسن عطاها

ابذل لوجه الله والله يجزاك
مثل الغروس أتطيب للي سقاها

لا ضاع معروفك ولا ضاع حسناك
إن كانها لله تلقى جزاها

جارك ولو هو جار تسقيه منماك
عليه لا ترفع يدينك عصاها

أحسن جوار الجار لو كان يشناك
ترى العرب تحشم كلاب اقصراها

بكره يشد ويكتب الله فرقاك
عساه يذكر جيرتك مانساها

الظلم شين ويجعل النار مثواك
راع الظليمه عيشته ما هناها

فوقك إله العرش عالم نواياك
ينظر قلوب الناس وش محتواها

يسمع بما تجهر وعارف خفاياك
بأمره شروق الشمس ترسل ضياها

والضيف له حقٍ إلى حل بحماك
قلّط ضيوف الله وأكرم لحاها

وعليك باللي حزة الضيق يفداك
لا شانت الدنيا ودارت رحاها

لا من زهمته لو على الموت لبّاك
عيني لجل عينك وروحي فداها

حذراك من بعض المخاليق حذراك
بعض العرب ما تفرقه مننساها

تايه وضايع بين ذولا .. وذولاك
فيه الجهالة واصلٍ منتهاها

http://www.ro-ehsas.net/uploads/1445350220622.png