رد: رواية العــــزوف الي تذبح القلب بغلاها /3
 

الحرمه: اركبي بسرعه ودفتها بخفيف
ركبت هيفاء السياره غصب عنها لانها ما قدرت تقاوم
وهي خايفه وميته رعب ولا تدري وش القصه ما كانت مركزه بأي شي ولا تدري عن أي شي غمضت عيونها وقفلت تفكيرهاا وانتظرت مصيرها المجهول
:::::::::::::::::::::::::::::::::::::::::::::::::: :::::
في بيت العم عبد الرحمن
العيال كلهم جاعوا
وطلبت لهم ام تركي وجبات من هرفي وقاعدين ياكلون
تركي: خلود شوي شوي على البرجر ترا موب طاير
مشعل:.................................
تركي: مشعل وش فيك اضحك خل نفشلها
مشعل يكمل اكله وهو ساكت
تركي رجع يكمل ذب عليها ويضحك
علباله انه كذا بيطلع مشعل من اللي هو فيه
ما يدري ليه مشعل من اول ما جاهم كان مبسوط شوي عايدي
بس من يوم ما سمع عن حفل النجاح اللي بيروح له تركي مع ابوه تضايق
دخل العم عبد الرحمن البيت
عبد الرحمن: اووه مشعل عندنا
مشعل: هلا عمي
عبد الرحمن : اجل بتروح معانا العصر للحفل
مشعل: لا باروح استراحة خالي
عبد الرحمن : روح معانا مراح نطول وبعدين نحطك باستراحة خالك
مشعل بضيق باين على وجهه: لا مابي
عبد الرحمن تذكر ان كل العيال بيجون مع ابائهم وحز في خاطره هالشي
تمنى ان اخوه يكون موجود ولا يشوف مشعل بهالحاله
عبد الرحمن : مشعل اذا خلصت اكلك تعالي بالمكتب ابيك ضروري
مشعل: ان شاء الله
"""""""""""""""""""""""""""""""""""""""""""""" "
رنا: الو هلا طلال
طلال: اهلين مبرووك خلصتي
رنا: ايه الحمد الله وعقبال النتايج بعد اسبوع
طلال: ماشاء الله عقبال العزوف ان شاء الله
رنا: امين المهم ما ودك نحتفل بهذي المناسبه
طلال: الا ولووو
رنا: خلاص انت تعال وطلعنا نتغدى برا
طلال: الحين احلمي
رنا: تكفى طلال لانوو العصر بنروح للاستراحه
طلال: وين ما اقدر اقل شي على 2 كذا وماني طالع بهالشمس
رنا: تكفى عشاني موب كل يوم باخلص مدرسه
طلال: هههه طيب بس انتي اللي تدفعين
رنا: تيب يعني تبي تعجزني ولا يهمك انا ادفع
طلال: ومن وين لك يالحسره
رنا: ما عليك انا ادبر
طلال: ههه نشوف بس اجهزوا على 2
رنا: ان شاء الله
"""""""""""""""""""""""""""""""""""""""""""
دخل مشعل لمكتب عمه عبد الرحمن
وعبد الرحمن مو عارف شلون يفاتحه بالموضوع
عبد الرحمن : اجلس شعولي
جلس مشعل وهوو ينتظر وش بيقوله عمه
عبد الرحمن : ما قلت لي ليش ما تبي تروح معانا اليوم للحفل
مشعل: بس مابي وعندنا استراحه
عبد الرحمن : اكيد

رد: رواية العــــزوف الي تذبح القلب بغلاها /3
 

مشعل:....
مشعل تغير وجهه بزياده ومو عارف وش يسوي
حس ان عمه كانه داخل جواه وعارف ان هذا مو السبب الحقيقي لعدم روحته معاهم
مشعل بتردد : كل العيال بيروحون مع ابائهم وانا ..

عبد الرحمن حاول يحافظ على بروده عشان ما ينهار قدام مشعل ويزيده باللي هو فيه : ما عندك ابو بس عندك اعمامك وعندك اخوك طلال انت منت لوحدك
مشعل ودمعه بعينه : بس ياعمي هذا ابوي
عبد الرحمن قلبه متقطع وهو يشوف ولد اخوه كذا : يا مشعل انت مو اول واحد ولا اخر واحد يموت ابوه وعبد العزيز اخوي انا بعد واخوي الكبير
مشعل يصيح: ....
عبد الرحمن : يا مشعل حتى انا يوم يموت ابوي كنت صغير ما كنت اكبر منك بواجد
وابوك كان اخوي الكبير وزي ابوي
عبد الرحمن: الله يرحمه خلاص انت ما تدري انك بدموعك هذي تعذبه
مشعل: الا بس ما اقدر
عبد الرحمن : لا تقدر والحين تعال ندخل داخل وامسح دموعك انت الحين رجال
مشعل : ان شاء الله عمي
"""""""""""""""""""""""""""""""""""""""""""""" ""
في المطعم وبعد ما الكل تغدى
طلال: واالله ياليت مشيعل معانا عشان نكتمل
ام طلال: والله مهوب لمك مبسوط في بيت عمك وتو داق يقول بروح لحفل مدري وشو
وشكله بيأخرنا على الاستراحه
عبير: ليه نروح احنا ويلحقنا هو بعدين
ام طلال: لا والله ماني مخليه وليدي
طلال ينادي الجرسون ويناظر رنا
رنا مبتسمه ولاعلى باللها
طلال: شيك بليز
طلال: الغدا اللي تغديتوا اليوم على حساب الاخت رنا بمناسبة نجاحها
رنا ترفع راسها باستهبال وتنزله: نعم هذا صحيح
جا الجرسون ومعاه الشيك
طلال: يللا رنا ادفعي
رنا كانا معاها بوك صغير وماخذت شنطه ..مدت يدها قدامها تاخذ البوك ما لقته..
رنا تدوره ما لقته
طلال باستهزاء : ههه بتدفعين اجل عشان تقولين نسيت بوكي والا انا كنت بدفع
رنا: لا والله موب كذا مدري وينه
العزوف تضحك و تمسك كتف رنا وتأشر على امها
رنا: يمه وين بوكي
ام طلال: معاي
رنا: يا سلام ورا ما قلتي لي
ام طلال: صغير وحاطته عالطاوله خفت يضيع حطيته بشنطتي
رنا: يمه فشلتيني عند طلال يقول ناسيه بوكها عشان ما تدفع
ام طلال: يعني صدق بتدفعين احسبه يمزح هههه
رنا: تطلع الفلوس من جيبها
وبنمق: محد يقدرني بهالبيت وش شايفيني مفلسه
عبير تطل في البوك : اخس يالكاااش والله منتيب هينه
طلال: المره هذي على رنا المره الجايه على العزوف ان شاء الله
العزوف تذكرت دراستها وتضايقت على هالسنه اللي راحت عليها
طلال: شاف الحزن اللي على وجهها وندم على كلمته
""""""""""""""""""""""""""""""""""""""""""""""
هدى كانت جالسه بالصاله وما درت الا بفتحة الباب التفت تشوف مين اللي جا
لقتها هيفاء استغربت انها ما نزلت الغطا عن وجهها
هدى: هيفاء بشري ان شاء الله ناجحه
هيفاء ما عبرتها وطلعت الدرج بسرعه وبدون ما تتكلم ولا تنطق بحرف
هيفاء: وش فيها ذي لا يكون راسبه
لا بس هي درجاتها يعني كويسه مو شينه مره بالترم الأول
خل اروح ارقى لها واناظر وش قصتها

رد: رواية العــــزوف الي تذبح القلب بغلاها /3
 

عد ما طلعوا الكل وفي استراحة خالهم حمود ابو فراس
خالهم حمود متزوج من ام حمود وعنده ولدين وبنتين
ريما عمرها 23 سنه متزوجه وتنتظر مولودا
فراس 21 سنه وو رامي 14 سنه وريماز 6 سنوات
ام حمود : ريماا روحي نادي البنات الحين بنقطع الكيك
ريمااا: البنات صغار كلهم يلعبون برا
ام حمود : طيب روحي ناديهم
ريما : والله ما فيني حيل
ام حمود : الله يهديك يا ريما عاد المشي زين للحوامل خصوصا بالشهور الاخيره
ريما : لا لا ما اقدر خلي احد غيري
هدى: خالتي معاي مسجل بنشغل اغنيه وين اشبكه فيه
ام حمود : ورا الطاوله اللي هناك حطيه على الطاوله واشبكيه
هدى راحت وشغلت المسجل
رنا: وش بتحطين أي اغنيه
هدى: وحياة قلبي وافراحه حق عبد الحليم
رنا: مسويه كلاسيك يعني
هدى: انا كلاسيك
شغلوا الاغنيه واجتمعوا كلهم حول الطاوله اللي بالنص يغنون معاها ويقطعون الكيك
والصغار معاهم بخاخات وفالينهااا
ام فيصل :: هدى قصي من الكيك الكبير لهيفاء ناخذها لها
ام حمود : ليه هيفاء وينها
ام طلال: هههه توك تنتبهين ما جت هيفاء تعبانه شوي
ام حمود : والله من كثر الحوسه واحنا نرتب لهالحفل والمسابقات اللي قبله
ام طلال: هههههه
ام حمود : والله لو اني داريه كان حلفت عليها تجي
ام فيصل : عاد تعبانه وحاولنا فيها وما طاعت
ام حمود : سلامتها ما تشوف شر سلميني عليها
"""""""""""""""""""""""""""""""
مشعل جا معاهم وانبسط مع رامي للانهم كبر بعض
مشعل: امشي نروح نأجر لنا دباب
رامي: لا اخاف ابوي يعيي
مشعل بضيق: لا عادي موب قايل شي امشي رح انت قله وانا باقول لطلال اخوي
رامي: طيب يللا
راح رامي لابوه يستأذنه
طلال كان قاعد يسولف مع فراس
جا لمهم مشعل وقالهم وطلال ما عيا عليه
طلال: الله يا فراس من كان يتصور انك انت ولد خالي
فراس: محد والله صح اني كنت اشوفك بس مدري
طلال: كذا مره اشوفك دايم باستراحات والمقاهي واخرها تذكر يوم بالمقهى كنت مع ايمن ولد خالة سعود ولد عمي
فراس: ايه ايمن صديقي وتقريبا احنا دايم مع بعض

رد: رواية العــــزوف الي تذبح القلب بغلاها /3
 

طلال: واعرف انك فراس بس ما عمري سألت عن عائلتك
فراس: هههه اهم شي اننا الحين نعرف بعض
سكتوا شوي
فراس : الا وش قلت في عرض ابوي لك بالمشروع الاخير
طلال: والله صعبه اقول لا لخالي وفي نفس الوقت صعبه اخذ منه مستحيل
فراس: انت شغل المشروع وهو ان شاء الله مضمون ميه بالميه وتقدر ترد له من الارباح بعدين
طلال: لا مستحيل انا ابوي الله يرحمه عمره ما مد يده لاحد حتى في وقت الشده وانا مستحيل اكون غير ابوي
فراس: الله يرحمه
طلال: وهو لما مات كان موصي عمي انه يبيع بيت جدي الله يرحمه ويعطينا نصيبه
وعمي عطاني حق ابوي وهو معاي وطبعا ما جيته لانه مو لي لوحدي لي ولاخواني
وكنت من زمان ادور مشروع
فراس: شي حلو تقدر تدخل بهالفلوس
طلال: وهذا اللي باسويه ان شاء الله

رد: رواية العــــزوف الي تذبح القلب بغلاها /3
 

بعد مرور كذا يوم وتحديدا بيوم النتايج
وفي بيت ام طلال
ام طلال: هاه يا رنا وشلون بتاخذين نتيجتك موب اليوم
رنا : والله مدري يمه انا ما عندي نت الحين ودقيت على وحده خويتي بالمدرسه ووصيتها تطلع نتيجتي واول ما تطلع بتدق علي
ام طلال: ايه زين انا بروح اشوف الغدا
رنا : عبير انا خايفه ومتوتره
عبير: من ايش انتي نسبتك زينه تيب
رنا : بس ولو الاسئله كانت صعبه وما احسني حليت زين
عبير: ما عمرك اصلن قلتي حليت زين طول السنه كذا وتجيبين درجات
رنا: بس عبير لو كان هالكلام قبل بسنه والله ما كنت باهتم حتى لو نجحت من الثنوي بنسبة 50 % صدقيني ما يهمني بس انا
عبير نزلت وجهها وكنها حاسه رنا وش بتقول
رنا: انا ابي اكون من الاوائل واحقق لو امنيه بسيطه من اللي كان يتمناه ابوي
العزوف قامت وراحت لغرفتها
عبير: كان ما قلتيه قدامها انتي تدرين انها اكثر وحده تأثرت
رنا: والله ما كان قصدي بس
عبير: بس ايش
رنا : الين متى مراح نقدر نتكلم عن ابوي
عبير: خليه ذكراه بقلبك ولا تقلبين مواجع غيرك
رنا : ما اقدر
عبير: ليش
رنا : احس اني اذا تكلمت عنه وكنه موجود
عبير: مدري عنك والله وحبت تغير السالفه ا
عبير: انتي داريه اننا بنمشي اليوم في الليل كذا
رنا : ايه قالت لي امي
عبير: بس مراح نسكن عند عمتي رجا
رنا: اول مره نروح الشرقيه ما نسكن عندها
عبير : ايه اجل انا بروح اشوف الكوي
رنا: كويتهم كل الملابس
عبير بتطلع من الصاله وبس: اجل بروح اشوف المطبخ وقامت
"""""""""""""""""""""""""""""""""""

رد: رواية العــــزوف الي تذبح القلب بغلاها /3
 

سلمت الايادي على الطرح الجميل
ننتظر القادم بشوق
ودي وتقديري

رد: رواية العــــزوف الي تذبح القلب بغلاها /3
 

متميز
يسعدك ربي

رد: رواية العــــزوف الي تذبح القلب بغلاها /3
 

*,




سلمت الآكف ومَاجلبت
إبداع دآئم وتميز مُستمر
لا عدمنَاك /
:137:

رد: رواية العــــزوف الي تذبح القلب بغلاها /3
 

رد: رواية العــــزوف الي تذبح القلب بغلاها /3